Lizsij dih Gaihcij 37 - Gij Baujcingq Moq Caeuq Geij Bonj Gij Baujcingq Daeuzdaeuz

¹ Hijsauj buen bae Sih'wj youq, hoeng Yajgoz vanzlij dwg youq Gyahnamz, youq mwnq dieg gaxgonq daxboh de youq goq he.

Yozswz caeuq gij goengjlungz de

² Laj neix dwg ranz Yajgoz dih lizsij. Yozswz ndaej cibcaet bi mwhmwnq, de siengzseiz gaenhangx gyoengq doengz boh mbouj doengz meh dih geij boux daeggo de bae coengq yiengz. (Geij boux daeggo de couh dwg Bizlah caeuq Sizbwz seng dih lwg.) Yozswz haenj bauqsieng naeuz daxboh de ni gyoengq daeggo de guh gijmaz vaihsaeh.

³ Yajgoz ceiq aiq Yozswz, aenvih Yozswz dwg de laux le cij miz he. De nyib diuz bauz raez, gyaeugyaeu ndeindei he hawj Yozswz daenj.

⁴ Yiengq doengh daeggo de raen daxboh dwzbez aiq Yozswz, couh aeuqheiq daegnuengx de aeu, mbouj caeuq de doxndei.

⁵ Miz ngwnz he, Yozswz fangxngwnzloq, yiengq de caemh naeuz gyoengq daeggo de ni, naeuz de fangxngwnzloq raen gijmaz. Gyoengqde dingq le, engqgya aeuqheiq de ij rai.

⁶ Mwhde, Yozswz baenzlawz naeuz nej? De naeuz: “Go hax, faenhsou dingqdingq yawj daeggou loqraen gijmaz.

⁷ Gou loqraen gyoengqraeuz cungj caezgya youq ndaw reih cug mienh. Doengh lwg mienh gou hax, geizheih hwx, sawqmwh ndwn hwnjdaeuj, ndwn hwj soh fwdfwd. Doengh lwg faenhsou cug mwnq hax, cungj daeuj gvaengz doengh lwg gou baiqbaiq saxsax.”

⁸ Doengh daeggo de dingq le, cungj lengx de naeuz: “Ciuq mwngz yienghneix naeuz, nanzdauh mwngz cingqcaen ndaej guh goengjvuengz raeuz? Nanzdauh mwngz caen ij guenjciq gyoengqraeuz?” Gyoengqde couh vih de gangj naeuz de fangxngwnzloq raen dih saeh, engqgya haenq de.

⁹ Gajlaeng, Yozswz caiq fangxngwnzloq, de caiq gangj naeuz gyoengq daeggo de ni. De naeuz: “Gou caiq fangxngwnzloq lo. Mbat neix gou loqraen gyangjngoenz, aen ndwen caeuq cib'it aen ndaundeiq cungj daeuj sax gou.”

¹⁰ De gangj naeuz doengh daeggo de ni le, caemh gangj naeuz daxboh de ni. Daxboh de engq gvaiq de naeuz: “Mwngz ndaek gij fangxngwnzloq neix dwg gijmaz loq nex? Nanzdauh gou caeuq meh mwngz, vanzlij miz heij go mwngz cungj ij gvih roengz doem bae sax mwngz maz?”

¹¹ Mbat neix doengh daeggo Yozswz engqgya haenq de, hoeng, daxboh de dauq dawz gij saeh neix geiq youq ndaw sim hwj siengjsiengj yawj dauqdaej dwg gijmaz iqswh.

Yozswz ngaiz hai daengz Ngaihgiz

¹² Doengh daeggo Yozswz bang daxboh gyoengqde bae Siqgiemq coengq yiengz.

¹³ Miz ngoenz he, daxboh de doiq Yozswz naeuz: “Doengh daeggo mwngz mbouj dwg youq Siqgiemq coengq yiengz haz? Mwngz bae yawjyawj gyoengqde veiq.” Yozswz han naeuz: “Ox! Gou majcangq bae.”

¹⁴ Daxboh de caiq naeuz: “Mwngz bae yawjyawj doengh daeggo mwngz caeuq gij yiengz dwg mbouj dwg cungj ndei; miz maz saeh, ma naeuz gou ni.” Daxboh de raengq de ndei le, Yozswz couh dajlwh lueg Hihbwzlwnz bae Siqgiemq, bae baenx geij ngoenz cij ndaej daengz.

¹⁵ Bae daengz Siqgiemq le, de youq rogndoi byaij bae byaij dauq. Miz boux he raen de caenh lujnaeuz loengj roen nwih, couh cam de naeuz: “Mwngz cimh gijmaz lah?”

¹⁶ Yozswz han naeuz: “Gou cimh doengh daeggo gou; mwngz raen gyoengqde goq haz? Hauhnaeuz raen, naeuz gou ni gyoengqde youq mwnqlawz coengq yiengz, ndaej lwi?”

¹⁷ Gajlaeng boux mwnq naeuz: “Gyoengqde gaenq bae lo. Gou dingqri gyoengqde naeuz ij bae Dohdanh.” Yozswz dingq le, couh bae Dohdanh, youq mwnq dieg ciengx yiengz mwnq cimh ndaej raen gyoengq daeggo de.

¹⁸ Yiengq, gyoengq daeggo de daj lizgyae couh yawjraen de lo. Gyoengqde raen le, couh domh de mijyaengz byaij daeuj daengz gaenh gyoengqde, couh doxyuk hwj ij baenzlawz gaj de,

¹⁹ cungj caezgya naeuz: “Hawjm'z yawj hux! Ngauq ak fangxngwnzloq hih daeuj lo.

²⁰ Daeuj bax daeuj bax, daeuj gyoengqraeuz dawz de gajgak bae, vwt roengz aen cingj hawq he bae, yiengq raeuz couh naeuz miz doengh duz nyaen gw de lo. Daengj gyoengqraeuz yawjyawj gij fangxngwnzloq de vanzlij ndaej mbouj ndaej wngq de laem.”

²¹ Yiengq, Lijbenq, couh dwg daeggo daeuz gyoengqde, dingqri doengh daegnuengx de doxyuk hwj ij gaj daegnuengx iq de le, couh siengj gouq de, couh naeuz: “Mbouj ndaej! Gyoengqraeuz mbouj ndaej hoi fawz gaj de.

²² Caenh dawz de gveng roengz ndaw cingj hawq neix bae couh ndaej lo; yienghneix de caemh ciuqyiengh rai.” Daeggo conghbak gan yienghneix naeuz, hoeng ndaw sim de siengj, hauhnaeuz ciuq luj yienghneix nex, ndaej gouq de haemq vaiq, couh ndaej soengq maj hawj daxboh lo.

^23-24 Yozswz ngamqngamq daengz gyoengq daeggo de mwnq, [24a]gyoengqde couh hoemx goqdaeuj gaemh dawz de, [23b]couh doq bok diuz buh raez youh gyaeu youh ndei de, [24b]youhcaiq dawz de gveng roengz ndaek aen cingj mij miz raemx he bae.

²⁵ Gyoengqde dawz de gveng roengzbae le, couh naengh roengzma gw haeux. Sawqmwh yawjraen miz buek Hijsizmajliq vunz canghrih he, gyoengqde aeu lozdoz ma doz sam cungj iengfaex rang fwtfwt ceiq dijbauj he, couh dwg yanghliuq, yeijyangh caeuq mozyoz, dajlwh Gihlez bae daengz Ngaihgiz hai, ngamqngamq luj letlet ij byaij goq gyoengqde mwnq bae.

²⁶ Youzdaq doiq geij boux beixnuengx de naeuz: “Gyoengqraeuz gajhaih nuengx bonjfaenh, siengj muenz saeh hwnjdaeuj, doiq raeuz miz maz ik nex?

²⁷ Mboujyienz dawz de hai hawj gyoengq Hijsizmajliq gyoengq vunz canghrih mwnq. De vanzlij dwg caen daegnuengx raeuz, caeuq raeuz caemh nginz caemh rag hwj; gyoengqraeuz mbouj ndaej hoi fawz haih de!” Youzdaq yienghneix naeuz le, gajlaeng gyoengqde caemh dungziq de dih cawjeiq.

²⁸ Daengj daengz buek dajhai mwnq goq daeuj le, gyoengqde couh dajlwh ndaw cingj hawq rag de hwnjma, couh hai hawj buek vunz Hijsizmajliq mwnq, hai ndaej seiq liengx buenq naek dih ngaenz. Gyoengq vunz mwnq couh daiq Yozswz bae Ngaihgiz lo.

²⁹ Doengh daeggo Yozswz dawz de hai hawj buek canghrih mwnq hih mwhde, Lijbenq mbouj youq henz de. Lijbenq ma daengz henz cingj le, cij rox naeuz Yozswz mbouj raen lo. De mbouj raen Yozswz le, couh gikheiq hwj gag mbek diuz buh bonjfaenh,

³⁰ maj daengz gyoengq nuengx mwnq naeuz: “Yozswz mbouj raen lo! Daegnuengx mbouj raen lo! Gou ij baenzlawz guh, bae mwnqlawz cimh nej? Ij baenzlawz maj naeuz daxboh ni nej?”

³¹ Gajlaeng, gyoengqde gaj duz yiengzdaeg he, dawz diuz buh raez Yozswz iep roengz lwed yiengz bae.

³² Iep ndaej le, couh dawz maj hawj daxboh gyoengqde, naeuz: “Gyoengqraeuz nyaeb ndaej diuz buh raez he. Hawjm'z yawj hux, dwg diuz buh daeglwg mwngz moj?”

³³ Yajgoz yawj le, couh majcangq rox, couh naeuz: “Dwg diuz buh raez daeglwg gou; de gaengjdingq ngaiz nyaen gw lo! Yozswz caen ngaiz nyaen sikyungz liux lo!”

³⁴ De yienghneix naeuz le, cungj siengsim gikheiq hwj ij rai, couh gag mbek gij buh bonjfaenh vaih, couh daenj diuz buhmaz co cabcab coeg yabyab he hwj hauq daeglwg de, daej baenx geij ngoenz.

³⁵ Gajlaeng, gyoengq lwg de cungj daeuj vued de, hoeng de gaenhbaenj mbouj leix gyoengqde, vanzlij doq daej doq naeuz: “Lwg gou rai lo! Gou ij siengsim daengz roengz ndawlaep bae, siengsim daengz cimh ndaej raen lwg gou bae.” Yajgoz vih Yozswz ngaiz rai, siengsim hwj daej haemz daej hoj.

³⁶ Hoeng, mwhneix Yozswz gaenq ngaiz buek vunz canghrih mwnq daiq bae daengz Ngaihgiz, hai hawj goengjvuengz Ngaihgiz dih boux gingjveiqcangj he guh hoiq. Boux gingjveiqcangj neix dwg heuh Bohdizfaz.