Gohlimzdoh Ngeih 3 - Gij Baujcingq Moq Caeuq Geij Bonj Gij Baujcingq Daeuzdaeuz

Gij gaeuq caeuq gij moq doxbeij

¹ Gyoengqraeuz yienghneix naeuz dwg mbouj dwg gag haenh bonjfaenh lo nej? Nanzdauh gyoengqraeuz caemh ij luj miz mbangj hih vunz ij miz mbaw cingqmingz hawj faenhsou, cixnaeuz ij hawj faenhsou cingqmingz cij ndaej mah?

² Hoeng, faenhsou couh dwg gyoengqraeuz dih cingqmingz hah; gij cingqmingz neix dwg sij youq ndaw sim gyoengqraeuz, dwg doeg hawj vunz dingq hawj vunz rox hih hah.

³ Faenhsou mingzmingz dwg Gihduz dih cingqmingz, dwg dunghgoq gyoengqraeuz ma sij hih. Mbouj dwg yungh maeg ma sij, cix mbouj dwg sij youq gwnz rin, dauq dwg Hoenzsaenz seiqseiz lix dih Cangqdiq sij youq ndaw sim hih lah.

⁴ Gyoengqraeuz gamj yienghneix naeuz dwg aenvih gyoengqraeuz dunghgoq Gihduz hwj baenxlai sinq Cangqdiq lah.

⁵ Gyoengqraeuz caemh mbouj dwg naeuz baengh bonjfaenh hwj ndaej guh gijmaz law, dauq dwg Cangqdiq hawj gyoengqraeuz ndaej guh daengz hih lah.

⁶ De hawj gyoengqraeuz ndaej guh boux cenz gij baujcingq lienz diuzgyenq moq de naeuz vunz ni. Gij baujcingq lienz diuzgyenq moq neix mbouj dwg sij youq ndaw saw dih fazliz, dauq dwg Hoenzsaenz Cangqdiq dingh hih. Sij youq ndaw saw dih fazliz dwg hawj vunz ngaiz rai hih, hoeng, Hoenzsaenz Cangqdiq dingh hih dwg hawj vunz ndaej lix hih.

⁷ Gangj daengz gij fazliz hawj vunz ngaiz rai dik youq gwnz rin mwnq, mwh Cangqdiq gyau hawj Mohsih hih mwhde, Cangqdiq hawj baj naj Mohsih ronghndongq duenh he, guh hawj gij vunz Hijswzlez mbouj gamj cimyawj baj naj Mohsih bae;

⁸ gangjnaeuz dwg Hoenzsaenz Cangqdiq dingh okdaeuj hih gij baujcingq lienz diuzgyenq moq mwnq hwx, mbouj engqgya miz rongh maz?

⁹ Yiengq, hauhnaeuz gij fazliz dingh hawj vunz miz coih mwnq miz rongh, gij baujcingq moq hawj vunz youq ndaw lwgra Cangqdiq suenq dwg mij'z coih mwnq, mbouj engqgya miz rongh hih maz?

¹⁰ Gizsaed gij gaeuq yienzlaiz dih rongh caeuq gij moq gajlaeng dih rongh doxbeij, gij gaeuq hih rongh couh mbouj suenq guxmaz rongh lo.

¹¹ Hauhnaeuz gij gaeuq ngaiz cawz bae mwnq miz rongh, yiengq gij moq yungjyenj louz mwnq mbouj engqgya miz rongh lo maz?

¹² Yiengq, giqyienz gij baujcingq moq hawj gyoengqraeuz ndaej miz muengh baenx lai, gyoengqraeuz couh mbeihung hwj cenzgangj lo.

¹³ Hoeng gyoengqraeuz mbouj luj Mohsih yienghmwnq goemq naj hwj mbouj hawj gij vunz Hijswzlez raen gij rongh menhmenh myox daengz mbouj raen bae nej.

^14-15 Yiengq gangj daengz gij vunz Hijswzlez, hojsik aen sim gyoengqde gyeng raixcaix; [15]itcig daengz seizneix, gyoengqde doeg gij fazliz gaeuq hih mwhde, aen sim gyoengqde vanzlij dwg luj miz sujbaq goemq hwj. [14b]Hoeng mbaw sujbaq neix caenhgag Gihduz cij ndaej bwenj he;

¹⁶ mboujguenj seizlaw, gij vunz daj ndaw sim nginh loek gaij goqma gaen bouxcawj raeuz, mbaw sujbaq goemq neix couh ndaej bwenj deuz lo.

¹⁷ Dineix soj naeuz hih bouxcawj, couh dwg Hoenzsaenz Cangqdiq; Hoenzsaenz Cangqdiq youq mwnqlaw, mwnqlaw couh miz swqyouz.

¹⁸ Yiengq, giqyienz gyoengqraeuz daixgya cungj mbouj goemq naj lo, yienghneix couh ndaej hawj vunz yawjraen gyoengqraeuz luj aen gingq yienghmwnq yienh ok gij rongh bouxcawj raeuz. Hoenzsaenz Cangqdiq bouxcawj raeuz caemh hawj gyoengqraeuz ndaej bienqbaenz yied ngoenz yied ndaej luj de yienghmwnq rongh sagsag lo.