Gohlimzdoh Ngeih 10 - Gij Baujcingq Moq Caeuq Geij Bonj Gij Baujcingq Daeuzdaeuz

Baujloz gangj daengz gij gienz bonjfaenh

¹ Gou, Baujloz, gannaeuz faenhsou naeuz gou goq, naeuz gou youq faenhsou mwnq mbeiiq, mbouj youq faenhsou mwnq nex couh mbeihung lo, hoeng, gou seizneix ij naeuz sou ni, gou seizneix siengj luj Gihduz yienghmwnq gangj vah swnh semxsemh soh semxsemh hwj doiq faenhsou naeuz.

² Couh dwg naeuz daengj gou bae faenhsou mwnq, hauhnaeuz cungj lij miz vunz naemqnaeuz gyoengqraeuz dwg ciuq gij vunz aen seiqgyaiq neix bae guh saeh nex, gou gaengjdingq yiemzgwz mbeihung mbouj hezhej hwj naeuz gyoengqde. Hoeng, gou vanzlij dwg cingj faenhsou gaejyungh hawj gou yienghmwnq naeuz faenhsou.

³ Gou naeuz sou ni, gannaeuz gyoengqraeuz dwg aen seiqgyaiq neix hih vunz lah, hoeng, dauq mij dwg ciuq aen seiqgyaiq neix hih guhfap bae guh,

⁴ aenvih gyoengqraeuz guh saeh soj yungh hih mbouj dwg yungh aen seiqgyaiq neix dih ujgiq, dauq dwg yungh gij ujgiq Cangqdiq nyok hawj hih ndaej caq doemq baujleij hih,

⁵ ndaej hoenxhingz gak cungj lanz mbouj hawj vunz rox gij saedsaeh Cangqdiq he hih lah, couh dwg naeuz doenghgij dauhleix gij vunz gag naemqnaeuz bonjfaenh coengjmingz raixcaix he, rasang he, vanzlij miz caemh ndaej hingz goq doenghheij caeuq Cangqdiq doxngig he, caemh ndaej hawj vunz dingq Gihduz he.

⁶ Gou gaenq guh ndei cwnjbiq lo; daengj daengz faenhsou fug dingq Gihduz le, gou gaengjdingq ij fad doenghheij mbouj fug dingq Gihduz he.

⁷ Yiengq gangj daengz doenghheij yawj vunz guh saeh he, hauhnaeuz miz vunz naemqnaeuz caenhgag bonjfaenh de cij suenq dwg haeuj Gihduz hih, de couh wnggai caiq ngeixngeix yawj: gyoengqraeuz caemh caeuq de doxdoengz suenq dwg haeuj Gihduz hih hah.

⁸ Gyoengqraeuz saedsaeh ndaej miz gij gienz bouxcawj raeuz soj nyok hawj he; cungjsuenq naeuz gou doiq gij gienz neix haenh gvaqbouh hwjx, cungj mbouj roxnginh najnyaenq hah, aenvih bouxcawj raeuz nyok gij gienz neix hawj gyoengqraeuz dwg doiq faenhsou miz ik hih, mbouj dwg miz haih law.

⁹ Gou yienghneix naeuz dwg muengh faenhsou gaejyungh naemqnaeuz gou sij saenq haep faenhsou,

¹⁰ aenvih faenhsou mwnq miz vunz naeuz: “Gaejyungh lau de; gannaeuz de sij saenq gangj hih vah ak raixcaix lah, hoeng, yawj boux vunz de it di cungj mbouj ak, itbanhbanh lah, gangj vah cix ngawz.”

¹¹ Hoeng, gou naeuz hax, gangj cungj vah neix hih vunz, de wnggai rox, gyoengqraeuz sij saenq baenzlaw naeuz, daengz gyoengqraeuz bae faenhsou mwnq hih caemh dwg baenzlaw guh hih.

¹² Danghyienz, gyoengqraeuz mbouj gamj caeuq doenghheij gag cej gag haenh bonjfaenh hih vunz doxbeij lo. Gyoengqde gag aeu bonjfaenh ma dag bonjfaenh, gag beij bonjfaenh, gag maezgae bonjfaenh; gou naeuz hax, luj doengh cungj vunz neix, saedsaed saehsaeh gaeuq ngawz huh.

¹³ Gangj daengz gyoengqraeuz, gyoengqraeuz mboujguenj guxmaz cungj mbouj gag haenh bonjfaenh gvaqbouh; gyoengqraeuz cijmboujgoq dwg ciuq Cangqdiq dingh hawj gyoengqraeuz hih yienghmwnq bae guh hih lah. Cangqdiq dingh hih ndaw de caemh bauhgvaz daengz faenhsou.

¹⁴ Yiengq, giqyienz bauhgvaz daengz faenhsou vwz, gyoengqraeuz dawz gij ndei siuhsiz Gihduz cenz bae daengz faenhsou mwnq couh mbouj suenq gvaqbouh lo.

¹⁵ Gyoengqraeuz haenh hih, caenhgag haenh gyoengqraeuz soj guh daengz hih lah. Heijvunz guh hih, gyoengqraeuz mbouj gamj dawz ma dangq dwg bonjfaenh guh hwj haenh nej. Hoeng, gyoengqraeuz muengh faenhsou sinq Gihduz hih sim engqgya gyenhdingq, yienghmwnq couh ndaej hawj gyoengqraeuz engqgya ndaej youq Cangqdiq soj dingh hih, ndaej youq faenhsou mwnq dawz gij ndei siuhsiz Cangqdiq cenz roengzbae.

¹⁶ Mbouj danhcij ndaej cenz hawj faenhsou, caemh vanzlij ndaej cenz hawj doenghheij mij'z vunz cenz naeuz gyoengqde ni he; heijvunz soj guh hih, gyoengqraeuz mbouj aeu ma dangq guh gij bonjfaenh hwj haenh.

¹⁷ Cingq luj ndaw Singqgingh ndaw de soj sij naeuz hih: Ij haenh, couh wnggai haenh Cangqdiq.

¹⁸ Aenvih cingqcaen boiqndaej haenh hih dwg gij vunz bouxcawj raeuz soj haenh hih lah, mbouj dwg doenghheij vunz gag cej gag haenh bonjfaenh hih law.