Gohlimzdoh Ngeih 8 - Gij Baujcingq Moq Caeuq Geij Bonj Gij Baujcingq Daeuzdaeuz

Lwgsae haijliengh raixcaix

¹ Gak boux beixnuengx hax, gou seizneix naeuz sou ni, siengj hawj faenhsou rox Cangqdiq baenzlaw aiq Majgizdoenq dih gak aen gyauqveiq, baenzlaw doiq gyoengqde haijliengh,

² sojhij gyoengqde gannaeuz roeb daengz haujlai nanh, roeb daengz haujlai gaujniemq lah, hoeng, gyoengqde ciuqyiengh roxnginh sim'angq. Gannaeuz gungz raixcaix lah, hoeng, gyoengqde ciuqyiengh haijliengh raixcaix.

³ Gou gamj cingqmingz gyoengqde dwg nyienh'eiq caenhsim caenh gyoengqde ndaej guh daengz hih bae gien lo, simqciq cauhgoq gyoengqde soj ndaej guh daengz hih.

⁴ Gyoengqde gouz gou hawj gyoengqde caemh miz faenh ndaej gien gijmaz hawj gij lwgsae youq Yehluqsajlaengj.

⁵ Gyoengqde soj guh hih dwg gyoengqraeuz ngeix mbouj daengz hih; gyoengqde sien dawz bonjfaenh gien hawj bouxcawj raeuz, dingq bouxcawj raeuz, gajlaeng caiq ciuq Cangqdiq dih cawjeiq dawz bonjfaenh gien hawj gyoengqraeuz.

⁶ Sojhij gou gienq Dizdoh, hawj de bang faenhsou guh gij saeh gien ngaenz mwnq sat bae. (Gou yienghneix naeuz dwg aenvih Dizdoh dwg guh boux yax guh gij saeh gien ngaenz neix he.)

⁷ Giqyienz faenhsou dih sinqsim hah, goujcaiz hah, ciqsiz hah, miz sim hah, doiq gyoengqraeuz dih aiqsim hah cungj gig ndei lo, yiengq gou caemh muengh faenhsou doiq gien ngaenz gij saeh ndei neix caemh wnggai yienh ok haijliengh raixcaix cij deng.

⁸ Gou naeuz sou ni, gou yienghneix naeuz faenhsou, mbouj dwg ij mingqlingq faenhsou law, dauq dwg gou siengj rox faenhsou caemh ndaej luj heijvunz yienghmwnq miz aiqsim lah.

⁹ Faenhsou caemh rox, bouxcawj raeuz Yehsuh Gihduz, de aiq vunz raixcaix. Baenjlaiz de youq mijyaengz roengz daeuj lajmbwn guh vunz cihsenz dwg fouqfouq mizmiz hih, hoeng, vih faenhsou hwj de nyienh'eiq roengz daeuj lajmbwn guh vunz hwj bienqbaenz boux gungzgungz ndangjndangj he. Aenvih de bienqbaenz gungzgungz ndangjndangj, couh ndaej hawj faenhsou ndaej bienqbaenz fouqfouq mizmiz lo.

¹⁰ Gangj daengz gien ngaenz gij saeh neix, gou dawz gij yawjfap gou naeuz sou ni, couh dwg bi gaxgonq faenhsou haenj guh hih, yax gien ngaenz hawj gyauqveiq hih gij hong neix, caemh dwg faenhsou heijdaeuz guh hih,

¹¹ seizneix faenhsou wnggai guh sat bae bax. Faenhsou giqyienz miz sim yax guh gij gien ngaenz neix, yiengq faenhsou couh wnggai ciuq faenhsou ndaej guh daengz hih bae guh saeh bax,

¹² aenvih hauhnaeuz faenhsou caensim gien ngaenz hih, cijaeu ciuq faenhsou soj miz hih bae gien, Cangqdiq couh haenjheiq lo; de mbouj dwg hawj faenhsou mbouj miz hoeng cungj ij gien law, dauq dwg hawj faenhsou gien faenhsou miz hih lah.

¹³ Gou yienghneix naeuz mbouj dwg siengj hawj faenhsou bang vunz gungz hwj hawj faenhsou bienqbaenz gungz hih law, dauq dwg siengj hawj daixgya goengbingz lah.

¹⁴ Seizneix faenhsou fouqmiz, ndaej bang vunz gungz; daengj baezneix gyoengqde caemh fouqmiz lo, caemh ndaej dauq bang faenhsou boiz nej. Yienghneix daixgya gungz fouq couh goengbingz lo.

¹⁵ Cingq luj ndaw Singqgingh ndaw de sij miz hih: Lai hih caemh mbouj suenq lai, noix hih caemh mbouj suenq noix.

Baij Dizdoh caeuq gizdah lwgsae doih bae Gohlimzdoh

¹⁶ Gou docih Cangqdiq hawj Dizdoh caeuq gou doxdoengz gvansim faenhsou.

¹⁷ De mbouj danhcij dingq gij vah gyoengqraeuz, vanzlij haenj bae faenhsou mwnq bang faenhsou.

¹⁸ Gou vanzlij baij boux he caeuq de itheij bae. Boux neix de dwg boux cenzgangj Cangqdiq dih ndei siuhsiz he; gak aen gyauqveiq hih vunz cungj caemh soenhcungq de.

^19-20 Mbouj danhcij yienghneix, de caemh dwg gak aen gyauqveiq senj okdaeuj caeuq gou itheij dawz gyoengq vunz gien hih ngaenz soengq bae hawj Yehluqsajlaengj hih gak aen gyauqveiq he. [20]Gyoengqraeuz vih mbouj hawj vunz ngeiz raeuz, aenvih gyoengqraeuz dawz baenx lai ngaenz, [19b]caemh aenvih gyoengqraeuz guh gij hong neix dwg ij hawj bouxcawj raeuz najrongh he, caemh dwg yienh ok gyoengqraeuz miz sim bang vunz he.

²¹ Gyoengqraeuz guh gij saeh ndei neix, ij cwnqliengq siujsim, ij hawj bouxcawj raeuz caeuq vunz rox gyoengqraeuz guh saeh, dwg guh ndaej ndei hih.

²² Cawz Dizdoh caeuq boux gou soj naeuz hih boux neix ok, gyoengqraeuz caemh vanzlij caiq baij boux he caeuq gyoengqde itheij bae. Boux de youq gak yiengh cungj guh ndaej ndei he. De doiq gij saeh neix cizgiz raixcaix; de sinq faenhsou, caemh engqgya siengj bae bang faenhsou.

²³ Caiq gangj daengz Dizdoh caeuq linghvaih baij hih song boux beixnuengx, Dizdoh, de dwg bouxdoih gou, dwg caeuq gou itheij bang faenhsou he; song boux beixnuengx linghvaih baij mwnq, gyoengqde dwg dineix gyauqveiq dih daiqbiuj he, dwg hawj Gihduz najrongh he.

²⁴ Sojhij, faenhsou ij daih gyoengqde ndei, ij naebsim bang gyoengqde sou ndei gij vunz gien okdaeuj hih ngaenz, hawj sojmiz hih gyauqveiq cungj ndaej rox faenhsou dih aiq, ndaej rox gyoengqraeuz haenh faenhsou dwg mbouj loek hih.