Hijfuzsoj Saw 3 - Gij Baujcingq Moq Caeuq Geij Bonj Gij Baujcingq Daeuzdaeuz

Baujloz cenz ndei siuhsiz naeuz gij vunz linghvaih minzcuz he ni

¹ Couh vih yienghneix, gou Baujloz, vih cenz Yehsuh Gihduz dih ndei siuhsiz hawj faenhsou doenghheij linghvaih minzcuz he hwj ngaiz gyaeng hwnjdaeuj.

² Gou naemj faenhsou gaengjdingq rox, Cangqdiq vih faenhsou hwj, de dunghgoq gou daeuj hawj faenhsou rox de doiq faenhsou haijliengh.

³ De naeuz gou ni, hawj gou rox de dih giqvaq miqmiz; gou gwnz neix gaenq sij di he dwen naeuz sou ni lo.

⁴ Faenhsou yawj le, couh rox gou baenzlaw lijgaij Gihduz dih giqvaq miqmiz lo.

⁵ Doenghbaez Cangqdiq mij hawj saek boux rox gij giqvaq miqmiz neix goq, hoeng, seizneix de dunghgoq Hoenzsaenz bonjfaenh de hwj yienh hawj gij dwzbaijyienz de caeuq boux cenz gij vah de rox.

⁶ Gij giqvaq miqmiz neix couh dwg sinq gij ndei siuhsiz Cangqdiq hih linghvaih minzcuz hih vunz caeuq Youzdaiq vunz cungj ndaej doxdoengz ndaej guh gij lwg Cangqdiq, mbouj faen mwngz faen gou, caemh luj aen ndang he, dunghgoq Yehsuh Gihduz hwj ndaej ciep aeu Cangqdiq soj baujcingq he.

⁷ Aenvih Cangqdiq doiq gou haijliengh, de dunghgoq bonjfaenh de dih akak rengzrengz hwj hawj gou ndaej guh bouxhoiq cenz gij ndei siuhsiz de.

⁸ Gannaeuz gou youq ndaw gij vunz Cangqdiq ndaw de dwg boux ceiq yaqyuij ceiq yawj mbouj hwnj rwz he lah, hoeng, gou gingqyienz ndaej daengz de dih aiq, ndaej gij gienz neix, hawj gou ndaej naeuz linghvaih minzcuz hih vunz ni gvanhhih Gihduz hih hawj vunz liuh mbouj daengz hih baenxlai dijbauj hih,

⁹ caeuq hawj sojmiz hih vunz cungj rox Cangqdiq baenzlawz hengz gij giqvaq miqmiz bonjfaenh de. Gij giqvaq neix, daj doenghbaez cauh gwnzmbwn lajdeih sojmiz hih, Cangqdiq cix dawz gij giqvaq miqmiz neix yo hwnjdaeuj mbouj yienh hawj vunz rox he,

¹⁰ muzdiz dwg ij dunghgoq seizneix hih gyauqveiq, hawj doenghheij youq gwnzmbwn gaem gienz dang ak hih rox Cangqdiq baenxlai coengjmingz.

¹¹ Cangqdiq dwg ciuq gij cawjeiq bonjfaenh de yungjyenj mbouj rox bienq he ma yienghneix giqvaq hih; gij giqvaq neix dwg dingh ndei ij dunghgoq bouxcawj raeuz Yehsuh Gihduz ma yienh okdaeuj hih.

¹² Gyoengqraeuz dwg dunghgoq sinq Yehsuh Gihduz, baengh Yehsuh Gihduz hwj mbouj you mbouj heiq hih bae daengz Cangqdiq mwnq.

¹³ Sojhij, gou gouz faenhsou gaejyungh vih gou vih faenhsou ngaiz souh nanh hwj doeknaiq, dauq ij vih gou souh nanh hwj roxnginh najrongh cij deng.

Baujloz miz sim gouzhaenh Cangqdiq

^14-15 Sojhij gou gvih roengzbae bang faenhsou gouz [15]cauh gwnzmbwn lajdeih gak gya gak cuz dih [14b]Cangqdiq Bohmbwn.

¹⁶ Gou gouz de, muengh de yungh gij rongh sagsag yungjyenj veijdaq de dunghgoq Hoenzsaenz bonjfaenh de hawj faenhsou miz rengz hwj hawj faenhsou gyenhdingq hwnjdaeuj.

¹⁷ Gou muengh Gihduz vih faenhsou sinq de hwj caeuq faenhsou youq, hawj faenhsou miz aiq luj miz rag yienghmwnq youq ndaw sim faenhsou gaenj dwtdwt,

¹⁸ hawj faenhsou ndaej caeuq sojmiz gij vunz Cangqdiq cungj ndaej rox Gihduz dih aiq dwg baenxlai dih haijliengh, baenxlai dih veijdaq,

¹⁹ hawj faenhsou ndaej rox Gihduz dih aiq cauhgoq vunz ndaej rox hih vanzlij veijdaq, yienghneix couh ndaej hawj gij singqheiq faenhsou ndaej luj gij singqheiq Cangqdiq liuxliux.

²⁰ Muengh boux miz bonjsaeh cauhgoq gyoengqraeuz soj siengj soj gouz hih yienh youq laeng gyoengqraeuz dih Cangqdiq,

²¹ muengh de youq gyauqveiq youq Yehsuh Gihduz mwnq seiqseiq daihdaih yungjyungj yenjyenj najrongh! Ahmaenz.