Gohlimzdoh Ngeih 4 - Gij Baujcingq Moq Caeuq Geij Bonj Gij Baujcingq Daeuzdaeuz

Gij dijbauj ndaw batvax

¹ Yiengq, giqyienz Cangqdiq doiq gyoengqraeuz haijliengh, hawj gyoengqraeuz ndaej guh gij hong cenzgangj gij baujcingq moq de vwz, gyoengqraeuz gaengjdingq mbouj doeknaiq lo,

² gaengjdingq mbouj guh doenghgij saetnaj saetnyaenq mij'z naj doiq vunz he, mbouj coemx vunz yaeuh vunz, mbouj doeng gaij sae gaij gij vah Cangqdiq lo, dauq dwg guh gij doiq ndaej hwnj Cangqdiq he hwj mingzmingz begbeg hih dawz gij saedsaeh Cangqdiq cenzgangj naeuz vunz ni, yienghneix hwj hawj vunz gag naemjnaemj yawj deng mbouj deng.

³ Yiengq, hauhnaeuz gyoengqraeuz soj cenzgangj hih ndei siuhsiz vunz dingq mbouj roxyiuj hih, couh dwg doenghheij vunz byaij haeuj satsoq he bae dingq mbouj rox hih lah.

⁴ Doenghheij vunz neix mbouj sinq Gihduz, dwg ngaiz aen ciqgyaiq neix dih cwnz, Sajdanq, loengh hwj sim mazmwnh ra fangz yawj mbouj raen gij rongh gij ndei siuhsiz Gihduz lah. Hoeng, Gihduz couh dwg Cangqdiq dih saeksiengq hah.

⁵ Gyoengqraeuz soj cenzgangj hih mbouj dwg cenzgangj gyoengqraeuz bonjfaenh nej; dwg cenzgangj Yehsuh Gihduz dwg bouxcawj hih lah. Vih Yehsuh Gihduz hwj, gyoengqraeuz bienqbaenz bouxhoiq faenhsou,

⁶ aenvih boux naeuz: “Rongh! Daj ndaw laep ciuq okdaeuj!” dih Cangqdiq, de gaenq dawz gij rongh de ciuq haeuj ndaw sim gyoengqraeuz daeuj lo, hawj gyoengqraeuz ndaej rox gij rongh Cangqdiq dih veijdaq lo. Gij rongh neix dwg yienh youq baj naj Gihduz he.

⁷ Hoeng, gyoengqraeuz cijmboujgoq dwg aen batvax yaez he hih lah; Cangqdiq dauq dawz gij dijbauj de couh dwg gij rongh de coux youq ndaw de hwj. Gij dijbauj neix dwg yienh ok Cangqdiq dih bonjsaeh akak rengzrengz lah; mbouj dwg yienh ok gij bonjsaeh raeuz law.

⁸ Gyoengqraeuz gannaeuz roeb daengz haujlai nanh lah, hoeng, ndaej baengh gij bonjsaeh Cangqdiq hwj dauq mbouj ngaiz baih; ndaw sim nyap, hoeng, mbouj saetmuengh;

⁹ roeb daengz haujlai bwkhaih, hoeng, Cangqdiq mbouj vwt raeuz; ngaiz vunz doh, hoeng, mbouj ngaiz rai.

¹⁰ Gyoengqraeuz siengzseiz cungj dwg luj Yehsuh yienghmwnq ij ngaiz vunz gaj, hoeng, mbouj ngaiz rai. Yienghneix gajlaeng vunz engqgya rox seiqseiz lix dih Yehsuh yienh youq gwnz ndang gyoengqraeuz.

¹¹ Gyoengqraeuz baenxseiq vunz cungj dwg vih Yehsuh hwj siengzseiz ngaiz vunz ij gaj, couh dwg vih ij hawj Yehsuh dih saenghhoz yienh youq gwnz ndang rox rai hih gyoengqraeuz.

¹² Couh dwg naeuz ciuq yienghneix ma gangj, rai dwg gyoengqraeuz dingx; lix dwg faenhsou ndaej.

¹³ Singqgingh ndaw de sij naeuz: Gou sinq, sojhij gou cenzgangj. Caemh doxdoengz, aenvih gyoengqraeuz sinq gij saedsaeh Cangqdiq, sojhij gyoengqraeuz couh cenzgangj naeuz vunz ni.

¹⁴ Gyoengqraeuz caemh rox, boux hawj Yehsuh bouxcawj raeuz ndaej dauqlix hih, de caemh bietdingh ij hawj gyoengqraeuz ndaej caeuq Yehsuh bouxcawj raeuz dauqlix, caemh gaengjdingq hawj gyoengqraeuz caeuq faenhsou itheij bae daengz de mwnq.

¹⁵ Gizsaed, sojmiz hih cungj dwg vih faenhsou, hawj faenhsou ndaej miz ik, sawj engqgya miz vunz lai ndaej daengz Cangqdiq dih bangcoh, engqgya miz vunz lai docih Cangqdiq, sawj sojmiz najrongh hih cungj dwg gvi hawj Cangqdiq.

Yawj mbouj raen hih couh dwg yungjyenj hih

¹⁶ Sojhij gyoengqraeuz mbouj doeknaiq; cungjsuenq aen ndangnoh gyoengqraeuz menhmenh laux lo, aen sim gyoengqraeuz cungj mbouj laux, engqgya ij yied ngoenz yied oiq hwnjdaeuj.

¹⁷ Gyoengqraeuz camqciz souh daengz hih di nanh neix, cingq dwg ij hawj gyoengqraeuz ndaej yungjyenj engqgya lai dih najrongh lah.

¹⁸ Gyoengqraeuz mbouj yawjnaek doenghgij yawj ndaej raen hih nej, dauq dwg yawjnaek doenghgij yawj mbouj raen he lah, aenvih doenghgij yawj ndaej raen he dwg camqciz he lah, hoeng, doenghgij yawj mbouj raen he cij dwg yungjyenj he.