Hijfuzsoj Saw 6 - Gij Baujcingq Moq Caeuq Geij Bonj Gij Baujcingq Daeuzdaeuz

Bohmeh caeuq lwg dih gvanhaeh

¹ Caiq gangj daengz guh lwg hih, faenhsou ij wnggai ciuq haeuj bouxcawj raeuz hih vunz yienghmwnq bae dingq bohmeh cij deng,

² aenvih cib diuz fazliz mingqlingq ndaw de dih daixit diuz daiq miz baujcingq hih mingqlingq he couh dwg: Guh lwg hih wnggai yauqgingq bohmeh,

³ yienghmwnq mwngz couh ndaej miz fuk, ndaej souhyienz lo.

⁴ Yiengq gangj daengz guh boh hih, faenhsou songyauq lwg mbouj ndaej raemhraemh raexraex mbouj dingz hih ndaq, mbouj ndaej diudik, mbouj ndaej yex hawj lwg aeuqheiq, dauq ij ciuq bouxcawj raeuz hih baenzlaw son ma gyauqyuz lwg.

Bouxcawj caeuq bouxhoiq dih gveihdingq

⁵ Yiengq caiq gangj daengz guh bouxhoiq hih, faenhsou guh bouxhoiq hih ij wnggai miz aen sim lau caeuq soenhcungq caeuq lauxsaed he bae dingq bouxcawj faenhsou, caemh luj dingq bouxcawj raeuz Gihduz yienghmwnq.

⁶ Gaejyungh vih ij hawj vunz haenh hwj gyajcang guh ndei, dauq ij luj bouxhoiq Gihduz yienghmwnq daj ndaw sim ciuq gij cawjeiq Cangqdiq bae guh,

⁷ caemh dwg nyienh'eiq caensim caen'eiq caenhrengz bae guh bouxhoiq wnggai guh he; ij luj swqhaeuh bouxcawj raeuz Yehsuh Gihduz, mbouj dwg luj swqhaeuh heijvunz.

⁸ Faenhsou wnggai rox, mboujguenj byawz guh gijmaz ndeisaeh, caemh mboujguenj de dwg bouxhoiq haj cixnaeuz dwg boux swqyouz vunz he, bouxcawj raeuz cungj ciuq de soj guh hih ma cangj hawj de.

⁹ Yiengq gangj daengz guh bouxcawj hih nej, faenhsou caemh ij wnggai doiq bouxhoiq ndei, mbouj ndaej haep boux de, aenvih faenhsou caemh rox, gyoengqde caeuq faenhsou doxdoengz cungj dwg doengz caemh bouxcawj he youq gwnzmbwn; bouxcawj neix de doiq bouxboux cungj doxdoengz, mbouj faen hingzcungh.

Cangqdiq nyok hawj dang bing soj yungh he

¹⁰ Ceiqhaeuq gou vanzlij miz vah ij raengq faenhsou: faenhsou wnggai baengh Cangqdiq dih akak rengzrengz hwj guh boux vunz gyenhgyangz he.

¹¹ Daenj ndei daiq ndei dawz ndei Cangqdiq nyok hawj faenhsou dang bing soj yungh hih, guh boux bing Cangqdiq yungjgamj, ndwn ndaej gaenj he, yienghneix couh ndaej dangx goq fangzvuengz sojmiz dih yimhmaeuz,

¹² aenvih caeuq gyoengqraeuz doxhoenx hih dizyinz mbouj dwg miz lwed miz noh hih vunz, dauq dwg caeuq aen seiqgyaiq neix dih miz gienz dang ak ndaej guenjciq hih fangz yak caeuq gwnzmbwn doenghheij gaem gienz hih fangz yak doxhoenx lah.

¹³ Sojhij ij dawz ij daiq ij daenj ndei Cangqdiq soj nyok hawj hih, guh ndei boux bing Cangqdiq yungjgamj he hwj ndaej youq mwh veizyiemj he ndaej dangx dizyinz, ndaej caeuq de hoenx daengxdaej, caemh ndwn ndaej gaenj.

¹⁴ Couh dwg naeuz faenhsou ij dawz saedsaeh ma dangq guh diuz sai gyaeb rwet he, ij guh saeh guh ndaej cingq ndwn ndaej cingq ma dangq guh baj doenqbaiz dangj aek he,

¹⁵ caemh ij dawz aen sim cenz gij ndei siuhsiz bingzan ma dangq guh doiq haiz daenj he.

¹⁶ Mbouj danhcij yienghneix, faenhsou caemh vanzlij ij dawz doiq Gihduz dih sinqsim ma dangq guh baj doenqbaiz ma dangx ma maet Sajdanq fangzvuengz ngingz goqdaeuj dih naq dawz feiz,

¹⁷ caemh vanzlij ij dawz Cangqdiq gouq vunz dih gij saedsaeh neix ma dangq guh aen mauhhang ndaej daenj raeuj ndaej baujhuq raeuj he, dawz gij vah Cangqdiq ma dangq guh fag giemq Hoenzsaenz Cangqdiq he dawz youq ndaw fawz.

¹⁸ Faenhsou caemh ij siengzseiz baengh Hoenzsaenz Cangqdiq hwj lailai gouzhaenh Cangqdiq, siengzseiz daezsingj mbouj doeknaiq hwj bang gij vunz Cangqdiq gouzhaenh Cangqdiq.

¹⁹ Linghvaih vanzlij miz: gou vanzlij ij cingj faenhsou bang gou gouz Cangqdiq, gouz de nyok hawj gou hab gangj hih vah hawj gou ndaej mbeihung mbouj lau hwj ndaej dawz gij miqmiz ndei siuhsiz Cangqdiq cenzgangj naeuz vunz ni cingsuj.

²⁰ Ox, gou naeuz sou ni, gou couh dwg Cangqdiq baij daeuj hih daiqbiuj, vih ij cenz gij miqmiz ndei siuhsiz neix hwj ngaiz vunz suj lienh hwnjdaeuj lo. Sojhij engq wnggai mbeihung mbouj lau hwj cenzgangj gij ndei siuhsiz neix, engqgya cingj faenhsou bang gou gouz Cangqdiq, gouz de nyok hawj gou ndaej mbeihung hwj cenzgangj gij ndei siuhsiz neix.

Hoh fuk

²¹ Ceiqhaeuq, gangj daengz gou, vih ij hawj faenhsou rox gou youq duenh neix dih cingzgvangq, Deihgihguj boux beixnuengx neix, de gaengjdingq dawz gou sojmiz hih saeh gangj naeuz sou ni liux hih. Deihgihguj de dwg boux beixnuengx vunz haenj he, dwg boux lauxsaed sinq ndaej goq hih guh gij hong bouxcawj raeuz he.

²² Gou baij de bae faenhsou mwnq, muzdiz dwg ij hawj faenhsou rox gyoengqraeuz dineix dih cingzgvangq, caemh hawj de nai faenhsou, gujliq faenhsou.

²³ Cinhngaiq dih gak boux beixnuengx hax, muengh faenhsou bingzan! Muengh Cangqdiq Bohmbwn caeuq bouxcawj raeuz Yehsuh Gihduz nyok hawj faenhsou aiqsim caeuq sinqsim.

²⁴ Muengh Cangqdiq doiq faenhsou doenghheij yungjyenj aiq bouxcawj raeuz Yehsuh Gihduz hih vunz haijliengh!