Lizsij dih Gaihcij 39 - Gij Baujcingq Moq Caeuq Geij Bonj Gij Baujcingq Daeuzdaeuz

Yozswz youq Ngaihgiz ngaiz hai hawj Bohdizfaz

¹ Yozswz nej, Yozswz ngaiz buek vunz canghrih mwnq dawz bae daengz Ngaihgiz hai hawj goengjvuengz Ngaihgiz dih boux gingjveiqcangj he, heuh Bohdizfaz.

² Yiengq Yozswz couh youq laeng boux de youq. Yehhozvaz caemh caeuq Yozswz youq, sawjhawj de yienghyiengh swnh.

³ Bouxcawj de Bohdizfaz raen Yehhozvaz siengzseiz cungj caeuq Yozswz youq, caiq soengq fuk hawj de, sawjhawj de guh hih saeh yienghyiengh cungj swnh.

⁴ Couh vih yienghneix, bouxcawj cungj gag haenj de, couh hawj de gaen henz ndang bonjfaenh, caemh dwg yawj de dwg boux ceiq ndei ceiq caen he. Bouxcawj caiq hawj de guenj sojmiz dih hongranz caeuq bouxcawj sojmiz dih gyasaeh.

⁵ Dajlwh Yozswz daeuj guenj le, Yehhozvaz vihliux Yozswz dih yienzyouz caemh soengq fuk hawj bouxcawj de Bohdizfaz. Ndaw ranz de caeuq sojmiz dih reihnaz, Yehhozvaz caemh soengq fuk hawj.

⁶ Bohdizfaz dawz sojmiz dih guxmaz cungj gyau hawj Yozswz guenjleix le, de maj ranz cij rox gw haeux, mboujyungh guh saek yiengh. Mwhde Yozswz ndangdaej giencangq caiq baenxmbauq.

Mehyah Bohdizfaz bangjlaih Yozswz

⁷ Mbouj geijlwh caez mehyah bouxcawj yawjhwnj de, couh douhdouh degdeg loxlox legleg de naeuz: “Daeuj veiq, daeuj caeuq gwh ninz nax!”

⁸ Yozswz dingq le, couh doq naeuz: “Ox, mbouj ndaej, mbouj ndaej! Bouxcawj gou baenxlai sinq gou; de dawz de sojmiz dih guxmaz cungj gyau hawj gou guenj. Gou youq dineix, de cungj mbouj hoj guenj saek yiengh.

⁹ Youq ndaw ranz, de hawj gou dang boux ceiq ak he, cungj coengq fawz hawj gou liux, cawzok mwngz, aenvih mwngz dwg mehyah de. Gou baeq ndaej guh gij saeh mbouj ya mbouj yongq, mbouj sam mbouj seiq neix nej? Yienghneix daekcoih Cangqdiq vwx!”

¹⁰ Yozswz mboujguenj meh cawjranz de ngoenzngoenz baenzlawz gyaek de, de ciuqyiengh mbouj leix mbouj langh meh de, mbouj caeuq meh de ninz, lienz dep cungj mbouj dep meh de.

¹¹ Gajlaeng, miz ngoenz he, Yozswz haeuj ndaw fungh bae guh hong, ngamqngamq luj letlet mwhneix ndaw ranz mij saek boux vunz.

¹² Meh cawjranz raen yienghneix le, couh byaij haeujbae, couh cij dawz diuz buh de naeuz: “Daeuj! Daeuj caeuq gwh ninz nax!” Yozswz mbouj han mbouj haemq, couh riq ok rog bae. Hoeng diuz buh de ngaiz meh cawjranz de ya dawz youq ndaw fawz.

¹³ Meh de raen ndaw fawz bonjfaenh vanzlij gaem dawz diuz buh Yozswz hwj, hoeng Yozswz gaenq riq ok rog bae lo;

¹⁴ de couh swngzgei hemq, hemq hawj gyoengq hoiq de daeuj. Yiengq de couh daejdaej danqdanq naeuz: “Faenhsou yawj hax, goeng gou daiq boux Hihbwzlaiz vunz neix ma sainaj raeuz! Daxbaenh de haeuj laeng gou daeuj siengj gaemh gou.

¹⁵ Caeklaiq gou hemq hwnjdaeuj, de lau hwj couh vaiqdi gveng diuz buh youq henz ndang gou couh riq okbae lo.”

¹⁶ Gajlaeng, meh cawjranz couh dawz diuz buh diuh youq henz ndang hwj daengj goeng de ma.

¹⁷ Yiengq, goeng de ma le, meh de couh luenhbangh an gij saeh he ma naeuz goeng de ni. De naeuz: “Mwngz daiq ma hih bouxhoiq mwnq, couh dwg boux Hihbwzlaiz vunz mwnq, engqgya ndonj haeuj laeng gou mwnqneix daeuj, ijsiengj gaemh gou.

¹⁸ Gou hoi rengz hemq le, de couh gveng diuz buh de youq neij, mbouj aeu lo, deuz hwj maetlaenq bae. Bouxhoiq mwngz couh dwg yienghneix doiq gou lo!”

¹⁹ Goeng cawjranz Yozswz dingqri mehyah de naeuz yienghneix le, couh ndatheiq hwj ij rai,

²⁰ couh gaemh dawz Yozswz bae gyaeng, caeuq gyoengq vunz daekcoih goengjvuengz hih gyoengq vunzfamh mwnq gyaeng youq itheij.

²¹ Hoeng, Yehhozvaz ciuqyiengh caeuq Yozswz youq, vanzlij soengq fuk hawj de, sawj yuzcangj yawjhwnj de.

²² Yiengq yuzcangj couh baij de guenj ndaw lauz sojmiz dih vunzfamh, caeuq ndaw lauz sojmiz dih saeh.

²³ Yehhozvaz vanzlij caeuq Yozswz youq, sawj de guh gijmaz cungj baenz, cungj swnh; yuzcangj cungj mboujyungh causim.