Lizsij dih Gaihcij 17 - Gij Baujcingq Moq Caeuq Geij Bonj Gij Baujcingq Daeuzdaeuz

Gozlij guh geiqhauh

¹ Yaqbwzlanz ndaej goujcib gouj bi mwhde, Yehhozvaz yienh hawj de raen, doiq de naeuz: “Gou dwg akak rengzrengz cauh gwnzmbwn caeuq lajdeih sojmiz hih gaiqgaiq cungj ndaej guh daengz dih Cangqdiq. Mwngz ijaeu dingq gou gaen gou, ij guh boux vunz cix soh cix lauxsaed he.

² Yiengq gou couh dingh gij he hawj mwngz, couh dwg hawj doengh daih gajlaeng mwngz fat lailai hwj hwngqhwngq seiqseiq bae.”

³ Yaqbwzlanz dingq daengz dineix le, couh bomz roengz doem bae sax de. Cangqdiq caiq naeuz:

⁴ “Gou dingh hawj mwngz hih couh dwg: Mwngz ndaej guh baenx haujlai haujlai aen minzcuz dih cojgoeng.

⁵ Daj seizneix doxbae, gij coh mwngz mbouj caiq heuh Yaqbwzlanz laem lo; ij gaij coh heuh Yaqbwzlahhanj ndaej lo, aenvih gou gaenq laeb mwngz guh fanh minzcuz dih daxboh lo.”

⁶ Cangqdiq youhcaiq naeuz: “Gou gaengjdingq ij hawj doengh daih gajlaeng mwngz fatdad lailai hwj, hwngqhwngq seiqseiq bienqbaenz haujlai haujlai aen minzcuz. Doengh daih gajlaeng mwngz caemh miz vunz dang vuengz.

⁷ Gou caemh ij yiengq mwngz caeuq doengh daih gajlaeng mwngz baujcingq; gij baujcingq neix dwg cien nienz fanh daih cungj mbouj bienq he, couh dwg gou ij guh Cangqdiq mwngz caeuq Cangqdiq doengh daih gajlaeng mwngz.

⁸ Mwnq dieg mwngz seizneix doz youq he, couh dwg baenx cenz Gyahnamz hih dieg, gou caemh ij nyok hawj mwngz caeuq nyok hawj doengh daih gajlaeng mwngz, hawj faenhsou ndaej yungjyenj aeu ma guh gyadangq; gou caemh dwg Cangqdiq gyoengqde.”

⁹ Cangqdiq youhcaiq doiq Yaqbwzlahhanj naeuz: “Mwngz caeuq doengh daih gajlaeng mwngz ijaeu hengz gou dingh hawj faenhsou hih,

¹⁰ couh dwg faenhsou sojmiz hih vunzsai cungj ij gozlij; gij neix couh dwg gou caeuq mwngz caeuq doengh daih gajlaeng mwngz dingh hih gveihdingq.

¹¹ Faenhsou cungj ij ngaiz gozlij; gij neix couh dwg geiqhauh gou yiengq faenhsou soj baujcingq dih baengzgawq.

¹² Seiqseiq daihdaih sojmiz hih vunzsai, mboujguenj dwg youq ndaw ranz seng hih cixnaeuz dwg aeu ngaenz daj rog cawx ma hih, fanjcingq ngamq seng okdaeuj ndaej daengz daixbet ngoenz hih, cungj ij ngaiz gozlij.

¹³ Youq ndaw ranz seng he caeuq aeu ngaenz cawx ma he cungj ij ngaiz gozlij; yienghneix, couh youq gwnz ndang faenhsou miz geiqhauh, geiqhauh hawj faenhsou seiqseiz ndaejgeiq gou yiengq faenhsou soj baujcingq hih cien nienz fanh daih mbouj bienq hih gij baujcingq mwnq.

¹⁴ Hoeng, gij vunzsai mbouj gozlij hih couh mbouj suenq aen minzcuz mwngz dih vunz. Mbouj danhcij naeuz yienghneix, vanzlij caiq ngaiz boenq deuz, mbouj hawj de dep, aenvih de mbouj soenhsouj gij gveihdingq gou.”

¹⁵ Cangqdiq vanzlij caiq doiq Yaqbwzlahhanj naeuz: “Mwngz mbouj ndaej caiq heuh mehyah mwngz heuh Sajlaiz laem lo; gou ij gaij coh hawj de heuh Sajlah lo.

¹⁶ Gou caemh ij soengq fuk hawj de, hawj de seng daeglwg he hawj mwngz; doengh daih gajlaeng de caemh fat lai hwj bienqbaenz haujlai haujlai aen minzcuz. Doengh daih gajlaeng de caemh miz vunz dang vuengz.”

¹⁷ Dingq daengz neij le, Yaqbwzlahhanj couh bomz roengz doem bae sax de, caemh caegcaeg riu, ndaw sim de gag naemj: “Bak bi hih vunz laux cungj lij ndaej miz lwg haj? Sajlah gaenq ndaej goujcib bi lo, vanzlij ndaej seng lwg haj?”

¹⁸ Yaqbwzlahhanj mbouj sinq, couh doiq Cangqdiq naeuz: “Gou naemj, vanzlij dwg mwngz lai soengq fuk hawj Hijsizmajliq suenq lo.”

¹⁹ Hoeng, Cangqdiq dauq han naeuz: “Mbouj hah! Mehyah mwngz gaengjdingq ndaej seng daeglwg he hawj mwngz; mwngz caemh ij an coh hawj de heuh Hijsaj. Gou caeuq mwngz soj dingh hih, caemh caeuq Hijsaj caeuq doengh daih gajlaeng de yungjyenj dingh roengzbae mbouj bienq.

²⁰ Gangj naeuz Hijsizmajliq, gou caemh dapwngq mwngz, dapwngq mwngz soengq fuk hawj de, hawj de miz cibngeih daeglwg. Cibngeih daeglwg neix caemh dwg ndaej dang vuengz, doengh daih gajlaeng de caemh ndaej fatdad lailai hwj bienqbaenz aen guek hunghung he.

²¹ Hoeng gou naeuz mwngz ni hax, daengz bimoq hih mwhneix, Sajlah gaengjdingq seng Hijsaj hawj mwngz. Gou caeuq mwngz soj dingh hih caemh dwg caeuq Hijsaj dingh hih.”

²² Cangqdiq gangj doenghgij vah neix sat le, couh bae lo.

²³ Couh youq ngoenz mwnq, Yaqbwzlahhanj couh ciuq Cangqdiq raengq hih yienghmwnq bae guh; de hawj daeglwg de Hijsizmajliq caeuq ndaw gyahcuz de sojmiz hih vunzsai, mboujguenj dwg youq ndaw ranz de seng haj cixnaeuz aeu ngaenz cawx ma hih, cungj ij gozlij.

²⁴ Mwh Yaqbwzlahhanj gozlij mwhde, de ndaej goujcib gouj bi.

^25-27 Mwh Hijsizmajliq gozlij mwhde, de ndaej cibsam bi. Couh yienghneix, ndaw ranz Yaqbwzlahhanj sojmiz hih vunzsai, mboujguenj dwg youq ndaw ranz de seng haj cixnaeuz aeu ngaenz cawx ma he hih, [26b]cungj caemh caeuq de doxcaemh ngoenz he gozlij.