Lizsij dih Gaihcij 41 - Gij Baujcingq Moq Caeuq Geij Bonj Gij Baujcingq Daeuzdaeuz

Gij loq goengjvuengz Ngaihgiz

¹ Goq song bi le, goengjvuengz Ngaihgiz miz mbat fangxngwnzloq he, loqraen bonjfaenh de ndwn youq hamq dah Nizloz,

² yawjraen miz caet duz cwzmeh biz bwdbwd hoenz hwdhwd dajlwh ndaw dah hwnj hamq ma gw nywj.

³ Gajlaeng caiq miz caet duz cwzmeh byombyom ndangjndangj he, caemh dajlwh ndaw dah hwnj ma, ndwn youq henz caet duz cwz biz bwdbwd mwnq.

⁴ Hoeng, caet duz cwz byom mwnq engq gyan gw caet duz cwz biz mwnq. Loq daengz dineix, goengjvuengz couh singj lo.

⁵ Gajlaeng goeng de caiq doiqyungz ninz ralaep, caiq fangxngwnzloq. Mbat neix loqraen miz go mienh he; go de ok miz caet riengz mienh mbot mbwtmbwt.

⁶ Gajlaeng caiq ok miz caet riengz bauz badbad, ngaiz rumz doeng ci hwj reuq ratrat liux.

⁷ Caet riengz mienh bauz neix dawz caet riengz mienh mbot mwnq gyan roengzbae liux. Loq daengz dineix, goeng de caiq singj lo; singj le de cij rox naeuz yienzlaiz dwg fangxngwnzloq lah.

⁸ Daengz haet daixngeih, gij loq de cungj lij youq ndaw uk de baenxlai luenh. Yiengq de couh baij vunz bae heuh Ngaihgiz sojmiz dih bouxsien caeuq boux rox saw lai he daeuj, naeuz gyoengqde ni de fangxngwnzloq raen gijmaz, siengj hawj gyoengqde cek gij loq de dauqdaej dwg gijmaz iqswh. Hoeng, cungj mij saek boux rox cek gij loq de.

Goeng guenj laeuj doeng Yozswz hawj goengjvuengz

⁹ Ngamqluj mwhneix, boux guenj laeuj mwnq doiq goengjvuengz naeuz: “Ox! Gou gaeuq ngawz lo; seizneix gou cij ndaejgeiq!

¹⁰ Miz mbat he, mwngz aeuqheiq, roengz mingqlingq dawz boux guenj guh menqbauh mwnq caeuq gou gyaeng haeuj ndaw lauz gingjveiqfuj bae.

¹¹ Miz haemh he, raeuz song boux cungj fangxngwnzloq, gag vunz gag loq mbouj doxdoengz.

¹² Mwhde, miz boux Hihbwzlaiz vunz hauxseng he caemh caeuq raeuz gyaeng youq itheij; de gaxgonq dwg swqhaeuh gingjveiqcangj he. Raeuz gangj naeuz de ni naeuz gyoengqraeuz loqraen gijmaz, yiengq de couh bang raeuz cek gij loq raeuz, naeuz raeuz ni, gak vunz loqraen dih dwg gijmaz iqswh.

¹³ Gajlaeng hax, cingqcaen gaeuq lingz hoh, caemh luj de cek gij loq mwnq ityiengh: gou ndaej doiqyungz guh gij hong gaxgonq he boiz, goeng guenj guh menqbauh mwnq caemh ngaiz venj hwnjdaeuj lo.”

¹⁴ Goengjvuengz dingq de yienghneix naeuz le, couh baij vunz bae heuh Yozswz daeuj laeng de, yiengq gyoengqde couh nyungjnyungj nyatnyat dajlwh ndaw lauz daiq Yozswz okma. De ok ma le, couh gvet mumh, lawh buh seuqset le, couh bae laeng goengjvuengz.

¹⁵ Goengjvuengz raen de le, couh naeuz Yozswz naeuz: “Gou caemh miz yiengh fangxngwnzloq he, hoeng, mij vunz rox cek. Gou dingqri vunz naeuz mwngz rox cek gij fangxngwnzloq vunz.”

¹⁶ Yozswz dingq le, han naeuz: “Goengjvuengz hax, mbouj dwg gou rox cek loq law; dwg Cangqdiq hawj gou rox cek lah.”

¹⁷ Yiengq, goengjvuengz couh naeuz Yozswz ni naeuz: “Gou fangxngwnzloq raen gou ndwn youq hamq dah Nizloz.

¹⁸ Sawqmwh miz caet duz cwzmeh biz bwdbwd hoenz hwdhwd, dajlwh ndaw dah hwnj hamq dah ma gw nywj.

¹⁹ Gajlaeng caemhcaiq miz caet duz cwzmeh byombyom ndangjndangj cix yakyawj he caemh gaenhangx hwnj ma. Youq Ngaihgiz, gou coengzlaiz mijyaengz raen goq miz cungj cwz byombyom ndangjndangj caiq yakyawj neix.

²⁰ Doengh duz cwz byombyom ndangjndangj caiq yakyawj mwnq engqgya gyan gw doengh duz cwz biz bwdbwd mwnq.

²¹ Gyoengqde gannaeuz gw doengh duz cwz biz mwnq lah, hoeng, caemh ciuqyiengh luj gaxgonq yienghmwnq byombyom ndangjndangj; yawj mbouj ok gyoengqde gw goq cwz biz. Loq daengz dineix, gou couh singj lo.

²² “Gajlaeng, gou caiq miz mbat fangxngwnzloq he, loqraen miz go mienh he ok miz caet riengz mienh, mbot mbwtmbwt.

²³ Caemhcaiq gaenhangx ok miz caet riengz mienh, bauz badbad, ngaiz rumz doeng ci hwj reuq ratrat he.

²⁴ Caet riengz mienh bauz badbad mwnq engqgya gyan caet riengz mienh mbot mbwtmbwt mwnq roengzbae. “Gou gangj naeuz gij fangxngwnzloq neix naeuz bouxsien ni, hoeng mij saek boux rox cek gij loq neix dwg gijmaz iqswh.”

Yozswz bang goengjvuengz cek loq

²⁵ Yozswz dingq le, doiq goengjvuengz naeuz: “Goengjvuengz, mwngz fangxngwnzloq song yiengh, gizsaed cijngamq dwg yiengh he; doenghgij iqswh de cungj dwg doxdoengz. Cangqdiq couh yungh yienghneix naeuz mwngz ni de ij guh gijmaz lo.

²⁶ Ndaw loq ndaw de naeuz miz caet duz cwzmeh biz bwdbwd mwnq, couh dangq naeuz caet bi; doengh caet riengz mienh mbot mbwtmbwt mwnq caemhdangq caet bi. Doenghgij neix gij iqswh de cungj dwg doxdoengz.

²⁷ Doengh caet duz cwzmeh byom byangjbyangq cix hojyawj mwnq caeuq doengh caet riengz mienh bauz badbad reuq ratrat mwnq caemhdangq caet bi, couh dwg naeuz dangq caet bi iekvangh.

²⁸ “Caemh luj daxbaenh gou naeuz goengjvuengz ni, Cangqdiq gaenq naeuz mwngz ni de ij guh gijmaz lo,

²⁹ couh dwg naeuz cenz Ngaihgiz miz caet bi fungcuk,

^30-31 gajlaeng caemh miz caet bi mij sou ndaej saek ceh. Cenz Ngaihgiz cungj iekiek vanghvangh, youqgaenj raixcaix, hawj vunz cungj mbouj ndaejgeiq gaxgonq caemh miz fungcuk goq.

³² Goengjvuengz hax, Cangqdiq hawj mwngz fanjfuz fangxngwnzloq song mbat baenx lai, couh dwg naeuz de gietdingh ij guh gij saeh neix lo vwh.”

³³ Yozswz vanzlij caiq naeuz: “Goengjvuengz, mwngz wnggai genj boux vunz ceiq coengjmingz ceiq rox faenbied ndaej ok gijmaz saeh hab mbouj hab guh he daeuj guenjleix Ngaihgiz.

³⁴ Caemh youq cenz guek gak dieg genj vunz daeuj cwnjbiq youq caet bi sou ndaej lai fungcuk mwnq, sou hwnj cenz guek sou ndaej dih haj faenh cih it dih haeux,

³⁵ diuh haeuj ndaw canghguq ndaw singz bae, caenhgag goengjvuengz cij ndaej miz gienz hawj byawz yungh he,

³⁶ fuengz daengz caet bi iekvangh mwnq. Bienh haeux neix caemh ndaej gaeuq Ngaihgiz sojmiz dih vunz lo, youq caet bi iekvangh mwnq mbouj ngaiz iek hwj rairaeg raicied bae lo.”

³⁷ Goengjvuengz dingq le, caeuq doengh gyoengq gaen henz ndang de cungj dungziq Yozswz yienghneix naeuz.

³⁸ Gajlaeng, de couh doiq gyoengq gaen henz ndang de naeuz: “Gij Hoenzsaenz Cangqdiq caeuq Yozswz youq; senj de ceiq hab lo. Mij saek boux ndaej beij de hab.”

³⁹ Goeng de yienghneix naeuz le, vanzlij doiq Yozswz naeuz: “Giqyienz Cangqdiq gijmaz cungj gangj naeuz mwngz ni lo, yiengq caemh mij'z vunz ndaej luj mwngz cix coengjmingz cix yawj ndaej gyae laem lo.

⁴⁰ Gou hawj mwngz guenj aen gya gou; Ngaihgiz sojmiz hih vunz cungj ij dingq mwngz cijveih. Gou ceiq ak couh daengz mwngz lo.

⁴¹ Couh dwg naeuz mwngz ndaej guenj baenx cenz Ngaihgiz liux.”

⁴² Goengjvuengz naeuz daengz neij le, couh duet aeu aen haedfawz miz yaenq de, daenj hawj Yozswz, caiq hawj de daenj diuz buhbauz raez gyaeundei he, youhcaiq daiq hangqlenq gim hawj de.

⁴³ Yiengq caiq hawj Yozswz naengh aen ci dang daixngeih ak cij ndaej naengh he, caemh miz vunz youq dangqnaj hemq: “Gvih roengzma, gvih roengzma!” Couh yienghneix, Yozswz guenj baenx cenz Ngaihgiz.

⁴⁴ Goengjvuengz caiq doiq Yozswz naeuz: “Gou gannaeuz dwg dang vuengz lah, hoeng, youq Ngaihgiz mij'z mwngz hoi bak gangj vah bihcwnj, mij'z vunz ndaej gag ok cawjeiq guh gijmaz.”

⁴⁵ Goengjvuengz caemhcaiq an coh hawj Yozswz heuh Sajfaznaqdwz-Bahneiqyaq, caemh hawj de aeu dah lwgsau goengjsae youq An Singz guh dajbwiz he, couh dwg Bohdizfeihlah dih dahlwg de, heuh Yaqsihnaz, aeu ma guh yah. Couh yienghneix, cenz Ngaihgiz cungj rox Yozswz ndaej guenj baenx cenz Ngaihgiz liux lo.

⁴⁶ Yozswz samcib bi couh gaihcij bang goengjvuengz Ngaihgiz guenjleix guekgya daixsaeh, dajlwh vangzgungh bae Ngaihgiz gak dieg, dauqcawq byaijbyaij cazcaz yawjyawj.

⁴⁷ Youq caet bi fungcuk mwhde,

⁴⁸ de dawz gij haeux seiqhenz singz he ma dong hwj,

⁴⁹ dong ndaej baenxbienh, lai luj gij sa henz haij nwih, guh hwj mij banqfaz rau bae.

⁵⁰ Mwh ijvanh daengz doengh bi iekvangh mwnq, mehyah Yozswz gaenq seng miz song daeglwg lo.

⁵¹ Mwh Yozswz an coh hawj daeglwg daeuz de hih mwhde, de naeuz: “Ox! Cangqdiq sawjhawj gou lumz gaxgonq ndaw ranz bohmeh gou sojmiz dih nanh,” couh yienghneix de couh an coh hawj de heuh Majnazsih. (‘Majnazsih’ couh dwg ‘sawjhawj lumz’ dih iqswh.)

⁵² Gajlaeng Yozswz an coh hawj daeglwg ngeih de hih mwhde, de caemh naeuz: “Cangqdiq hawj gou youq mwnq dieg haemzhoj neix miz lwg, hwngqseiq hwnjdaeuj,” yiengq couh an coh hawj de heuh Hijfazlenz. (‘Hijfazlenz’ couh dwg ‘sawjhawj hwngqseiq’ dih iqswh.)

Iekvangh daeuj daengz

⁵³ Ndaw guek Ngaihgiz lienzdaemh caet bi fungcuk le,

⁵⁴ caemh luj gaxgonq Yozswz naeuz hih yienghmwnq, caemhcaiq lienzdaemh daengz caet bi iekvangh. Gannaeuz gak guek gak dieg cungj ngaiz iekvangh lah, hoeng ndaw guek Ngaihgiz ndaw de dauqcawq cungj miz haeux.

⁵⁵ Mwh Ngaihgiz gak dieg cungj roeb daengz iekvangh mwhde, gij vunz cungj bae gouz goengjvuengz aeu haeux hwj hemq bae, yiengq goengjvuengz couh mingqlingq gyoengqde naeuz: “Faenhsou bae cimh Yozswz aeu; sojmiz dih saeh cungj youz de nganhbaiz.”

⁵⁶ Aenvih Ngaihgiz dauqcawq cungj roeb daengz iekvangh, yied ngoenz yied yiemzcungq, yiengq Yozswz couh hoi sojmiz dih canghguq, dawz gij haeux hai hawj gij vunz Ngaihgiz.

⁵⁷ Daiqlienz gak guek gak dieg dih vunz cungj caemh daeuj daengz Ngaihgiz laeng Yozswz cawx haeux.