Hijfuzsoj Saw 1 - Gij Baujcingq Moq Caeuq Geij Bonj Gij Baujcingq Daeuzdaeuz

¹ Gou dwg Baujloz, dwg ciuq gij cawjeiq Cangqdiq daeuj guh boux dwzbaijyienz Yehsuh Gihduz he. Gou sij saenq hawj youq Hijfuzsoj Singz hih gij vunz Cangqdiq, couh dwg doenghheij vunz lauxlaux saedsaed gaen Yehsuh Gihduz mbouj bienq sim he.

² Muengh Cangqdiq Bohmbwn caeuq bouxcawj raeuz Yehsuh Gihduz doiq faenhsou haijliengh, hawj faenhsou bingzan!

Cangqdiq soj nyok hawj hih fuk

³ Docih bouxcawj raeuz Yehsuh Gihduz dih Cangqdiq daxboh; de dunghgoq Yehsuh Gihduz hwj dawz gwnzmbwn gak yiengh hih fuk nyok hawj gyoengqraeuz.

⁴ De simqciq youq mijyaengz cauh mbwn cauh deih cihsenz cix aiq gyoengqraeuz cix dunghgoq Yehsuh Gihduz hwj senj gyoengqraeuz, hawj gyoengqraeuz ndaej youq ndaw lwgra de bienqbaenz boux mij'z coih he, mij gijmaz ndaej diudik he.

⁵ Caiq aenvih de aiq gyoengqraeuz, couh ciuq gij cawjeiq bonjfaenh de haenjheiq he hwj senqsi cix dingh ndei ij dunghgoq Yehsuh Gihduz hwj hawj gyoengqraeuz ndaej gvi hawj de, guh gij lwg de.

⁶ De yienghneix dunghgoq de ceiq aiq dih daeglwg dog de hwj begbeg nyok aiq hawj gyoengqraeuz, hawj gyoengqraeuz haenh de, haenh de haijliengh raixcaix.

⁷ De baenxlai aiq baenxlai haijliengh, simqciq sijndaej daeglwg dog de vih cueg gij coih gyoengqraeuz hwj riuz lwed.

⁸ De yienghneix doiq gyoengqraeuz, cungj dwg de ciuq bonjfaenh de dih cawjeiq, yungh gij coengjmingz de

⁹ ma hawj gyoengqraeuz rox de gaenq senqsi cix ij dunghgoq Yehsuh Gihduz bae guh gij vunz ngeix mbouj daengz he.

¹⁰ Gij cawjeiq de dwg ciuq de dih giqvaq hih: daengj daengz de soj dingh hih mwhde baex daengz he, gwnzmbwn lajdeih sojmiz hih cungj gvi hawj bouxcawj raeuz Yehsuh Gihduz liux, youz de guenjleix.

¹¹ Gyoengqraeuz caemh ndaej baengh Yehsuh Gihduz hwj ndaej guh gij lwg de; gij neix cungj dwg boux ciuq gij cawjeiq bonjfaenh de soj giqvaq he ma guh sojmiz hih saeh he dih Cangqdiq he senqsi cix dingh ndei giqvaq he.

¹² Gij cawjeiq de dwg ij hawj gyoengqraeuz doenghheij sien sinq Gihduz hwj ndaej miz muengh hih vunz haenh Cangqdiq najrongh.

¹³ Seizneix faenhsou linghvaih minzcuz hih vunz caemh ndaej dingq daengz gij saedsaeh Cangqdiq lo, couh dwg gij ndei siuhsiz Cangqdiq hawj faenhsou ndaej gouq he ndaej hawj faenhsou sinq Gihduz he. Yiengq, giqyienz faenhsou sinq Gihduz lo, Cangqdiq couh dawz bonjfaenh de soj baujcingq hih Hoenzsaenz de nyok hawj faenhsou, couh luj youq gwnz ndang faenhsou gaiqcangh guh geiqhauh, cingqmingz de gaenq cueg faenhsou ma gvi hawj de he lo.

¹⁴ Gij Hoenzsaenz neix dwg Cangqdiq baujcingq baezneix hawj gij vunz de hih baengzgawq, daengj daengz mwh gij vunz de ndaej cueg okma hih mwhde cij hawj. De yienghneix guh dwg ij hawj gij vunz de haenh de najrongh.

Baujloz gouzhaenh Cangqdiq

¹⁵ Daj gou rox daengz faenhsou doiq bouxcawj raeuz Yehsuh Gihduz dih sinqsim gyenhdingq caeuq doiq gij vunz Cangqdiq miz aiqsim le,

¹⁶ gou couh vih faenhsou hwj mbouj dingz hih haenh Cangqdiq, gouzhaenh de hih mwhde siengzseiz dwen daengz faenhsou,

¹⁷ gouz bouxcawj raeuz Yehsuh Gihduz dih Cangqdiq, najrongh dih Bohmbwn, soengq gij Hoenzsaenz hawj faenhsou ndaej coengjmingz caeuq ndaej miz ciqsiz he hwj hawj faenhsou ndaej engqgya rox de.

¹⁸ Caemh gouz Cangqdiq hawj aen sim faenhsou singqsag hwnjdaeuj, hawj faenhsou ndaej rox de senjdingh faenhsou daeuj dwg baenxlai miz muengh hih, de soj baujcingq hawj gij vunz de hih dwg miz geijlai dih fungcuk hih.

¹⁹ Gou caemh gouz de hawj faenhsou ndaej rox daengz de doiq gyoengqraeuz doenghheij sinq de hih vunz soj guh hih baenxlai veijdaq baenxlai rengz. Gij rengz gij veijdaq neix

²⁰ ndaej hawj Gihduz daj rai ndaej dauqlix, vanzlij ndaej hawj Gihduz ndaej youq gwnzmbwn naengh youq baixgvaz de

²¹ hawj Gihduz ndaej ak goq sojmiz hih, ndaej guenj gienz cix ndaej, rengz cix ndaej, mboujguenj byawz cix ndaej, mboujguenj seizneix cix ndaej, baezneix cix ndaej, hawj de dungjdungj ak goq daengxheij.

²² Cangqdiq vanzlij hawj sojmiz hih cungj gvi hawj de, hawj de dungjguenj, hawj de guh gyauqveiq hih daeuzdaeuz.

²³ Gyauqveiq dwg aen ndang de; baenx aen gyauqveiq cungj dwg de guenj, luj de youq gwnzmbwn lajdeih yienghmwnq guenj liuxliux.