Lizsij dih Gaihcij 25 - Gij Baujcingq Moq Caeuq Geij Bonj Gij Baujcingq Daeuzdaeuz

Yaqbwzlahhanj rai gvaqseiq

¹ Yaqbwzlahhanj caiq aeu daixlingh mehyah, gij coh meh de heuh Gihdujlah.

² De seng miz Sinhlanz, Yozsanh, Mijdanq, Mijdenq, Ihswhbah caeuq Cuhyaq.

³ Yozsanh seng Siqbah caeuq Dijdanq; Dijdanq dwg cojgoeng Yaqcuhliq vunz, Liqduhciq vunz caeuq Liquhmij vunz.

⁴ Mijdenq seng miz Hijfaz, Hijfuz, Hahnoz, Yaqbijdaq caeuq Hijlwzdaq. Gwnz neix hih vunz cungj dwg Gihdujlah dih doengh daih gajlaeng.

⁵ Yaqbwzlahhanj dawz sojmiz hih gyahcanj cungj hawj Hijsaj liux.

⁶ Hoeng doenghheij lwg yahnoix de nej, de domh mwh de lij youq, mijyaengz rai mwhde, couh hawj di doxgaiq hawj gyoengqde, caemh hawj gyoengqde buen bae fueng baixdoeng, liz daeglwg de Hijsaj gyae'gyae he bae.

⁷ Yaqbwzlahhanj ndaej souhyienz raixcaix, souh ndaej daengz itbak caetcib haj bi

⁸ cij an'an onjonj rai gvaqseiq.

⁹ Song daeglwg de Hijsaj caeuq Hijsizmajliq dawz de moek youq conghgamj Mwzbijlah. Congh mwnq couh dwg youq gij reih gaenh Manqliq he. Gij reih neix dwg Yaqbwzlahhanj laeng Hijfuzlwnz daeglwg Sojyaz Hwz cuz vunz cawx ma he.

¹⁰ Yaqbwzlahhanj caeuq mehyah de Sajlah cungj dwg moek youq mwnq.

¹¹ Yaqbwzlahhanj rai le, Cangqdiq soengq fuk hawj daeglwg de Hijsaj. Hijsaj youq mwnq gaenh Biqwj-Lahhaijlaiz mwnq youq.

Hijsizmajliq dih doengh daih gajlaeng

¹² Hijsizmajliq dwg daeglwg Yaqgyaz seng hawj Yaqbwzlahhanj he. Yaqgyaz dwg vunz Ngaihgiz, caemh dwg dahhoiq Sajlah.

¹³ Laj neix dwg heij lwg Hijsizmajliq hih coh, dwg ciuq gyoengqde seng gonq seng laeng ma baiz sij youq laj neix, couh dwg Nizbaiqyoz, Gihdaz, Yaqdwzbez, Mijbijsanh,

¹⁴ Mijswhmaj, Duqmaj, Majsaj,

¹⁵ Hahdaq, Dizmaj, Ihduz, Nazfeihswh caeuq Gihdijmaj.

¹⁶ Gwnz neix cungj dwg gyoengq lwg Hijsizmajliq. Gyoengqde youq hih dieg cungj dwg ciuq gyoengqde gak vunz dih coh ma an he, gyoengqde caemh dwg cibngeih aen cuz dih cojgoeng.

¹⁷ Hijsizmajliq souh ndaej itbak samcib caet bi cij rai.

¹⁸ Doengh daih gajlaeng de youq hih deixfueng dwg gaenh Ngaihgiz, dwg youq fueng daj Ngaihgiz bae Yaqsuz dih mwnq Hahfeizlah daengz Cuh'wj he. Gyoengqde caeuq gij beixnuengx de mbouj youq doxdep.

Ranz Hijsaj dih lizsij

¹⁹ Laj neix dwg ranz daeglwg Yaqbwzlahhanj Hijsaj dih lizsij.

²⁰ Hijsaj ndaej seiqcib bi mwhmwnq, aeu Liqbwzgyah ma guh yah. Liqbwzgyah dwg dah lwgsau Bijdujliq. (Bijdujliq dwg youq dieg Bahdanj-Yaqlanz.) Liqbwzgyah caemh dwg dahnuengx Lahbanh; gyoengqde cungj dwg Yaqlanz vunz.

²¹ Liqbwzgyah haq baenx haujlai bi le, cij rox naeuz de dwg maen he. Yiengq, Hijsaj couh vih de hwj gouz Yehhozvaz. Gouz le, Yehhozvaz couh dapwngq de, hawj mehyah de mizndang lo.

²² De daiqndang, engq raek miz suengjseng hwj. Song laeq lwg youq ndaw dungx de doxdik doxdaeb, guh hawj de roxnginh hojyouq, hojyouq ij rai bae. De couh naeuz: “Gou hojyouq ij rai bae; vihmaz yienghneix nex?” Yiengq de couh bae cam Yehhozvaz.

²³ Yehhozvaz han de naeuz: “Song laeq lwg youq ndaw dungx mwngz caemhdangq song aen guek, caemh dwg song aen doxhangz dih minzcuz, ij dajlwh gwnz ndang mwngz ok daeuj. Aen cuz beij aen cuz ak; baezneix boux beix ij swqhaeuh boux nuengx.”

²⁴ Daengz mwh seng de, cingqcaen seng miz doiq suengjseng he.

²⁵ Laeq seng okdaeuj daixdaeuz de baenx ndang cungj hoengz, cix cenz ndang cungj hwnj miz fwn, lujnaeuz daenj diuz buh fwn he nwih. Yiengq, couh an coh hawj de heuh Hijsauj. (‘Hijsauj’ couh dwg ‘miz fwn’ dih iqswh.)

²⁶ Daegnuengx de nej, de caemh gaenhangx seng okdaeuj lo. Gij fawz de gaem dawz giujdin Hijsauj hwj, yiengq couh an coh hawj de heuh Yajgoz. (‘Yajgoz’ couh dwg ‘gaem dawz giujdin’ caeuq ‘ganvad, vaddaeuz’ dih iqswh.) Liqbwzgyah seng song daeglwg neix hih mwhde, Hijsaj ndaej roekcib bi.

Hijsauj hai gij gienz lwgdaeuz de

²⁷ Gajlaeng song laeq lwgngez neix menhmenh hung lo. Hijsauj haenj dwk nyaen, siengzseiz ok rogndoi rognaz bae; hoeng Yajgoz nej, Yajgoz haemq dingh, haenj youq ranz youq.

²⁸ Hijsaj haenj Hijsauj, aenvih de haenj gw Hijsauj dwk ndaej ma dih doengh duz nyaen de; Liqbwzgyah nej, de haemq haenj Yajgoz.

²⁹ Miz ngoenz he, Yajgoz youq ranz cawj duhhoengz dang. Hijsauj dajlwh rogndoi rognaz ma youh baeg youh dungxiek hozhawq.

³⁰ Yiengq de raen le, couh doiq Yajgoz naeuz: “Mwngz hawj gou di gij hoengzhoengz mwnq hax; hawj gou gw veiq! Gou iek hwj ij rai lo!” (Vih yienghneix Hijsauj caemh dwg heuh Hijdungh. ‘Hijdungh’ couh dwg ‘hoengz’ dih iqswh.)

³¹ Yajgoz raen de yienghneix le, couh han naeuz: “Ndaej hah! Hoeng, mwngz sien dawz gij gienz lwgdaeuz mwngz hai hawj gou bax.”

³² Hijsauj doq han naeuz: “Ox, gou cungj iek hwj ij rai lo! Gij gienz lwgdaeuz doiq gou miz maz yungh nex?”

³³ Yajgoz caiq naeuz: “Mwngz sien yiengq gou baujcingq dawz gij gienz lwgdaeuz nyiengh hawj gou gaenq!” Yiengq Hijsauj couh doiq de baujcingq dawz gij gienz lwgdaeuz nyiengh hawj de.

³⁴ Yajgoz couh hawj menqbauh hawj duhhoengz dang hawj Hijsauj gw. De gw le, couh baet hangx deuz lo. Yienghneix couh dwg naeuz Hijsauj gaenhbaenj yawj mbouj dij gij gienz lwgdaeuz de.