Lizsij dih Gaihcij 42 - Gij Baujcingq Moq Caeuq Geij Bonj Gij Baujcingq Daeuzdaeuz

Gyoengq goengjlungz Yozswz bae Ngaihgiz

^1-5 Iekvangh gaenq dajlwh Ngaihgiz lienzlih daengz Gyahnamz diqgih lo. [1]Yajgoz dingq naeuz youq Ngaihgiz miz haeux, couh doiq gyoengq lwg de naeuz: “Faenhsou vihmaz cungj lij youq dineix hax; youq dineix daengj rai hajx? Mbouj rox bae siengj di guxmaz hajx? [2]Gou dingqri vunz naeuz Ngaihgiz mwnq miz haeux hai hwj. Faenhsou bae mwnq cawx di haeux he ma, mijn'x gyoengqraeuz ngaiz rai iek vwqx.” [3,5a]Gajlaeng doenghheij daeggo Yozswz, couh dwg cib boux daeggo de, caemh bae Ngaihgiz cawx haeux lo. [4]Hoeng, Yajgoz mij hawj caen daegnuengx Yozswz, couh dwg caeuq Yozswz doxdaep saejndw hih Benqyajminj, gaenhangx gyoengqde bae, hoengjlau de bae le roeb daengz gijmaz saeh.

⁶ Mwhde Yozswz youq Ngaihgiz dang daixngeih ak hwj, de fuqswz hai haeux hawj gyoengq vunz dajlwh gak dieg daeuj he. Doengh daeggo de caemh daeuj lo. Daeuj daengz dangqnaj de le, couh gvih roengzma sax de.

⁷ Yozswz baex myaeg yawj he, couh doq rox naeuz dwg gyoengqde lo, hoeng de gyajcang mbouj roxnaj gyoengqde hwj, naj ndaem ndetndet hwj cam naeuz: “Faenhsou dajlwh mwnqlawz daeuj?” Gyoengqde han naeuz: “Gyoengqraeuz dajlwh Gyahnamz daeuj, siengj daeuj neij cawx haeux lah.”

⁸ Yozswz gan rox gyoengqde, hoeng gyoengqde dauqfanj mij rox de.

Yozswz guqiq bangjlaih gyoengq daeggo de

⁹ Yozswz ngeix daengz gaxgonq de fangxngwnzloq goq dih saeh, couh doiq gyoengq daeggo de naeuz: “Faenhsou dwg gyenhdez, dwg aen guek faenhsou baij daeuj dineix, cenmonz damqdingq yawjyawj, dauqdaej dineix miz mbouj miz mwnq ndaej hoenx he!”

¹⁰ Doengh daeggo de dingq le, couh doq han naeuz: “Ox, goeng'ak, mij dwg law; gyoengqraeuz dwg daeuj cawx haeux lah!

¹¹ Gyoengqraeuz cungj dwg goengjlungz nuengxau he, caiq dwg lauxlaux saedsaed dih vunz, mbouj dwg gyenhdez law.”

¹² Yozswz vanzlij guqiq doiq gyoengqde naeuz: “Mij dwg! Faenhsou gaengjdingq dwg daeuj neij damqdingq yawjyawj dineix dauqdaej miz mbouj miz mwnq ndaej hoenx he.”

¹³ Gajlaeng doengh daeggo de cungj vaiqdi han naeuz: “Goeng'ak hax, gyoengqraeuz cungj dwg dangq bouxhoiq mwngz lah. Itgungh miz cibngeih boux goengjlungz nuengxau, cungj dwg caemh boux boh he. Bohmeh raeuz cungj dwg youq Gyahnamz; daegnuengx ceiq iq seizneix youq henz ndang daxboh, caeuq daxboh youq. Vanzlij miz daegnuengx laem, hoeng, de gaenq ngaiz rai lo.”

¹⁴ Yozswz mboujguenj gyoengq daeggo de baenzlaw naeuz, de vanzlij caiq guqiq naeuz: “Faenhsou gaengjdingq dwg gyenhdez!

¹⁵ Gou ij gaujniemq gaujniemq faenhsou yawj. Gou gamj hij gij coh goengjvuengz ma baujcingq, cizfeih faenhsou ndaej daiq daegnuengx ceiq iq faenhsou daeuj neij, mbouj nex, gaej muengh naeuz faenhsou ndaej yamq ok dineix maj lo.

¹⁶ Faenhsou baij boux he maj daiq daegnuengx iq faenhsou daeuj; lij lw hih vunz gyaeng haeuj ndaw lauz bae. Yungh yienghneix ma cingqmingz yawj faenhsou soj gangj hih vah dwg caen haj gyaj. Mbouj nex, gou couh naeuz faenhsou dwg gyenhdez!”

¹⁷ Couh yienghneix, Yozswz couh gyaeng gyoengqde sam ngoenz.

Dawz Sihmenj ma guh yinzciz

¹⁸ Daengz daixsam ngoenz le, Yozswz doiq gyoengqde naeuz: “Gou dwg boux gingqcungh Cangqdiq he; hauhnaeuz faenhsou ciuq gij vah gou bae guh nex, gou couh nyiuz faenhsou, mbouj aeu gij mingh faenhsou.

¹⁹ Hauhnaeuz faenhsou cingqcaen dwg lauxsaed hih vunz, couh louz boux he youq ndaw lauz; lij lw hih vunz ndaej dawz gij haeux bonjfaenh cawx ndaej hih dawz maj hawj gyoengq vunz iek ndaw ranz lo.

²⁰ Gajlaeng daiq daegnuengx iq faenhsou daeuj hawj gou yawj, yienghneix couh ndaej cingqmingz naeuz faenhsou gangj hih vah dwg lauxsaed he, gou couh nyiuz faenhsou mbouj rai.” Yozswz yienghneix naeuz le, gyoengqde caemh dungziq lo.

²¹ Gajlaeng, gyoengqde cungj gag ienq naeuz: “Mbat neix gyoengqraeuz bauqwngq dawz lo! Gaxgonq gyoengqraeuz cungj gag haih nuengx bonjfaenh, mingzmingz raen de souh haemz souh hoj gouz gyoengqraeuz lo, hoeng gyoengqraeuz cungj mij leix mij langh de. Mbat neix lwnz daengz raeuz souh coih lo.”

²² Couh youq mwhneix, Lijbenq daeggo gyoengqde dingq gyoengqde yienghneix naeuz le, couh doiq gyoengqde naeuz: “Gou cungj byah goq faenhsou lo nex, naeuz mbouj hawj faenhsou haih daegnuengx raeuz lo, hoeng faenhsou mbouj dingq. Seizneix faenhsou raen mijyaengz, haih de dih coih, mbat neix daengz raeuz rap lo.”

²³ Mwh gyoengqde gangj hih doenghgij vah neix, gyoengqde mbouj rox naeuz Yozswz rox dingq, aenvih Yozswz caeuq gyoengqde gangj hih vah, cungj dwg miz vunz youq henz de bang de fanhyiz he.

²⁴ Yozswz dingq gyoengqde gangj vah le, couh byaij goq daixlingh mwnq bae, daej donq he, caiq doiqyungz byaij goqma caeuq gyoengqde gangj vah. Gajlaeng dajlaeng gyoengqde rag Sihmenj okdaeuj, couh youq dangqnaj gyoengqde goenj hwnjdaeuj.

Doengh daeggo Yozswz maj Gyahnamz

²⁵ Yozswz raengq gij vunz de, hawj gyoengqde dawz doengh aen daeh daeggo de ma coux haeux rim hwj hawj gyoengqde, caiq dawz gij ngaenz gyoengqde oet haeuj gak aen daeh gyoengqde bae boiz, caemhcaiq cwnjbiq youq buenqroen hih gij gw he. Yiengq gij vunz de caemh ciuq guh lo.

²⁶ Sojmiz hih cungj cwnjbiq ndei le, doengh daeggo de couh dawz daeh haeux doz hwnj gwnz gumq duz lawz bae, couh maj ranz lo.

²⁷ Daengz haemh le, youq buenqroen miz mwnq youq he, gyoengqde couh doz youq mwnq youq haemh. Yiengq miz boux he gej bak daeh ij aeu swzliuq ma gueng duz lawz, cij raen gij ngaenz bonjfaenh cungj lij coengq youq ndaw daeh.

²⁸ Gajlaeng de couh naeuz doenghheij goengjlungz nuengxau de ni, naeuz: “Hawjm'z yawj lux, gij ngaenz gou caiq doiq boiz ma lo, youq ndaw daeh gou nwih.” Gyoengqde dingq le, cungj dungxmbouq ndangsaenz, boux yawj boux, heiq memmem hwj naeuz: “Dauqdaej Cangqdiq ijsiengj hawj raeuz guh gijmaz nex?”

²⁹ Gyoengqde maj daengz dieg Gyahnamz, daengz daxboh gyoengqde mwnq le, couh geq naeuz de ni gyoengqde roeb daengz gijmaz saeh. Gyoengqde naeuz:

³⁰ “Bouxcawj Ngaihgiz doiq gyoengqraeuz gaeuq yiemz lo, ngengh naeuz gyoengqraeuz dwg gyenhdez, dawz gyoengqraeuz cenzbuq gyaeng haeuj ndaw lauz bae.

³¹ Gyoengqraeuz naeuz raeuz mij dwg gyenhdez law, dwg vunz lauxsaed lah.

³² Gyoengqraeuz cibngeih boux goengjlungz nuengxau cungj dwg caemh boux boh he lah, miz daegnuengx he gaenq ngaiz rai lo, daegnuengx ceiq iq he seizneix caeuq daxboh youq dieg Gyahnamz.

³³ “Hoeng, bouxcawj Ngaihgiz naeuz: ‘Hauhnaeuz ijsiengj hawj gou sinq faenhsou dwg mbouj dwg lauxsaed hih vunz, faenhsou couh sien aeu boux he louz youq dineix; lij lw hih vunz dawz haeux maj ranz hawj gij vunz iek ndaw ranz.

³⁴ Gajlaeng le, daiq daegnuengx iq ndaw ranz daeuj laeng gou dineix; yiengq, gou cij sinq naeuz faenhsou dwg vunz lauxsaed, mbouj dwg gyenhdez. Gou cij coengq boux beixnuengx faenhsou, vanzlij hawj faenhsou seizbienh daeuj laeng gou cawx haeux.’”

³⁵ Gyoengqde geq naeuz daxboh ni liux le, couh dawz doengh daeh haeux raix okdaeuj. Liuh mbouj daengz gak vunz dih ngaenz cungj lij youq ndaw daeh bonjfaenh. Guh hwj gyoengqde caeuq daxboh de raen gij ngaenz le, cungj lau liux.

³⁶ Daxboh gyoengqde doiq gyoengqde naeuz: “Faenhsou ijsiengj hawj gij lwg gou cungj baih liux bae maz! Yozswz mij miz lo, Sihmenj caemh mij lo; faenhsou vanzlij ij daiq daeg lwgsod gou bae laem hajx! Sojmiz hih beiqciz cungj ngaiz gou dawz liux lo!”

³⁷ Gajlaeng, Lijbenq doiq daxboh de naeuz: “Dawz de gyau hawj gou bax; gou baujcingq daiq de ma. Hauhnaeuz gou mbouj daiq de ma hawj mwngz, mwngz couh gaj song daeglwg gou bax! Mwngz coengqsim dawz de gyau hawj gou bax. Gou gaengjdingq daiq de ma hawj mwngz.”

³⁸ Hoeng, Yajgoz naeuz: “Gou mbouj hawj de gaen faenhsou bae law! Caen daeggo de gaenq ngaiz rai lo; Lahgyez seng hih lwg, lij gag lw de boux dog laem lo. Dingjlingz faenhsou bae daengz buenqroen roeb miz gijmaz saeh ngaiz haih nej, yiengq caemhdangq faenhsou hawj gou vunz laux rai ra mbouj laep lo.”