Gohlimzdoh Ngeih 5 - Gij Baujcingq Moq Caeuq Geij Bonj Gij Baujcingq Daeuzdaeuz

Ranz gwnzmbwn

¹ Gyoengqraeuz cungj rox, aen ndang gyoengqraeuz seizneix caemhdangq luj aen cangqbungz; hauhnaeuz aen de ngaiz cek le, Cangqdiq couh youq gwnzmbwn bang gyoengqraeuz cwnjbiq aen ranz yungjyenj mbouj rox vaih he mbouj dwg aeu vunz ma hwnq baenz he.

² Gyoengqraeuz seizneix youq ndaw cangqbungz neix gangznaek, muengh vaiqdi ndaej buen haeuj aen ranz gwnzmbwn mwnq bae, caemh luj lawh buh moq yienghmwnq.

³ Daenj haeuj bae le, couh mbouj ngaiz vunz raen loxgenz loxgangh lo.

⁴ Gyoengqraeuz youq ndaw cangqbungz neix, gannaeuz roxnginh dwgrengz hwj gangznaek lah, hoeng, vanzlij mbouj siengj duet diuz buh seizneix, dauq dwg ijsiengj ndaej vuenh aen ndang yungjyenj mbouj rox rai he, hawj seiqseiz lix hih mingh gyan aen ndang rox rai neix lah.

⁵ Gij neix dwg Cangqdiq nganhbaiz gyoengqraeuz he, de caiq nyok Hoenzsaenz de hawj gyoengqraeuz guh baengzgawq.

⁶ Sojhij, gyoengqraeuz couh mbeihung mbouj lau. Gyoengqraeuz caemh rox, cijaeu gyoengqraeuz vanzlij dwg aen ndangnoh rox naeuh neix, gyoengqraeuz couh vanzlij dwg mbouj ndaej caeuq bouxcawj raeuz youq itheij.

⁷ Couh vih yienghneix, gyoengqraeuz cungj dwg baengh sinq Cangqdiq, mbouj dwg baengh ra yawj ndaej raen he.

⁸ Gou caiq naeuz gyoengqraeuz mbeihung mbouj lau, dwg siengj duet ok aen ndang bonjfaenh hwj bae caeuq bouxcawj raeuz itheij youq.

⁹ Mboujguenj gyoengqraeuz caeuq mbouj caeuq bouxcawj raeuz youq itheij, gyoengqraeuz cungj ij guh gij hawj bouxcawj raeuz haenjheiq he,

¹⁰ aenvih mboujguenj baenzlawz, gyoengqraeuz daixgya cungj ij miz ngoenz he ndwn youq dangqnaj Gihduz, ngaiz de saemjbuenq, caemh dwg ciuq gak vunz soj guh hih ma saemjbuenq gak vunz, ndei hih hawj vunz ndei, rwix hih bauqwngq dawz.

Gienq vunz caeuq Cangqdiq doxhuz

¹¹ Couh vih yienghneix, gyoengqraeuz wnggai yawjnaek bouxcawj raeuz, sojhij gyoengqraeuz gienq vunz hawj vunz nginh loek gaijgoq. Cangqdiq rox gyoengqraeuz cingcing sujsuj, gou caemh muengh faenhsou caemh rox gyoengqraeuz cingsuj.

¹² Faenhsou gaejyungh naemqnaeuz gyoengqraeuz caiq gag haenh bonjfaenh lo; gyoengqraeuz cijmboujgoq siengj hawj faenhsou rox faenhsou ndaej vih gyoengqraeuz hwj najrongh, hawj faenhsou ndaej miz vah doiq doenghheij caenh yawj vunz guh saeh mbouj yawj saedsaeh ciuq saedsaeh hih vunz gangj lah.

¹³ Yiengq aiq ij miz vunz naeuz gyoengqraeuz fatvangh lo, hoeng, gou naeuz hax, mboujguenj guxmaz, fat mbouj fatvangh, gyoengqraeuz cungj dwg vih Cangqdiq caeuq vih faenhsou.

¹⁴ Gyoengqraeuz soj guh hih cungj dwg Gihduz aiq gyoengqraeuz hawj gyoengqraeuz yienghneix guh hih. Gyoengqraeuz rox, aenvih de boux vunz dog vih baenx cenz lajmbwn hih vunz hwj rai lo, sojhij lajmbwn sojmiz hih caemhdangq gaenq rai lo.

¹⁵ Yiengq, giqyienz Gihduz vih sojmiz hih vunz hwj rai vwz, sojmiz hih vunz couh mbouj wnggai vih bonjfaenh hwj lix lo, dauq dwg ij vih Gihduz hwj lix cij deng, aenvih Gihduz vih sojmiz hih vunz hwj rai, caemh vih sojmiz hih vunz hwj dauqlix lo.

¹⁶ Sojhij gou naeuz hax, daj seizneix hwnj, gyoengqraeuz mbouj caiq yawj vunz guh saeh lo. Gannaeuz doenghbaez raeuz ciuq vunz dih yawjfap ma yawj Gihduz goq lah, hoeng, seizneix mbouj caiq yienghmwnq yawj de haem lo.

¹⁷ Gou raen hax, mboujguenj dwg byawz, cijaeu de gaep haeuj Gihduz, de couh dwg boux vunz moq luj ngamq cauh he lo; gaeuq hih gaenq mbouj miz lo, cungj dwg moq hih lo.

¹⁸ Gij neix cungj dwg Cangqdiq guh hih geizmiuj hih saeh. De caemh dunghgoq Gihduz hwj hawj gyoengqraeuz ndaej caeuq de doxhuz. De vanzlij senj gyoengqraeuz, baij gyoengqraeuz bae cenz naeuz vunz ni ij baenzlawz ndaej caeuq Cangqdiq doxhuz.

¹⁹ Couh dwg naeuz Cangqdiq dunghgoq Gihduz hwj hawj vunz caeuq bonjfaenh de doxhuz, nyiuz gyoengq vunz hih coih. De vanzlij hawj gyoengqraeuz cenzgangj doxhuz hih gij ndei siuhsiz neix.

²⁰ Sojhij gyoengqraeuz couh dwg Gihduz dih daiqbiuj; Cangqdiq dunghgoq gyoengqraeuz ma gienq faenhsou, caemh luj Gihduz de cinhswq gienq faenhsou, hawj faenhsou caeuq Cangqdiq doxhuz yienghmwnq.

²¹ Cangqdiq hawj boux mij coih mwnq, couh dwg Gihduz, dingj gyoengqraeuz rap coih hwj hawj gyoengqraeuz ndaej youq ndaw lwgra Cangqdiq bienqbaenz mij'z coih he hih vunz.