Gohlimzdoh Ngeih 11 - Gij Baujcingq Moq Caeuq Geij Bonj Gij Baujcingq Daeuzdaeuz

Baujloz caeuq gyaj dih dwzbaijyienz

¹ Gou muengh faenhsou, cungjsuenq naeuz gou miz di ngawz he, faenhsou cungj ndaej naenxsim nyiuz gou. (Gizsaed gou rox faenhsou doiq gou gaenq gaeuq naenxsim lo.)

² Gou luj Cangqdiq aiq faenhsou yienghmwnq aiq faenhsou, aiq daengz mbouj siengj faenhsou bae gaen vunz, aenvih gou gaenq dawz faenhsou boiq hawj Gihduz lo, caemhdangq luj dawz dah lwgsau mijyaengz haq goq, mijyaengz ngaiz vunz yaek goq he boiq hawj boux vunzsai he lo.

³ Hoeng, gou lau faenhsou ngaiz vunz yaeuh hwj mbouj caiq caensim aiq Gihduz, caemh luj Yaqvah ngaiz duz ngwz yaeuh yienghmwnq,

⁴ aenvih gou rox, hauhnaeuz miz vunz daengz faenhsou mwnq cenzgangj boux mbouj dwg gyoengqraeuz cenzgangj hih Yehsuh, cixnaeuz hawj faenhsou ndaej gij hoenzsaenz faenhsou mijyaengz ndaej goq he, cixnaeuz gangj gij siuhsiz mbouj dwg faenhsou soj sinq hih gij ndei siuhsiz mwnq, faenhsou cungj haenj, cungj mbouj fanjdeiq.

⁵ Gou naemj bonjfaenh gou mij gijmaz naeuz beij mbouj hwnj doenghheij gag naemqnaeuz bonjfaenh dwg dwzbaijyienz, dwg ceiq rem ceiq ak he he.

⁶ Gannaeuz gou mbouj ndaej luj doenghheij vunz miz goujcaiz hih lah, hoeng, doiq miz ciqsiz ma gangj, gou mbouj beij vunz ca; gij neix gou gaenq dunghgoq gak yiengh ma cingqmingz hawj faenhsou rox lo.

⁷ Gou dawz Cangqdiq dih ndei siuhsiz cenz naeuz faenhsou ni, gou coengzlaiz mij laeng faenhsou aeu gijmaz goq; gou gag yawj mbouj hwnj bonjfaenh gou, dauq yawjhwnj faenhsou. Nanzdauh gou yienghneix guh loek lo mah?

⁸ Gou vih ij begbeg bang faenhsou hwj laeng daixlingh aen gyauqveiq aeu saenghhozfeiq, caenh luj ciengj gyoengqde aeu ityiengh.

⁹ Gou youq faenhsou mwnq, mboujguenj mbouj miz gijmaz, coengzlaiz cungj mbouj gouz faenhsou bang goq, mbouj hawj faenhsou dang goq. Gou sojmiz ij yungh hih cungj dwg gij lwgsae Majgizdoenq soengq hawj he. Gou lauxsaed gangj, mboujguenj doenghbaez, seizneix caeuq baezneix, gou cungj mbouj hawj faenhsou dang.

¹⁰ Gou gamj doiq gij saedsaeh Gihduz youq ndaw sim gou baujcingq, gou yienghneix gag haenh, youq Yaqgaihyaq Saengj mij'z vunz gamj naeuz gou.

¹¹ Gou vihmaz yienghneix naeuz gou mbouj veiq hawj faenhsou dang nej? Nanzdauh gou yienghneix naeuz couh mbouj dwg aiq faenhsou lo mah? Mbouj dwg law! Gou dwg aiq faenhsou hih; gij neix Cangqdiq dwg rox hih.

¹² Gou saedsaeh naeuz sou ni, gou baezneix ciuqyiengh mbouj hawj faenhsou dang; gou ij giqcuz yienghneix guh, vih mbouj hawj doenghheij gag naeuz bonjfaenh dwg dwzbaijyienz haenh naeuz bonjfaenh gyoengqde caemh caeuq gyoengqraeuz doxdoengz.

¹³ Doengh cungj vunz neix dwg gyaj dih dwzbaijyienz he; gyoengqde gyajcang guh Gihduz dih dwzbaijyienz hwj daeuj coemx vunz.

¹⁴ Gizsaed, gou naeuz hax, gijn'x mbouj geizheih hih nej, aenvih daiqlienz Sajdanq fangzvuengz cungj caemh rox cang guh bouxcai rongh sagsag Cangqdiq he.

¹⁵ Sojhij, Sajdanq dih doenghheij mageq de cang guh vunz simndei simsoh, cix ij miz guxmaz hwj; gijn'x, caemh mbouj geizheih hih nej. Cijmboujgoq gyoengqde daengz gatsat caemh deuz mbouj goq bauqwngq dawz hih lah.

Baujloz dawz nanh ma dangq najrongh

¹⁶ Gou caiq naeuz sou, mboujguenj byawz cungj mbouj wnggai naemqnaeuz gou dwg vunz ngawz, hoeng, hauhnaeuz faenhsou cungj ij yawj gou dangq dwg vunz ngawz caemh ndaej; yienghmwnq haemq ndaej hawj gou dangq vunz ngawz yienghmwnq hwj gag haenh bonjfaenh.

¹⁷ Gou seizneix soj gangj hih vah mbouj dwg bouxcawj raeuz hawj gou gangj hih law; dwg gou luj vunz ngawz yienghmwnq mbouj rox najnyaenq gag gangj gag haenh hih lah.

¹⁸ Gou naemj, giqyienz faenhsou miz haujlai vunz ciuq lajmbwn dih yawjfap ma gag haenh bonjfaenh hih vwz, yiengq gou caemh vihmaz mbouj ndaej gag haenh bonjfaenh gou hih nej?

¹⁹ Faenhsou cungj naemqnaeuz bonjfaenh faenhsou coengjmingz raixcaix, ndaej hozraez dingq vunz ngawz gangj vah,

²⁰ simqciq daiqlienz miz vunz ep faenhsou hawj faenhsou guh hoiq, ciengj aeu gij doxgaiq faenhsou, coemx faenhsou, rasang, yawj faenhsou mbouj hwnj rwz, doh baj naj faenhsou, faenhsou cungj ndaej souh mbouj aeuqheiq.

²¹ Gou yienghneix gangj, gou roxnginh mboujeiqseiq; gou caemh rox, gou mij mbeihung, luj cungj saeh neix, gou mbouj gamj hah. Hoeng, gou gangj gawq vah ngawz he; hauhnaeuz miz vunz gamj gag haenh bonjfaenh nex, gou caemh gamj gag haenh bonjfaenh gou hah.

²² Yiengq, hauhnaeuz miz vunz gag naeuz bonjfaenh dwg Hihbwzlaiz vunz nex, gou caemh naeuz gou caemh dwg hah. Miz vunz gag haenh naeuz bonjfaenh dwg Hijswzlez vunz, gij vunz Cangqdiq senj hih nex, gou caemh naeuz gou caemh dwg hih. Miz vunz gag naeuz bonjfaenh dwg gij lwglan Yaqbwzlahhanj hih nex, gou caemh naeuz gou caemh dwg hih.

²³ Miz vunz gag naeuz bonjfaenh de dwg bouxhoiq Gihduz nex, gou gamj naeuz gou engqgya dwg. (Ox, gou caenh lujnaeuz fatvangh hoh nwih, gingqyienz gag haenh bonjfaenh lah.) Gou beij gyoengqde guh hong engqgya dwgrengz, engqgya lai ngaiz gyaeng haeuj ndaw lauz bae, engqgya ngaiz vunz doh, engqgya ngaiz ij rai senxsenx.

²⁴ Gou miz haj mbat ngaiz gij vunz Youzdaiq aeu bien naeng ma fad, moix mbat ngaiz fad baenx samcib gouj mbat,

²⁵ ngaiz faexmbaenq doh goq sam mbat, ngaiz vunz aeu rin dub goq mbat he, ngaiz ruz vaih youq ndaw haij sam mbat, sam mbat ndaw de miz mbat he ngaiz youq ndaw haij cangh baenxngwnz baenxngoenz goq.

²⁶ Vanzlij miz siengzseiz ok roen gyae roeb daengz goq dah veizyiemj, roeb daengz caeggeq duet roen dih veizyiemj, vanzlij miz doenghheij caeuq gou doxcaemh minzcuz he caeuq doenghheij linghvaih minzcuz he dih vunz fanjdeiq, vanzlij youq ndaw singz, youq rogndoi roeb daengz veizyiemj, ndaw haij roeb daengz veizyiemj caemh vanzlij ngaiz doenghheij gyaj sinq bouxcawj raeuz Yehsuh he haih.

²⁷ Gou vanzlij guh hong dwgrengz sinhoj, siengzseiz mbouj ndaej ralaep, souh dungxiek hozhawq, mij mwnq youq he, daenj cix daenj mbouj raeuj.

²⁸ Yienghneix mbouj cuksuenq, vanzlij siengzseiz vih gak gyauqveiq hwj yousim.

²⁹ Yiengq, hauhnaeuz miz vunz doeknaiq, sinqsim mbouj gaeuq, gou bang de, gou mbouj naet mah? Hauhnaeuz vunz ngaiz vunz yaeuh guh loek, famh coih, gou mbouj vih de hwj simgaenj mah?

³⁰ Yiengq, ciuq yienghneix ma gangj, hauhnaeuz gou ij gag haenh bonjfaenh hih, wnggai haenh gou mij rengz mij banqfaz hwj haenh suenq lo.

³¹ Gou yienghneix naeuz, boux yungjyenj haenh hih bouxcawj raeuz Yehsuh Gihduz dih Cangqdiq daxboh, de rox gou gangj hih vah cungj dwg saedsaeh hih, mbouj gyaj hih.

³² Caemhdangq mwh gou youq Daqmajswqgwz hih mwhde, Yaqlijdaz goengjvuengz neix hawj goeng saengjcangj de baij bing souj baksingz hwj ijsiengj gaemh dawz gou,

³³ hoeng, miz vunz aeu loz daeuj hawj gou naengh youq ndaw de hwj daj conghcang gwnz ciengz duengq gou roengzma, hawj gou ndaej deuz ok ndaw fawz de.