Hijfuzsoj Saw 4 - Gij Baujcingq Moq Caeuq Geij Bonj Gij Baujcingq Daeuzdaeuz

Doengz caemh aen ndang he

¹ Gou vih swqhaeuh bouxcawj raeuz hwj ngaiz gyaeng hwnjdaeuj he, sojhij gou gienq faenhsou: giqyienz Cangqdiq senj faenhsou, faenhsou couh ij guh gij hab'eiq habhoz Cangqdiq he.

² Mbouj ndaej gag naemqnaeuz bonjfaenh ak raixcaix he, ij soh semxsemh, ij naenxsim, ij rox doxnyiengh doxaiq,

³ ij doxhuz doxlaizvangj, ij miz sim baux ndei Hoenzsaenz Cangqdiq nyok hawj hih doxhuz luj aen ndang he,

⁴ aenvih aen ndang, caenhgag miz aen ndang dog, Hoenzsaenz, caenhgag miz Hoenzsaenz dog, cingq luj Cangqdiq senj faenhsou daeuj hawj faenhsou ndaej doxdoengz muengh cungj he.

⁵ Gyoengqraeuz caenhgag miz bouxcawj dog, caemh dwg caenhgag sinq cungj he, caemh caenhgag sijlij cungj he.

⁶ Gyoengqraeuz caemh caenhgag miz boux Cangqdiq dog, de couh dwg daxboh lajmbwn sojmiz hih vunz he, de dungjguenj sojmiz hih, yungh sojmiz hih, dauqcawq cungj youq hih.

⁷ Hoeng, mbouj dwg naeuz yienghneix, faenhsou gangj vah guh saeh cungj ij dwg doxdoengz, aenvih gyoengqraeuz bouxboux cungj dwg ciuq Gihduz soj gyezdingq hih ndaej mbouj doengz hih caiz hih.

⁸ Sojhij, cingq luj ndaw Singqgingh ndaw de soj sij naeuz hih: De swng hwnjbae hih mwhde, gam baenx gyoengq vunz hwnj bae, dawz gak cungj caiz dij he nyok hawj vunz.

⁹ Yiengq, giqyienz naeuz de swng hwnjbae vwz, de gaengjdingq gaenq sien roengz lajmbwn daeuj lo.

¹⁰ Roengz lajmbwn daeuj hih couh dwg swng hwnj mbwn bae hih boux mwnq lo; de yienghneix guh dwg vih de ndaej youq gwnzmbwn lajdeih guenj liuxliux.

¹¹ De nyok hawj vunz hih caiz mbouj doxdoengz: miz hih ndaej guh dwzbaijyienz, miz hih ndaej guh boux boux cenz gij vah Cangqdiq he, miz hih ndaej guh boux cenzgangj gij ndei siuhsiz de he, vanzlij miz hih ndaej guh boux gyauqveiq lingjdauj caeuq guh lauxsae son gij saedsaeh de he;

¹² muzdiz dwg ij cwnjbiq gij vunz de, hawj gij vunz de ndaej guh gij hong de, ndaej hawj gyauqveiq yied ngoenz yied giengz.

¹³ Yienghneix daengj daengz gyoengqraeuz daixgya cungj ndaej rox daeglwg Cangqdiq, ndaej rox gij saedsaeh Cangqdiq, ndaej doxhuz doxgaep guh aen gyauqveiq he hwj ndaej guh hab'eiq habhoz Cangqdiq hih vunz, ndaej luj Gihduz yienghmwnq mij maz ndaej diudik he.

¹⁴ Daengz mwhmwnq, gyoengqraeuz couh mbouj caiq luj lwgngez yienghmwnq mbouj rox faenbied gijmaz hwj dingq daengz doenghgij vunz gyaujvaz he sauqyauz gijmaz couh sinq gijmaz he lo, caemh mbouj caiq sim mbouj dingh hwj luj vunz youq ndaw bohlangq yienghmwnq rumz ci hwj fan foedfoed bae lo.

¹⁵ Dauqfanj, gyoengqraeuz ij wnggai miz aen sim aiq vunz he hwj gangj lauxsaed vah he; mboujguenj guh gijmaz, cungj ij yied guh yied ndei hwj ndaej luj Gihduz, gyauqveiq dih daeuzdaeuz.

¹⁶ Gihduz dwg ndaek raeuj gyauqveiq; gyauqveiq dwg aen ndang Gihduz. Aen ndang neix dwg baengh gak mwnq gvanhcez gak diuz nginz doxciep hwnjdaeuj baenz aen ndang he, gag mwnq gag miz de dih yunghfap, sojmiz hih cungj ndaej bang aen ndang neix maj hung hwnjdaeuj, hawj baenx aen ndang cungj yienh ok miz aiq he.

Mbouj rox Cangqdiq caeuq rox Cangqdiq

¹⁷ Sojhij gou hij bouxcawj raeuz dih mingzhiq ma saedsaeh naeuz sou ni, faenhsou goq saedceij mbouj ndaej caiq luj doenghheij mij rox Cangqdiq mij nginh Cangqdiq hih yienghmwnq naemqnaeuz bonjfaenh cungj rox raixcaix he lo.

¹⁸ Doenghheij vunz naemqnaeuz bonjfaenh cungj rox raixcaix he, gizsaed gyoengqde gijmaz cungj mbouj rox, aenvih gyoengqde simgyeng, sojhij Cangqdiq nyok hawj vunz miz mingh hih, gyoengqde mij'z faenh.

¹⁹ Aen sim gyoengqde mazmwnh, siengj guh gijmaz couh guh gijmaz, cij rox guh doenghgij ndaengndwet hawj vunz gangj mbouj ndaej ok bak he.

²⁰ Hoeng, faenhsou dajlaeng Gihduz soj hag hih dauq mbouj dwg yienghneix.

²¹ Hauhnaeuz faenhsou dingq goq gvanhhih Gihduz hih, caemh hag de soj son hih saedsaeh (de couh dwg saedsaeh),

²² couh ij duet ok gaxgonq faenhsou mij rox mij nginh Cangqdiq soj guh hih, aenvih mij rox Cangqdiq mij nginh Cangqdiq hih vunz dwg vih bonjfaenh dih siengjmuengh siengj guh gijmaz couh guh gijmaz hwj menhmenh bienq vaih hih.

²³ Faenhsou ij gaij gij singqcingz faenhsou,

²⁴ caemh ij guh vunz moq, luj daenj buh moq; boux vunz moq neix dwg Cangqdiq ciuq gij saeksiengq bonjfaenh de ma cauh he, hawj boux de youq ndaw lwgra de suenq dwg boux mij'z coih he, ndaej ciuq gij saedsaeh de ma guh gij vunz de he.

²⁵ Sojhij, faenhsou mbouj ndaej gangj gyajvah; daixgya cungj ij gangj lauxsaed vah, aenvih gyoengqraeuz cungj dwg doxgaep hwnjdaeuj guhbaenz aen ndang he.

²⁶ Hauhnaeuz faenhsou aeuqheiq nex, mbouj ndaej vih aeuqheiq hwj famh coih, caemh mbouj ndaej aeuqheiq baenxngoenz,

²⁷ mienxndaej hawj fangzvuengz miz gihveiq iu faenhsou famh coih.

²⁸ Gaxgonq guxcaeg hih, seizneix mbouj wnggai caiq guxcaeg haem lo; wnggai gauq baj fawz bonjfaenh guh cingqdangq miz yungh hih saeh, yienghneix couh ndaej miz lai hwj ndaej bang vunz lo.

²⁹ Mbouj ndaej gangj gij vah ya'mboujlw he; wnggai gangj gij vah ndaej bang vunz doiq vunz miz ik he.

³⁰ Mbouj ndaej hawj Hoenzsaenz Cangqdiq siengsim, aenvih gij Hoenzsaenz neix dwg cingqmingz faenhsou dwg gvi haeuj Cangqdiq he; Cangqdiq nyok Hoenzsaenz hawj faenhsou, couh dwg cingqmingz Cangqdiq ij youq hab hih mwhde cueg faenhsou he.

³¹ Mbouj ndaej simdoeg, dwgcaengz, aeuqheiq, doxnauh, bangjlaih caeuq sojmiz doegdoeg siebsieb he,

³² dauq ij doxswnh semxsemx, doxhojsik, doxnyiuz, cingq luj Cangqdiq vih Gihduz hwj nyiuz faenhsou yienghmwnq.