Gohlozsih Saw 3 - Gij Baujcingq Moq Caeuq Geij Bonj Gij Baujcingq Daeuzdaeuz

Goq saen hih saenghhoz

¹ Yiengq faenhsou giqyienz gaenq caeuq Gihduz itheij dauqlix lo, faenhsou couh wnggai yawjnaek gwnzmbwn, aenvih gwnzmbwn miz Gihduz naengh youq baixgvaz Cangqdiq hwj.

² Faenhsou caemh ij wnggai lai ngeix gwnzmbwn, sim yiengq gwnzmbwn; gaejyungh cij rox ngeix daengz aen seiqgyaiq neix hih saeh,

³ aenvih haeuj aen seiqgyaiq neix hih faenhsou hih mingh gaenq rai lo. Faenhsou sinq Gihduz le, saen hih mingh gaenq caeuq Gihduz itheij yo youq Cangqdiq mwnq lo.

⁴ Daengj daengz hawj faenhsou mingh hih Gihduz yienh okdaeuj hih mwhde, faenhsou caemh ndaej caeuq de yienh ndaej najrongh lo.

⁵ Sojhij, faenhsou bietdingh ij cawz youq gwnz ndang faenhsou haeuj aen seiqgyaiq neix hih guh ndaeng guh ndwet, yalw, siengj gij doegsieb he, caeuq damsim he (damsim couh dangq dwg baiq you),

⁶ aenvih luj doenghgij saeh neix couh ngaiz yinxhwnj Cangqdiq aeuqheiq caeuq fad doenghheij vunz mbouj dingq de he lo.

⁷ Doenghbaez faenhsou saenghhoz youq aen seiqgyaiq neix caemh guh goq doenghheij saeh neix,

⁸ hoeng, seizneix dwg daengz mwh he lo; faenhsou mbouj ndaej caiq guh doenghgij saeh neix caeuq muengh doenghgij saeh neix haem lo. Dauqfanj faenhsou ij dawz doenghheij aeuqheiq, dwgcaengz, doegsieb, bangjlaih, vah doeg vah sieb vah ndaengndwet vwt bae.

⁹ Faenhsou caemh mbouj ndaej doxyaeuh, aenvih faenhsou gaenq duet ok yienzlaiz hih lo,

¹⁰ gaenq guh boux vunz moq he luj daenj buh moq yienghmwnq lo. Boux vunz moq neix yied ndaej gaijbienq luj boux cauh de he, couh yied rox boux cauh de he.

¹¹ Ndaej guh boux vunz moq ndaej miz saen hih mingh hih gaenhbaenj mbouj faen Hihlaz vunz haj Youzdaiq vunz, gozlij vunz haj mbouj gozlij vunz, nga'ngangq mbouj miz vaenzvaq haj miz vaenzvaq vunz, bouxhoiq haj boux swqyouz vunz, aenvih Gihduz cauhgoq sojmiz hih; gyoengqde cungj dwg doxdoengz miz Gihduz, Gihduz cungj dwg caeuq gyoengqde youq.

¹² Cangqdiq aiq faenhsou senj faenhsou daeuj guh gij vunz hab'eiq habhoz de, sojhij faenhsou wnggai miz aen sim hojsik vunz he, sim'unq mbouj gyauhngauq, soh semxsemh cix naenxsim he.

¹³ Caemh ij rox doxnyiengh doxnyiuz, nyiuz gij vunz daekcoih faenhsou he; bouxcawj raeuz baenzlawz nyiuz faenhsou, faenhsou caemh ij baenzlaw nyiuz vunz.

¹⁴ Cawzok doenghgij neix, ceiq cungqyauq hih vanzlij dwg faenhsou ij miz aen sim aiq vunz he, aenvih aiq ndaej hawj vunz doxhuz doxndei raixcaix.

¹⁵ Vanzlij miz, faenhsou ij hawj gij bingzan Gihduz nyok hawj faenhsou he guenjleix aen sim faenhsou, aenvih faenhsou cungj dwg Cangqdiq senj okdaeuj guhbaenz aen ndang he, doxhuz he. Vanzlij miz, faenhsou ij rox docih de.

¹⁶ Faenhsou vanzlij ij dawz gij vah Gihduz caeng youq ndaw sim faenhsou lailai laeglaeg hwj, caemh ij yungh Gihduz soj nyok hawj hih coengjmingz ma doxson doxgyienq, caemh ij miz aen sim rox boixaen he daeuj ciengq gij go ndaw Singqgingh caeuq gij go haenh Cangqdiq caeuq gij go Hoenzsaenz Cangqdiq hawj raeuz angq hwj haenh hih gij go ma haenh Cangqdiq.

¹⁷ Mboujguenj faenhsou guh gijmaz cixnaeuz gangj gijmaz, cungj ij hij gij coh bouxcawj raeuz, caeuq baengh de daeuj docih Cangqdiq Bohmbwn.

Ndaw ranz vunz dih gveihdingq

¹⁸ Dineix gou gangj daengz guh yah hih. Faenhsou ij dingq goeng gojyez bonjfaenh; gij neix dwg guh gij vunz Gihduz wnggai guh hih.

¹⁹ Guh gvan hih, faenhsou caemh ij aiq mehyah bonjfaenh, mbouj ndaej yawj de ngawz.

²⁰ Gangj daengz guh lwg hih, faenhsou sojmiz hih cungj ij dingq bohmeh; gij neix dwg bouxcawj raeuz haenjheiq hih.

²¹ Guh boh hih, faenhsou mbouj ndaej guh gij saeh hawj lwg aeuqheiq he, mienxndaej gyoengqde doeknaiq.

²² Gangj daengz guh bouxhoiq hih, faenhsou sojmiz hih cungj ij dingq bouxcawj faenhsou. Faenhsou yienghneix guh mbouj dwg naeuz vih ij hawj bouxcawj haenjheiq, dauq dwg ij caensim caen'eiq lah, aenvih faenhsou dwg yawjnaek youq gwnzmbwn hih bouxcawj, soenhgingq youq gwnzmbwn hih bouxcawj hih.

²³ Faenhsou mboujguenj guh gijmaz cungj ij dwg nyienh'eiq caensim caen'eiq bae guh bouxhoiq wnggai guh he, ij luj swqhaeuh bouxcawj raeuz Yehsuh Gihduz yienghmwnq, mbouj dwg luj swqhaeuh heijvunz.

²⁴ Faenhsou wnggai rox, hauhnaeuz faenhsou yienghneix guh, bouxcawj raeuz Gihduz de gaengjdingq nyok gij saizcanj gwnzmbwn hawj faenhsou aeu ma guh cangjbyimj, aenvih faenhsou swqhaeuh hih dwg bouxcawj raeuz Gihduz.

²⁵ Hoeng, faenhsou caemh rox, bouxcawj raeuz Gihduz de doiq bouxboux cungj doxdoengz; mboujguenj byawz guh vaihsaeh hih, de cungj ciuq boux de soj guh hih ma bauqwngq hawj boux de.