Lizsij dih Gaihcij 45 - Gij Baujcingq Moq Caeuq Geij Bonj Gij Baujcingq Daeuzdaeuz

Yozswz caeuq gij goengjlungz nuengxau de doxnginh

¹ Yozswz dingq le, youq dangqnaj gyoengq vunz gaen henz ndang de cungj mbaet mbouj ndaej hwj siengj daej lo, couh youq mwhneix, de couh mingqlingq gyoengqde ok rog bae. De yienghneix guh dwg siengj youq de caeuq doenghheij beixnuengx de doxnginh hih mwhde, mbouj siengj miz gij vunzrog youq henz de.

² De mingqlingq gyoengqde ok bae le, couh coengq sing daej engxengx hwnjdaeuj, daej hwj gij vunz Ngaihgiz cungj dingqri lo, caemh cenz bae daengz ndaw vangzgungh, goengjvuengz Ngaihgiz cenz ranz vunz caemh cungj rox gienh saeh neix lo.

³ Yozswz daej le, couh doiq gyoengq beixnuengx de naeuz: “Gou couh dwg Yozswz. Daxboh raeuz vanzlij youq bax?” Yozswz yienghneix naeuz le, gyoengq beixnuengx de cungj doeksaet hwj lau hwj ij rai, guh hwj ngoemxngwd mij vah ndaej gangj bae.

⁴ Gajlaeng Yozswz vanzlij hawj gyoengq beixnuengx de goq daeuj gaenh dangqnaj de hwj, couh doiq gyoengqde naeuz: “Gou couh dwg beixnuengx faenhsou Yozswz, caemh dwg ngaiz faenhsou hai bae daengz Ngaihgiz dih Yozswz.

⁵ Hoeng, faenhsou gaejyungh vih gienh saeh neix hwj you, caemh gaejyungh gag gvaiq bonjfaenh. Dwg Cangqdiq baij gou sien daeuj daengz dineix gaxgonq lah; dwg vih ij gouq daixgya dih mingh lah.

⁶ Mwnq dieg neix gaenq ngaiz iekvangh lienzdaemh miz song bi lo, vanzlij miz haj bi laem, mij ndaej geng, mij ndaej ndaem, engq mij ndaej sou.

⁷ Cangqdiq baij gou sien daeuj daengz dineix, couh dwg ij baux faenhsou dih mingh, couh yungh cungj banqfaz geizmiuj neix daeuj baux aen gyahcuz raeuz lah.

⁸ Sojhij, dwg Cangqdiq dawz gou soengq daeuj daengz dineix lah, mbouj dwg faenhsou law. Cangqdiq sawjhawj gou ndaej guh boux bang goengjvuengz Ngaihgiz ok cawjeiq, youq ndaw ranz goengjvuengz ndaej guh boux guenjgya he, caemh ndaej guenj baenx cenz guek dih saeh.”

Yajgoz bae Ngaihgiz

⁹ Gajlaeng Yozswz caiq doiq gyoengqde naeuz: “Faenhsou vaiqdi maj laeng daxboh, naeuz de ni, naeuz: ‘Daeglwg mwngz Yozswz yienghneix naeuz: “Cangqdiq gaenq hawj gou dang baenx cenz guek Ngaihgiz dih bouxcawj lo. Vaiqdi daeuj laeng gou dineix; gaej ngaiz cizgyenh lo!

¹⁰ Mwngz ndaej daiq gij lwglwg lanlan mwngz, daiq cwzcwz yiengzyiengz caeuq mwngz sojmiz dih gyadangq, daeuj dieg Gohsanh youq, youq mwnq gaenh gou.

¹¹ Yienghneix gou couh ndaej ciengx mwngz, swqhaeuh mwngz haemq fungbienh, mienxndaej mwngz caeuq aen gyahcuz mwngz ngaiz miz nanh caeuq ngaiz baih, aenvih cungj lij miz haj bi iekvangh baenxlai caez laem.”’”

¹² Yozswz caemhcaiq naeuz: “Hawjm'z yawj lux, seizneix faenhsou caeuq daegnuengx gou Benqyajminj cungj caenra raen, gij neix cungj dwg gou Yozswz caenbak doiq faenhsou gangj hih.

¹³ Naeuz daxboh ni, gou youq Ngaihgiz cix miz fuk cix yungzdaeuz. Caemh naeuz de ni, faenhsou youq dineix soj caenra raen hih cungj naeuz de ni. Faenhsou vaiqdi maj ciep de daeuj dineix.”

¹⁴ Gangj sat, Yozswz couh caeuq daegnuengx de Benqyajminj doxgot hwj daej ngwdngwd.

¹⁵ De vanzlij doq daej doq got doengh daeggo de, cup gyoengqde. Gajlaeng geij beixnuengx de couh doxcomz hwj gangj vah.

¹⁶ Gyoengq beixnuengx Yozswz daeuj, caemh cenz bae daengz ndaw vangzgungh, yiengq goengjvuengz caeuq gij vunz youq ndaw vangzgungh de rox naeuz gyoengq beixnuengx Yozswz daeuj lo, cungj angq hwj ij rai.

¹⁷ Gajlaeng, goengjvuengz doiq Yozswz naeuz: “Naeuz gyoengq beixnuengx mwngz ni, hawj gyoengqde coux haeux ndei le, couh doz hwnj gwnz gumq duz lawz bae, couh majcangq maj Gyahnamz.

¹⁸ Hawj ndaw ranz daxboh mwngz cenz ranz cungj daeuj dineix daeuj. Gou ij soengq hawj de cenz Ngaihgiz ceiq ndei dih dieg, hawj gyoengqde youq dineix miz gw miz daenj, hab'eiq habhoz, fungcuk saenghhoz.

¹⁹ Mwngz caemh ij raengq gyoengqde, hawj gyoengqde dajlwh Ngaihgiz dineix daiq ci maj ciep gij lwg gij yah gyoengqde caeuq daxboh gyoengqde cungj itheij buen daeuj dineix.

²⁰ Gaejyungh insik gij gyadangq mwnq de, aenvih cenz Ngaihgiz ceiq ndei dih dieg cungj dwg gij gyoengqde.”

²¹ Gajlaeng, gyoengq lwg Yajgoz cungj yienghyiengh ciuq guh lo. Yozswz caemh ciuq goengjvuengz raengq hih yienghmwnq bae cwnjbiq ci. De caemh cwnjbiq gij youq dangjroen ij gw he hawj gyoengqde,

²² caiq soengq hawj gyoengqde boux vunz boux dauq buh, hoeng, soengq hawj Benqyajminj haj dauq buh caeuq caet gaen naek dih ngaenz.

²³ De caemhcaiq soengq hawj daxboh de cib duz lawzgoeng, gwnz gumq doz miz cenz Ngaihgiz ceiq ndei dih doxgaiq, vanzlij miz cib duz lawzmeh, gwnz gumq doz miz daxboh de youq dangjroen soj ij yungh hih haeux hah, bingj hah, caeuq sojmiz hih gij gw hah.

²⁴ Yozswz yienghneix cwnjbiq ndei le, couh hawj gyoengq beixnuengx de maj lo, caemh raengq gyoengqde naeuz: “Faenhsou youq dangjroen gaejyungh doxceng.”

²⁵ Couh yienghneix, gyoengqde dajlwh Ngaihgiz maj daengz dieg Gyahnamz laeng daxboh gyoengqde.

²⁶ Gyoengqde couh naeuz daxboh ni naeuz: “Yozswz vanzlij lix! Seizneix youq Ngaihgiz de ndaej guenj baenx cenz guek hwj.” Daxboh de dingq le, cungj doeksaet hwj guh hwj ngoemxngwd bae. De mbouj sinq naeuz Yozswz vanzlij lix.

²⁷ Hoeng, gajlaeng de dingqri naeuz Yozswz raengq de dih vah, caemhcaiq raen Yozswz baij gij ci Ngaihgiz daeuj ciep de bae Ngaihgiz le, de cij sinq, cij angq hwj ij rai.

²⁸ Gajlaeng, de naeuz: “Ox! Baenz lo, baenz lo, lwg gou Yozswz vanzlij lix! Domh gou mijyaengz rai, ij bae yawjyawj de cij ndaej.”