Gohlimzdoh Ngeih 12 - Gij Baujcingq Moq Caeuq Geij Bonj Gij Baujcingq Daeuzdaeuz

Baujloz luj fangxngwnzloq caeuq luj miz oen coeg

¹ Gou lauxsaed naeuz sou ni, gannaeuz gag haenh bonjfaenh mij'z ik lah, hoeng, gou seizneix vanzlij dwg ij gag haenh bonjfaenh gou: seizneix gou siengj haenh bouxcawj raeuz hawj gou luj fangxngwnzloq yienghmwnq yawjraen gij geizmiuj he caeuq rox de raengq gou hih vah.

² Gou rox miz boux haeuj gij vunz Gihduz he, de youq cibseiq bi gaxgonq luj fangxngwnzloq yienghmwnq ndaej ciep hwnj daixsam caengz mbwn bae. Hoeng, gou mbouj rox dauqdaej dwg aen ndangdaej de caeuq hoenzsaenz de hwnj bae haj cixnaeuz caenhgag dwg hoenzsaenz de hwnj bae. Gou mbouj rox; caenhgag Cangqdiq cij rox.

³ Gou vanzlij ij naeuz: gou rox boux ndaej ciep hwnj mbwn bae he, hoeng, gou mbouj rox dauqdaej dwg aen ndang de caeuq hoenzsaenz de hwnj bae haj cixnaeuz caenhgag hoenzsaenz de hwnj bae. Gou mbouj rox; caenhgag Cangqdiq cij rox.

⁴ De ndaej youq mwnq ndaej yangjfuk he dingqri gij vah he, dwg vunz mij banqfaz aeu bak ma gangj he, dwg Cangqdiq mbouj hawj gangj he.

⁵ Gou ij haenh boux vunz neix; hoeng, bonjfaenh gou nej, hauhnaeuz gou ij gag haenh bonjfaenh gou nex, couh wnggai gag haenh naeuz bonjfaenh gou mij rengz mij banqfaz ndaej lo.

⁶ Gizsaed, cungjsuenq naeuz gou gag haenh bonjfaenh gou hwjx, caemh mbouj suenq naeuz ngawz hah, aenvih gou gangj hih cungj dwg saedsaeh hih, mboujgoq gou vanzlij dwg mbouj siengj gangj ok bak, mienxndaej vunz daiq yawjhwnj gou lai, cauhgoq gyoengqde daj gwnz ndang gou soj yawjraen hih, soj dingq daengz hih.

⁷ Cangqdiq mbouj hawj gou vih ndaej rox gij miqmiz de hwj gyauhngauq, couh hawj gou baenz cungj lujnaeuz miz diuz oen he coeg youq gwnz ndang gou nwih, luj bouxcai Sajdanq yienghmwnq siengzseiz coeg in gou, loengh gou.

⁸ Vih yienghneix hwj, gou gouz bouxcawj raeuz goq sam mbat, gouz de bang gou ciemz diuz oen neix ok.

⁹ Hoeng, bouxcawj raeuz dauq doiq gou naeuz: “Cijaeu gou aiq mwngz, couh ndaej lo, aenvih gou ndaej miz rengz hawj vunz youq mwh mij rengz mij banqfaz he, ndaej raen hamq hah.” Couh vih yienghneix hwj, gou engq haenj gag haenh bonjfaenh mij rengz mij banqfaz, yienghneix couh ndaej hawj vunz yawjraen gij rengz Gihduz yienh youq gwnz ndang gou hah.

¹⁰ Sojhij gou vih Gihduz hwj nyienh'eiq yienghneix mij rengz mij banqfaz, nyienh'eiq souh daengz vunz yawjngawz, souh nanh, souh bwkhaih, souh haemzhoj, aenvih gou seizlawz mij rengz mij banqfaz, seizlaw couh ndaej baengh Gihduz dih rengz hwj ndaej miz rengz lo.

Baujloz gvansim Gohlimzdoh gyauqveiq

¹¹ Baenjlaiz gou wnggai dwg faenhsou haenh hih, hoeng, gou ngaiz faenhsou bwk hwj bienq boux vunz ngawz he gag haenh bonjfaenh lah. Gannaeuz gou mbouj suenq guxmaz vunz lah, hoeng, caemh mbouj dwg naeuz it di cungj beij mbouj hwnj doenghheij gag naemqnaeuz bonjfaenh dwg ceiq rem hih dwzbaijyienz haj.

¹² Gou youq faenhsou mwnq hih mwhde, cungj dwg naenxsim raixcaix, caemh guh baenx haujlai geizmiuj gingjgyauj hih saeh hwj ndaej cingqmingz gou dwg dwzbaijyienz he.

¹³ Cawzok gou mbouj hawj faenhsou gyauqveiq rap gij saenghhozfeiq gou, faenhsou soj ndaej yangjcouq hih miz yienghlawz mbouj ndaej luj gizdah gyauqveiq nej? Doiq mbouj hwnj lo, gou mbouj laeng faenhsou aeu saenghhozfeiq; cingj faenhsou yienzliengh gou!

¹⁴ Hawjm'z yawj hux, gou seizneix caiq cwnjbiq bae faenhsou mwnq mbat daixsam lo. Mbat neix gou ciuqyiengh mbouj hawj faenhsou rap gij saenghhozfeiq gou, aenvih gou muengh ndaej hih dwg faenhsou, mbouj dwg faenhsou hih cienzcaiz law. Gou caeuq faenhsou caenh luj bohlwg ityiengh; guh bohmeh hih wngdang vih lwg cwk cienzcaiz, mbouj gouz lwg cwk cienzcaiz hwj ciengx bohmeh law.

¹⁵ Gou vih ij bang faenhsou, cungj nyienh'eiq sijndaej sojmiz hih, simqciq sijndaej diuz mingh bonjfaenh gou. Nanzdauh gou yied yienghneix aiq faenhsou, faenhsou couh yied mbouj aiq gou lo mah?

¹⁶ Suenq lox; mboujguenj gou baenzlawz mbouj aeu faenhsou gijmaz, ciuqyiengh ij miz vunz naeuz gou dwg gyaujvaz, miz vunz naeuz gou dwg siengj yaeuh faenhsou.

¹⁷ Hoeng, gou caemh baij vunz bae faenhsou mwnq goq hah; gyoengqde ciemq faenhsou bienxngeiz lo mah?

¹⁸ Gou gienq Dizdoh bae faenhsou mwnq, caemh baij boux beixnuengx mwnq caeuq de itheij bae. Yiengq, Dizdoh caemh ciemq faenhsou bienxngeiz lo mah? De caeuq gou soj guh hih mbouj dwg cungj dwg doxdoengz daiqduq, doxdoengz guhfap mah?

¹⁹ Gou yienghneix naeuz, faenhsou dwg mbouj dwg naemqnaeuz gyoengqraeuz ngengh ij naeuz bonjfaenh dwg deng hih nej? Gizsaed, gyoengqraeuz gangj hih gij vah neix dwg ciuq haeuj gij vunz Gihduz wnggai gangj hih vah lah, dwg doiq ndaej hwnj Cangqdiq he lah. Gak boux beixnuengx hax, gyoengqraeuz soj guh hih saeh cungj dwg doiq faenhsou miz ik hih.

²⁰ Hoeng, gou vanzlij dwg you gou caiq bae faenhsou mwnq, raen faenhsou vanzlij dwg mij ciuq gou soj muengh hih yienghmwnq bae gaijgoq, yienghneix gou couh mij hab faenhsou soj muengh hih. Caemh vanzlij you raen faenhsou vanzlij mbouj doxhuz, rahoengz, aeuqheiq, faen banghbaij, bangjlaih, gangj vunz vaihvah, rasang, luenh nauhsaeh.

²¹ Gou caemh you gou bae faenhsou mwnq, gou sinq dih Cangqdiq hawj gou youq dangqnaj faenhsou saetnaj, couh vih gou yawjraen doenghheij famh coih goq hih, vanzlij guh doenghgij yalw hih, guhyoux hih, guh doeg guh sieb hih, vanzlij mboujyaengz gaijgoq hih hwj siengsim.