Gohlimzdoh Ngeih 2 - Gij Baujcingq Moq Caeuq Geij Bonj Gij Baujcingq Daeuzdaeuz

¹ Sojhij gou cij gyezdingq mbouj bae yawj faenhsou, mienxndaej faenhsou siengsim,

² aenvih hauhnaeuz gou hawj faenhsou siengsim nex, lij miz bouxlawz ndaej hawj gou vuenheij haem nej? Caenhgag vih gou hwj siengsim hih faenhsou, cij ndaej hawj gou vuenheij hoh lo.

³ Vih yienghneix, gou sij saenq hawj faenhsou goq, vih mbouj ngaiz daengz gou bae yawj faenhsou hih mwhde, doenghheij baenjlaiz hawj gou vuenheij hih dauq hawj gou siengsim. Gou caemh rox, hauhnaeuz gou vuenheij nex, faenhsou caemh vuenheij lo.

⁴ Gou gaxgonq sij saenq hawj faenhsou hih mwhde, dwg cienfanh siengsim gikheiq riuz raemxra he. Gou yienghneix naeuz mbouj dwg ij hawj faenhsou siengsim law, dauq dwg ij hawj faenhsou rox gou baenxlai aiq faenhsou lah.

Nyiuz famh coih hih vunz

⁵ Yiengq, hauhnaeuz miz vunz hawj vunz siengsim nex, boux de mbouj danhcij hawj gou siengsim, vanzlij hawj faenhsou daixgya siengsim. (Gou yienghneix naeuz aiq miz di gvaqbouh he lo.)

⁶ Sojhij gou naeuz faenhsou hax, mbouj caiq fad de haem lo; vunzlai naeuz de, de caemh gaenq souh gaeuq lo.

⁷ Faenhsou hozmboujyienz nyiuz de, vued de suenq lox, mienxndaej de siengsim daiq lai hwj doeknaiq bae.

⁸ Sojhij, gou gienq faenhsou, wnggai hawj de rox, faenhsou vanzlij luj gaxgonq yienghmwnq aiq de.

⁹ Gou gaxgonq sij fung saenq mwnq hawj faenhsou dwg ij gaujniemq faenhsou dauqdaej dwg mbouj dwg caemh ciuq gou raengq hih yienghmwnq bae guh lo.

¹⁰ Gou saedsaeh naeuz sou ni, hauhnaeuz faenhsou nyiuz bouxlawz, gou caemh nyiuz bouxlawz. Gou sojmiz nyiuz hih, cungj dwg vih faenhsou, caemh dwg youq dangqnaj Gihduz nyiuz hih.

¹¹ Gou yienghneix guh dwg vih mbouj hawj Sajdanq fangzvuengz ciemq bienxngeiz, aenvih gyoengqraeuz doiq Sajdanq dih yimhmaeuz cungj rox cingsuj.

Rang fwtfwt dih siuhsiz

¹² Gaxgonq gou bae Dwzlozyaq Singz cenzgangj Gihduz dih ndei siuhsiz hih mwhde, gannaeuz bouxcawj raeuz youq mwnq gaenq hoi diuz roen he hawj gou hoh lah,

¹³ hoeng, gou vanzlij dwg sim mbouj onj, aenvih gou youq mwnq mbouj raen Dizdoh boux beixnuengx doih neix. Sojhij gou couh daj gyauqveiq mwnq ok ma daeuj daengz Majgizdoenq lo.

¹⁴ Hoeng, docih Cangqdiq! De siengzseiz daiq gyoengqraeuz hawj gyoengqraeuz baengh Gihduz hwj ndaej hingz goq sojmiz hih, caiq hawj gyoengqraeuz ndaej dawz gvanhhih Yehsuh Gihduz dih siuhsiz cenz naeuz vunz ni. Gij siuhsiz neix couh luj gij heiq rang fwtfwt he cenz bae daengz gak dieg,

¹⁵ aenvih gyoengqraeuz luj Gihduz nyok hawj Cangqdiq hih gij rang fwtfwt he; gij rang fwtfwt neix cenz bae daengz doenghheij ndaej gouq he caeuq doenghheij mbouj ndaej gouq ngaiz rai he.

¹⁶ Gij rang fwtfwt neix doiq doenghheij ngaiz rai hih vunz ma gangj, couh dwg gij heiq haeu he; doiq doenghheij ndaej gouq hih vunz ma gangj, couh dwg gij heiq rang fwtfwt he. Ox, docih Cangqdiq! Cangqdiq hawj raeuz ndaej cenz gij rang fwtfwt neix, hoeng, raeuz boiq mbouj ndaej hax!

¹⁷ Gyoengqraeuz mbouj luj haujlai vunz, dawz gij vah Cangqdiq ma dangq guh doenghgij ndaej hai ndaej cawx he nej, dauq dwg Cangqdiq senj gyoengqraeuz, baij gyoengqraeuz hawj gyoengqraeuz caensim caen'eiq caeuq baengh Yehsuh Gihduz dih gienz hwj cenz gij vah Cangqdiq lah.