Lizsij dih Gaihcij 38 - Gij Baujcingq Moq Caeuq Geij Bonj Gij Baujcingq Daeuzdaeuz

Youzdaq caeuq Dahmaj

¹ Mwhmwnq, Youzdaq liz gyoengq goengjlungz nuengxau de, bae laj Yaqduqlanz, laeng boux heuh Hihlah he youq.

² Youzdaq youq mwnq roxnaj dah lwgsau he; dah lwgsau neix dwg dah lwgsau Cuhyaq, dwg Gyahnamz vunz he. Youzdaq couh aeu dah de ma guh yah.

³ Gajlaeng mehyah de couh mizndang, seng miz daeglwg he. Yiengq Youzdaq couh an coh hawj laeq lwg neix heuh Wj.

⁴ Yah de caiq mizndang lo, caiq seng miz daeglwg he, an coh hawj laeq lwg neix heuh Ngoznamz.

⁵ Yah de youhcaiq mizndang, youhcaiq seng miz daeglwg he, youhcaiq an coh hawj laeq lwg neix heuh Siqlah. Yah de seng Siqlah mwhde, Youzdaq youq Gihsiz.

⁶ Youzdaq aeu yah hawj daeglwg daeuz de; gij coh mehyah de heuh Dahmaj.

⁷ Daeglwg daeuz Youzdaq, heuh Wj, youq ndaw lwgra Yehhozvaz dwg boux vunz rwix vunz yak he, sojhij Yehhozvaz aeu diuz mingh de bae lo.

⁸ Gajlaeng, Youzdaq doiq Ngoznamz naeuz: “Mwngz bae caeuq beixsauj mwngz bax, caeuq de ninz, bang daeggo mwngz, hawj de miz lwg miz lan, hawj de gajlaeng mbouj ngaiz cied. Gij neix dwg mwngz guh nuengxau dih swzyimq.”

⁹ Ngoznamz rox naeuz baezneix seng dih lwg mbouj dwg ndaej gvi hawj bonjfaenh le, yiengq de moix it mbat caeuq beixsauj de ninz, cungj guqiq ceq gij guxmaz guxmaz de ok rog bae, mbouj nyienh'eiq bang daeggo de miz lwg.

¹⁰ Ngoznamz soj guh dih saeh youq ndaw lwgra Yehhozvaz cungj dwg vaihsaeh, sojhij Yehhozvaz couh aeu gij mingh de.

¹¹ Gajlaeng, Youzdaq doiq mehbawx de Dahmaj naeuz: “Mwngz maj laeng boxda mwngz soujmaiq bax. Daengj daengz daeglwg gou Siqlah hung baenz vunz le, menhcij aeu mwngz.” Youzdaq gangj gij vah neix, ndaw sim de gag naemj, hoengjlau Siqlah caemh luj song boux daeggo de ngaiz rai. Yiengq Dahmaj couh maj laeng boxda de, youq laeng boxda de youq.

¹² Goq haujlai caez, mehyah Youzdaq, couh dwg dahlwg Cuhyaq, rai lo. Soujsangq goq le, Youzdaq caeuq boux baengzyoux de Hihlah bae daengz Dingznaz, aenvih youq mwnq miz vunz bang de daet fwn yiengz.

¹³ Yiengq miz vunz naeuz Dahmaj ni, naeuz: “Aex! Goeng gyagoeng mwngz bae Dingznaz daet fwn yiengz lo.”

¹⁴ Dahmaj rox naeuz Siqlah gaenq hung lo, hoeng, vanzlij mijyaengz daeuj aeu de maj guh yah, couh duet diuz buh soujyauq de, aeu cahginh ma goemq naj hwj, mbouj hawj vunz roxnaj de, couh naengh youq dangjroen bae Dingznaz dih baksingz Ihnazyinq mwnq hwj.

¹⁵ Youzdaq yawjraen de le, naemqnaeuz de dwg lauxgawj lah, aenvih de aeu cahginh ma goemq naj hwj. Youzdaq couh byaij goq laeng de bae, doiq de naeuz: “Aex! Daeuj hax, gaen gou bae ninz nax!”

¹⁶ Yienzlaiz Youzdaq gaenhbaenj mbouj rox de dwg mehbawx bonjfaenh. Yiengq Dahmaj cam de naeuz: “Gou caeuq mwngz ninz, ndaej hawj gou gijmaz nej?”

¹⁷ Youzdaq han naeuz: “Gou dajlwh gyoengq yiengz gou genj aeu duz yiengzlwg he, hawj vunz soengq daeuj hawj mwngz.” Dahmaj couh han naeuz: “Ndaej hah, ndaej hah. Hoeng, seizneix mwngz mijyaengz soengq daeuj hawj gou hah, mwngz sien louz yiengh doxgaiq he ma guh dijyaz cij ndaej hah.”

¹⁸ Yiengq Youzdaq cam naeuz: “Mwngz ij aeu gijmaz ma guh dijyaz nej?” Dahmaj naeuz: “Aeu aen yaenq mwngz, daiqlienz diuz cag riengh aen yaenq de, caeuq diuz faexdwngx ndaw fawz mwngz.” Yiengq Youzdaq couh aeu doenghgij neix hawj de. Hawj le, couh caeuq de ninz lo. Dahmaj youh dajlaeng Youzdaq ndaej mizndang lo.

¹⁹ Dahmaj hwnq le, vanzlij dwg maj laeng mehdai youq, de couh dawz mbaw cahginh goemq naj de roengz, caiq doiqyungz daenj diuz buh soujyauq de.

²⁰ Gajlaeng Youzdaq hawj boux baengzyoux de Hihlah, hawj de bang dawz duz yiengzlwg he bae cimh boux vunzbaz mwnq, vuenh aeu gij doxgaiq gaxgonq dijyaz mwnq ma, hoeng, Hihlah mboujguenj baenzlawz cimh, cungj cimh mbouj raen de.

²¹ Yiengq de couh cam gij vunz bonjdeih mwnq, cam naeuz: “Youq henz roen Ihnazyinq hih boux lauxgawj mwnq, nwj bae lah, cungj mij raen nex?” Gij vunz mwnq han naeuz: “Dineix coengzlaiz mij lauxgawj goq.”

²² Gajlaeng, Hihlah couh maj lo, maj naeuz Youzdaq ni, naeuz: “Gou cimh mij raen de. Gij vunz mwnq vanzlij naeuz mwnq coengzlaiz mij lauxgawj goq.”

²³ Youzdaq dingq le, han naeuz: “Suenq lox! Doenghgij doxgaiq mwnq ajcaih de aeu bae suenq lox, suenq gou soengq hawj de sat lo. Mbouj caiq bae cimh de lo, mienxndaej vunz riu raeuz. Fanjcingq raeuz gaenq soengq duz yiengz he bae hawj de lo, hoeng cimh de mij raen, mij banqfaz hah.”

Dahmaj miz suengjseng

²⁴ Goq sam ndwen le, miz vunz naeuz Youzdaq ni naeuz: “Mehbawx mwngz guh lauxgawj, mizndang lo.” Youzdaq dingq le, couh ndatheiq hwj ij rai bae, couh naeuz: “Rag de okdaeuj, vuengvak de rai bae!”

²⁵ Yiengq, couh youq mwh Dahmaj ngaiz rag okdaeuj hih mwhde, de hawj vunz bang de dawz doenghgij doxgaiq de bae hawj goeng gyagoeng de yawj, caemh hawj boux bang de mwnq naeuz: “Hawj mwngz yawj lux, doenghgij doxgaiq neix dwg gij bouxlawz, couh dwg bouxlawz hawj gou mizndang lo. Cingj mwngz yawj ndei hwj, yawjyawj aen yaenq neix caeuq diuz cag riengh de, caeuq diuz faexdwngx neix, dwg gij bouxlawz.”

²⁶ Gajlaeng, Youzdaq rox naeuz doenghgij doxgaiq neix dwg gij bonjfaenh de le, couh naeuz: “Ox! Dwg de haemq deng; gou mij deng lo. Baenjlaiz gou wnggai hawj daeglwg gou Siqlah aeu de ma guh yah hih, hoeng gou mij hawj de aeu; gou mij deng lo.” (Daj mbat mwnq, Youzdaq caiq mij caeuq de ninz goq.)

²⁷ Gajlaeng Dahmaj ijvanh daeng seng lo, cij rox naeuz ndaw ndang de miz doiq suengjseng he.

²⁸ Daengz seng hih mwhde, miz laeq he sien iet cik fawz de okdaeuj. Meh ciepseng de couh aeu diuz cag hoengz he ma cug gij fawz de hwj geiqhauh, naeuz: “Laeq neix sien seng okdaeuj gaxgonq.”

²⁹ Hoeng liuh mbouj daengz de caiq ywt gij fawz de haeujmaj; daeggo de dauqfanj sien ok daeuj gaxgonq. Meh ciepseng de naeuz: “Mwngz baeq ciengj ok daeuj gaxgonq lah!” Yiengq Youzdaq couh an coh hawj laeq lwg neix heuh Fazlwzswh. (‘Fazlwzswh’ couh dwg ‘cung okdaeuj’ dih iqswh.)

³⁰ Gajlaeng daegnuengx de caemh gaenhangx seng okdaeuj lo. Gij fawz de vanzlij cug miz cag hoengz hwj, couh an coh hawj de heuh Seqlah. (‘Seqlah’ couh dwg ‘hoengz fwgfwg’ dih iqswh.)