Hijfuzsoj Saw 5 - Gij Baujcingq Moq Caeuq Geij Bonj Gij Baujcingq Daeuzdaeuz

Guh boux hab gij vunz Cangqdiq he

¹ Faenhsou dwg Cangqdiq soj aiq hih lwg, sojhij faenhsou wnggai hag de.

² Doiq vunz guh saeh caemh ij miz aen sim aiq vunz he, cingq luj Gihduz aiq raeuz yienghmwnq; de sijndaej diuz mingh bonjfaenh, aeu ma guh gij rang fwtfwt he hwj bwiz Cangqdiq.

³ Hoeng, doenghgij ndaengndwet, doenghgij hawj vunz roxnginh saetnaj saetnyaenq, damsim hih, faenhsou cungj mbouj ndaej guh; mbouj danhcij naeuz mbouj ndaej guh, daiqlienz gij saeh hawj vunz ngeiz he faenhsou cungj mbouj ndaej guh. Yienghneix cij hab ndaej guh gij vunz Cangqdiq.

⁴ Doenghgij vah ndwet, vah ngawz, vah lengxriu he cungj mbouj ndaej gangj, dauq ij gangj gij vah docih Cangqdiq he,

⁵ aenvih faenhsou cingqcaen rox, guh doenghgij ndaengndwet, doenghgij hawj vunz roxnginh saetnaj saetnyaenq, damsim he (damsim couh dangq dwg baiq you) gaengjdingq mbouj ndaej guh gij vunz Gihduz caeuq guh gij vunz Cangqdiq.

⁶ Gaejyungh ngaiz doenghheij gangj vah rumz vah rengx he yaeuh; Cangqdiq cingq vih doenghgij saeh neix hwj aeuqheiq doenghheij vunz mbouj dingq de he.

⁷ Sojhij, faenhsou mbouj ndaej caeuq doenghheij vunz neix guh doih.

⁸ Doenghbaez faenhsou simndaem, mbouj rox bouxcawj raeuz, hoeng, seizneix faenhsou sinq bouxcawj raeuz; bouxcawj raeuz couh ciuq rongh aen sim faenhsou. Yiengq faenhsou guh saeh doiq vunz couh ij wnggai boiqndaej youq ndaw lwgra bouxcawj raeuz dwg rongh he cij deng.

⁹ (Couh dwg naeuz rongh ndaej hawj vunz miz aen sim soh he, ndaej hawj vunz ndwn ndaej cingq, ndaej hawj vunz lauxsaed.)

¹⁰ Faenhsou caemh wnggai rox faenbied gijmaz dwg bouxcawj raeuz haenjheiq he.

¹¹ Doenghheij mij'z ik, doegsieb, simndaem he, faenhsou mbouj ndaej gaepfaenh haeuj bae; mbouj danhcij naeuz mbouj ndaej gaepfaenh haeuj bae, vanzlij ij byoq gij de okdaeuj,

¹² aenvih gyoengqde youq boihlaeng soj guh hih, daiqlienz dwen daengz cungj raen roxnginh saetnyaenq.

¹³ Mboujguenj gijmaz, ngaiz ciuq rongh le cungj dwg loh okdaeuj liux lo, aenvih sojmiz ndaej yienh okdaeuj hih couh dwg rongh.

¹⁴ Sojhij couh miz naeuz: “Ninz ralaep hih vunz, singj hwnjdaeuj bax! Vaiqvaiq daj rai dauqlix bax! Gihduz ij ciuq rongh hawj mwngz lo.”

¹⁵ Sojhij faenhsou doiq vunz guh saeh cungj ijaeu siujsim; mbouj ndaej luj vunz ngawz yienghmwnq, dauq ij luj vunz coengjmingz yienghmwnq,

¹⁶ ij cagaenj cizgyenh, mbouj ndaej langqfeiq, aenvih seiqgan seizneix daiq doegsieb lai lo.

¹⁷ Couh vih yienghneix, faenhsou caemh mbouj ndaej guh vunz mazmwnh, dauq ij guh vunz rox gij cawjeiq Cangqdiq he.

¹⁸ Faenhsou caemh mbouj ndaej gw laeuj fiz—gw laeuj fiz hawj vunz bienq ya mbouj rox nyaenq—dauq ij hawj Hoenzsaenz Cangqdiq doz youq gwnz ndang faenhsou hwj rim bae.

¹⁹ Faenhsou wnggai caensim ciengq gij go ndaw Singqgingh, gij go haenh Cangqdiq caeuq ciengq Hoenzsaenz Cangqdiq hawj raeuz angq hwj haenh hih gij go he ma doxgujliq.

²⁰ Mboujguenj guxmaz, faenhsou cungj ij hij gij mingzhiq bouxcawj raeuz Yehsuh Gihduz ma docih Cangqdiq, Bohmbwn raeuz.

²¹ Vanzlij miz, faenhsou caemh ij wnggai miz aen sim yawjnaek Gihduz he hwj doxdingq, doxnyiengh.

Gvanjbaz dih gveihdingq

²² Gangj daengz guh mehyah, guh mehyah hih ijaeu dingq goeng gojyez bonjfaenh, caemh luj dingq Yehsuh bouxcawj raeuz yienghmwnq,

²³ aenvih goengjgvan dwg mehyah hih raeuj, caemh luj Gihduz dwg gyauqveiq hih raeuj. Gyauqveiq dwg aen ndang Gihduz; Gihduz dwg bouxcawj gouq aen ndang neix he.

²⁴ Sojhij, cingq luj gyauqveiq baenzlaw dingq Gihduz, guh mehyah hih mboujguenj guxmaz saeh caemh ij dingq goengjgvan.

²⁵ Gangj daengz guh goengjgvan hih, faenhsou caemh ij wnggai aiq mehyah bonjfaenh, caemh ij luj Gihduz aiq gyauqveiq yienghmwnq sijndaej diuz mingh bonjfaenh.

²⁶ Gihduz de yienghneix guh dwg ij dunghgoq gij vah de hwj hawj gyauqveiq ndaej youq ndaw lwgra Cangqdiq bienqbaenz hab'eiq habhoz bonjfaenh de he, couh luj aeu raemx ma swiq cengh gyauqveiq yienghmwnq,

²⁷ mij saek di uq, wenq upup ngaeuz nguebngueb, mij gijmaz ndaej diudik he hab'eiq habhoz de he dih gyauqveiq gvi hawj bonjfaenh de.

²⁸ Guh goengjgvan hih ij wnggai aiq mehyah bonjfaenh, caemh luj aiq aen ndang bonjfaenh yienghmwnq. Aiq yah couh dangq aiq bonjfaenh,

²⁹ aenvih coengzlaiz mij'z vunz gag dwgcaengz aen ndang bonjfaenh, cungj dwg ij baujyangj ndei, cauqguq ndei, cingq luj Gihduz doiq gyauqveiq yienghmwnq.

³⁰ De aiq gyauqveiq luj aiq aen ndang bonjfaenh hih ndok hah noh hah, hoeng, gyoengqraeuz cingq dwg gwnz ndang de hih gak mwnq ndok caeuq noh he,

³¹ cingq luj ndaw Singqgingh ndaw de sij naeuz: Couh vih yienghneix, vunzsai ij biek boh biek meh, caeuq yah doxcaeuq youq; song boux ij gaep guh luj aen ndang he.

³² Gou naeuz hax, gij neix saedsaeh dwg miz iqhiq, hawj vunz hoj rox hih; gou yienghneix naeuz dwg ceij Gihduz caeuq gyauqveiq naeuz hih.

³³ Gij neix gannaeuz mbouj yungzheih rox lah, hoeng, mboujguenj baenzlawz, faenhsou moix it boux guh goengjgvan hih cungj ij aiq yah, ij luj aiq bonjfaenh yienghmwnq aiq yah; guh mehyah hih caemh ij soenhcungq goengjgvan bonjfaenh.