Gohlozsih Saw 2 - Gij Baujcingq Moq Caeuq Geij Bonj Gij Baujcingq Daeuzdaeuz

¹ Faenhsou wnggai rox, gou vih faenhsou caeuq Laujdijgyah Singz hih vunz caeuq sojmiz mijyaengz raennaj gou goq hih doenghheij lwgsae mwnq hwj roengzrengz guh hong hih.

² Gou yienghneix guh dwg vih ij gujliq faenhsou caeuq gyoengqde daixgya, hawj daixgya ndaej rox doxaiq hwj ndaej duenzgyez, hawj daixgya engqgya rox gij saedsaeh Cangqdiq hwj ndaej miz sinqsim raixcaix, engqgya rox gij giqvaq miqmiz de, couh dwg naeuz, engqgya rox Gihduz—

³ sojmiz cingqcaen hih coengjmingz, cingqcaen hih ciqsiz cungj dwg coengz de daeuj; de couh dangq luj aen loengx coux gij dijbauj he.

⁴ Gou yienghneix doiq faenhsou gangj vah dwg siengj hawj faenhsou mbouj ngaiz vunz gangj vah gyaeu vah ndei hwj coemx faenhsou.

⁵ Gannaeuz gou mbouj youq faenhsou mwnq gaen faenhsou lah, hoeng, aen sim gou cungj caemhdangq gaen faenhsou lo. Gou angq raixcaix, aenvih gou rox faenhsou daixgya cungj caezsim cungj gyenhdingq fanjdeiq gij gyaj he, sinq Gihduz hih sim caemh gyenhdingq mbouj bienq sim.

Mbouj ndaej hawj vunz haed faenhsou

⁶ Giqyienz faenhsou nginh Yehsuh Gihduz guh bouxcawj lo, faenhsou couh ij wnggai ciuq de haenjheiq hih yienghmwnq bae guh,

⁷ couh ij ciuq gij saedsaeh de bae caep giek ndei bonjfaenh, hawj bonjfaenh ndaej engqgya yied ngoenz yied giengz, yied ngoenz yied miz aen sim sinq Gihduz engqgya gyenhdingq he. Yienghneix couh ndaej yienh ok faenhsou soj hag hih. Faenhsou caemh ij engqgya miz aen sim docih de he.

⁸ Hoeng, faenhsou ijaeu siujsim, gaejyungh ngaiz doenghheij gangj vah rumz vah rengx vah gyaeu vah ndei he daeuj coemx faenhsou, haed faenhsou, aenvih doenghheij vunz neix soj gangj hih vah dwg ciuq aen seiqgyaiq neix soj cenz roengzdaeuj hih laehbeih caeuq yawjfap he, dauq mbouj dwg ciuq Gihduz dih yawjfap he.

⁹ Aenvih Gihduz gannaeuz dwg miz vunz dih ndangnoh lah, hoeng, de dauq dwg cibcukcib dih Cangqdiq.

¹⁰ Gihduz, bouxcawj faenhsou, dwg hawj faenhsou ndaej bienqbaenz cibcukcib hab'eiq habhoz Cangqdiq hih vunz. De, Gihduz, caemh dwg sojmiz gaem gienz dang ak dih daeuzdaeuz.

¹¹ Faenhsou caemh gaenq gvi haeuj de hwj suenq dwg gozlij lo. Cungj gozlij neix mbouj dwg yungh gij fawz vunz ma youq gwnz ndang vunz gvej mwnq he hwj guh hih gozlij law, dauq dwg Gihduz hawj faenhsou ndaej duet ok ndangnoh faenhsou dih doegsieb dih gozlij lah,

¹² aenvih faenhsou sijlij hih mwhde gaenq suenq dwg caeuq Gihduz doengz moek lo, caemh aenvih faenhsou sinq gij rengz boux hawj de ndaej dauqlix dih Cangqdiq hwj caemh ndaej caeuq Gihduz itheij dauqlix lo.

¹³ Gannaeuz faenhsou doenghbaez mbouj gozlij, mbouj dwg gij vunz Cangqdiq, dwg famh coih hih, baenjlaiz dwg rai hih lah, hoeng, Cangqdiq dauq mienx faenhsou soj famh hih coih, hawj faenhsou ndaej caeuq Gihduz itheij dauqlix.

¹⁴ Vih ij hawj gyoengqraeuz ndaej caeuq de itheij dauqlix, de couh bang gyoengqraeuz dawz famh coih hih doiq gyoengqraeuz mbouj liq dih dangjnganq cawz bae liux, ding hwnj gwnz gyaq cixcib bae cawz liuxliux.

¹⁵ Cangqdiq yienghneix guh dwg vih ij dunghgoq gyaq cixcib hwj hawj Gihduz ndaej giengz goq sojmiz dang ak gaem gienz hih, ndaej fuhluj gyoengqde, hawj gyoengqde luj ngaiz vunz dawz ma youzhingz hwj hawj gyoengqde saetnaj.

¹⁶ Sojhij, faenhsou mbouj ndaej hawj vunz haed faenhsou, dingh hawj faenhsou gijmaz ndaej gw, gijmaz mbouj ndaej gw, cietlaw ndaej goq, cietlaw mbouj ndaej goq, moix ndwen cojit wng mbouj wnggai hingqcuz, ngoenzyietbaeg dih gveihdingq wng mbouj wnggai soenhsouj.

¹⁷ Gizsaed doenghgij gveihdingq neix cijmboujgoq dwg luj diuz giuz gaq roen hawj vunz, dizsenz daezsingj hawj vunz rox Gihduz he lah.

¹⁸ Faenhsou caemh mbouj ndaej hawj vunz ep faenhsou bae baiq bouxcai Cangqdiq, haed faenhsou hawj faenhsou cang gungz cang ndangj, cang yaqyuij yawj mbouj hwnj ra, yienghneix hwj ingjyangj faenhsou mbouj hawj faenhsou ndaej daengz Cangqdiq dih cangjbyimj. Doenghheij vunz neix cungj haenj gag cej naeuz bonjfaenh ndaej raen Cangqdiq yienh hawj gyoengqde raen geizmiuj gingjdoengh hih saeh. Gyoengqde dih yawjfap cungj dwg aen seiqgyaiq neix dih yawjfap, cungj dwg naemqnaeuz bonjfaenh ak raixcaix, rem raixcaix.

¹⁹ Gizsaed, gyoengqde caeuq ndaek raeuj, couh dwg Gihduz, mij doxlienz, mij maz gvanhaeh. Hoeng, Gihduz cingq dwg gyauqveiq hih raeuj hah; gyauqveiq dwg aen ndang de hih, baengh de hwj gak mwnq gak yiengh cij ndaej doxlienz, doxbang, cij ndaej ciuq Cangqdiq dih cawjeiq hwj hawj baenx aen ndang maj hung hwnjdaeuj.

²⁰ Yiengq, ciuq yienghneix ma gangj, faenhsou gaenq caeuq Gihduz doengz rai lo, caemh ndaej duet ok aen seiqgyaiq neix hih yawjfap guenjciq he lo. Hoeng, faenhsou vihmaz vanzlij ij ciuq aen seiqgyaiq neix ma saenghhoz nej? Vihmaz vanzlij ij soenhsouj

²¹ “mbouj ndaej dek gij neix, mbouj ndaej gw gij neix, mbouj ndaej bungq gij neix” hih doenghgij gveihdingq neix nej?

²² Hoeng gangj lauxsaed vah, luj doenghgij neix, yungh daengz le, sojmiz hih couh mij'z yungh lo. Cungj gveihdingq neix cijmboujgoq dwg ciuq vunz dih cawjeiq caeuq vunz dih soj son hih yienghmwnq ma laeb hih lah.

²³ Doenghgij gveihdingq neix hawj vunz yawj caenh lujnaeuz baenz raixcaix coengjmingz raixcaix nwih; de dingh hawj vunz yawj caenh lujnaeuz yawjnaek Cangqdiq, lujnaeuz mbouj gyauhngauq, caemh lujnaeuz yiemzgwz doiq aen ndang bonjfaenh nwih. Gizsaed gij gveihdingq neix doiq doenghheij ndangnoh siengjmuengh hih gaenhbaenj mbouj ndaej haed, it di cungj mij'z yungh.