Gohlimzdoh Ngeih 6 - Gij Baujcingq Moq Caeuq Geij Bonj Gij Baujcingq Daeuzdaeuz

¹ Gyoengqraeuz dwg caeuq Cangqdiq itheij guh hong hih; gyoengqraeuz miz gienz naeuz faenhsou. Faenhsou mbouj ndaej mbouj leixlangh Cangqdiq doiq faenhsou dih haijliengh,

² aenvih Cangqdiq naeuz: Youq mwh hab hih mwhde, gou dingq faenhsou gouz gou; daengz ngoenz ndaej gouq mwnq gou bang faenhsou. Sojhij, gou naeuz sou ni hax, seizneix cingq dwg hab hih mwhde lo! Seizneix cingq dwg ngoenz Cangqdiq gouq faenhsou he lo.

Baujloz dingx ndaej nanh

³ Mboujguenj gyoengqraeuz guh gijmaz, cungj mbouj guh gij hawj vunz mbouj sinq he, mienxndaej vunz naeuz raeuz guh hih cungj dwg gyaj hih.

^4-5 Dauqfanj gyoengqraeuz soj guh hih cungj dwg yienh ok gyoengqraeuz dwg bouxhoiq Cangqdiq. [4c]Gyoengqraeuz mboujguenj roeb daengz gijmaz nanh, haemzhoj, gungz, [5]ngaiz vunz doh, ngaiz vunz gyaeng, ngaiz vunz nauh luenh, ngaiz guh hong dwgrengz sinhoj, ngaiz mbouj ndaej ninz, ngaiz iek, [4b]gyoengqraeuz cungj naenxsim roengzbae.

⁶ Gyoengqraeuz dwg boux mij maz ndaej diudik he, sug gij saedsaeh Cangqdiq he, rox naenxsim he, miz liengzsim he, baengh Hoenzsaenz Cangqdiq he, caensim caen'eiq aiq vunz he,

⁷ ciuq saedsaeh gangj vah he, baengh Cangqdiq hih rengz hwj guh saeh he. Gyoengqraeuz doiq dizyinz mbouj yungh gijmaz ujgiq; caenhgag ndwn ndaej cingq couh ndaej baujhuq bonjfaenh lo.

⁸ Gyoengqraeuz mboujguenj vunz soenhgingq cixnaeuz vunz yawjngawz, mboujguenj ngaiz vunz bangjlaih cixnaeuz vunz haenh, cungj dwg caensim swqhaeuh Cangqdiq hih. Gyoengqraeuz dwg saedsaeh hih, hoeng, vunz dauq naeuz raeuz gyaj hih.

⁹ Gyoengqraeuz lujnaeuz mij'z vunz rox, hoeng, dauqfanj bouxlawz cungj rox; lujnaeuz ij rai, hoeng, dauq lix hih; lujnaeuz ngaiz fad, hoeng, dauq mij ngaiz fad rai;

¹⁰ lujnaeuz siengsim, hoeng, dauq vuenheij; lujnaeuz gungz, hoeng, dauq ndaej hawj haujlai vunz fouq; lujnaeuz mij saek yiengh, hoeng, dauqfanj yienghyiengh cungj miz.

^11-12 Gohlimzdoh gyauqveiq dih gak boux beixnuengx hax, mbouj dwg gyoengqraeuz doiq faenhsou mbouj caensim law, [12]dauq dwg faenhsou doiq gyoengqraeuz mbouj caensim lah; [11a]gyoengqraeuz doiq faenhsou gangj hih vah cungj dwg miz maz gangj maz.

¹³ Gou doiq faenhsou luj doiq ndaw ranz vunz yienghmwnq; faenhsou doiq gou caemh wnggai luj yienghneix.

Mbouj hab caen hih couh mbouj caen

¹⁴ Faenhsou mbouj ndaej caeuq gij vunz mbouj sinq Gihduz he baenxlai caen. Ndei caeuq yak baenzlawz ndaej doxgaep nej? Laep caeuq rongh baenzlawz ndaej doxdoengz miz nej?

¹⁵ Gihduz caeuq Sajdanq fangzvuengz baenzlawz ndaej doxhuz nej? Sinq hih vunz caeuq mbouj sinq hih vunz miz maz doxdoengz nej?

¹⁶ Duz you ij baenzlawz ndaej coengq youq gunghdenq Cangqdiq nej? Gyoengqraeuz dwg gunghdenq seiqseiz lix dih Cangqdiq, cingq luj Cangqdiq naeuz: Gou ij caeuq gij vunz gou doxcaeuq youq, gou ij caeuq gyoengqde miz laizvangj. Gou ij guh gyoengqde dih Cangqdiq, gyoengqde caemh ij guh gij vunz gou.

¹⁷ Cangqdiq vanzlij caiq naeuz: Faenhsou mbouj dep gyoengqde, ij liz gyoengqde, mbouj bungq doenghgij uekcueg yaegyad he, gou couh hawj faenhsou guh gij vunz gou lo.

¹⁸ Gou ij guh daxboh faenhsou, faenhsou caemh ij guh gij lwg gou. Gij vah neix dwg gou, akak rengzrengz dih Cangqdiq gangj hih.