Gohlimzdoh It 9 - Gij Baujcingq Moq Caeuq Geij Bonj Gij Baujcingq Daeuzdaeuz

Dwzbaijyienz dih gienzliz

¹ Nanzdauh gou mbouj dwg swqyouz hih haj? Gou mbouj dwg dwzbaijyienz haj? Gou mbouj dwg raen goq bouxcawj raeuz Yehsuh Gihduz hih haj? Faenhsou mbouj dwg gou guh gij hong bouxcawj raeuz dih baengzgawq haj?

² Sojhij, cungjsuenq naeuz vunz yawj gou mbouj dwg boux dwzbaijyienz he hwjx, faenhsou cungj mbouj ndaej naeuz gou mbouj dwg hah, aenvih faenhsou couh dwg gou daiq hawj faenhsou sinq Gihduz he; gij neix couh ndaej cingqmingz gou dwg bouxcawj raeuz senj gou hawj gou guh boux dwzbaijyienz he lo.

³ Gou doiq doenghheij gvaiq gou saemjcam gou hih vunz cungj dwg naeuz:

⁴ Nanzdauh gou mij'z gienz gauq guh gij hong Cangqdiq hwj ndaej gw hih mah?

⁵ Nanzdauh gou mij'z gienz ndaej luj gizdah dih dwzbaijyienz, beijgangj luj daegnuengx bouxcawj raeuz caeuq Bijdwz yienghmwnq aeu gij vunzbaz sinq Gihduz he ma guh yah, daiq de okbae guh gij hong Cangqdiq?

⁶ Nanzdauh caenhgag gou caeuq Bahnazbah bietdingh ij gag guh hong cij ndaej miz gw?

⁷ Gou cam faenhsou, miz byawz dang bing hih gag daiq gij gw he bae nej? Miz byawz ndaem suen mak buzdauz he, hoeng, dauq mij gw gij mak de nej? Caemh miz byawz ciengx baenx gyoengq yiengz, hoeng, caemh mij gw gij nauq yiengz de nej?

⁸ Gou gangj hih doenghgij vah neix, faenhsou dwg mbouj dwg cungj naemqnaeuz dwg gou gag gangj hih nej? Gizsaed, doenghgij vah neix Cangqdiq youq ndaw Mohsih dih fazliz caemh dwg yienghneix naeuz hih,

⁹ ndaw de naeuz: Duz cwz dawz muh raenx haeux, mbouj ndaej daep mob hawj duz de. Nanzdauh Cangqdiq gangj hih gij vah neix caenhgag dwg gvansim duz cwz mah?

¹⁰ Mbouj dwg gvansim gyoengqraeuz mah? Gou naeuz hax, mingzmingz dwg doiq gyoengqraeuz gangj hih max. Beijgangj naeuz miz bouxlawz nungzminz dajgeng dajndaem mbouj muengh ndaej miz haeux sou haeujma nej? Yienghneix muengh dwg wngdang hih.

¹¹ Yiengq, giqyienz dwg wngdang hih, hauhnaeuz gyoengqraeuz dawz gij ndei siuhsiz Cangqdiq cenzgangj naeuz sou ni, caiq dajlaeng faenhsou sou ndaej gij gw he, yienghneix suenq gvaqbouh lai laq?

¹² Yiengq, caiq hauhnaeuz heijvunz miz gij gienzliz ndaej dajlaeng faenhsou aeu ndaej gij gw he, gyoengqraeuz mbouj engqgya miz cungj gienz neix maz? Hoeng, gyoengqraeuz coengzlaiz mbouj yungh gij gienz neix, mbouj laeng faenhsou aeu goq, dauqfanj vih ij cenz gij ndei siuhsiz Gihduz hwj souh daengz nanh lah; gyoengqraeuz yienghneix guh dwg mbouj siengj hawj gij ndei siuhsiz Gihduz ngaiz souh daengz ingjyangj.

¹³ Nanzdauh faenhsou mbouj rox, youq gunghdenq Cangqdiq guh hong hih couh ndaej daj gunghdenq lingx gij gw he, guh gij hong dajbwiz hih couh ndaej aeu gij dajbwiz gwnz daiz.

¹⁴ Yiengq caemh doxdoengz, bouxcawj raeuz caemh yienghneix dingh naeuz: guh gij hong cenzgangj de dih ndei siuhsiz hih caemh gauq guh gij hong neix gw.

¹⁵ Hoeng, gangj daengz miz gij gienz neix, gou mij yungh goq; gou seizneix yienghneix sij saenq hawj faenhsou mbouj dwg ij ceng hawj faenhsou yienghneix doiq gou law. Gangj lauxsaed vah, gou cingxnyienh rai iek, cix mbouj hawj vunz naemqnaeuz gou dwg vih gw hwj cij cenz gij ndei siuhsiz lah.

¹⁶ Cijmboujgoq gou guh gij hong cenzgangj Cangqdiq dih ndei siuhsiz mij gag haenh gou goq, aenvih gou guh gij hong cenzgangj neix dwg Cangqdiq baij gou hawj gou cenz hih, dwg gou wnggai guh hih. Hauhnaeuz gou mbouj cenz, gou wnggai hab satsoq.

¹⁷ Yiengq, hauhnaeuz dwg gou nyienh'eiq cenz hih, gou couh ndaej cangjliq lo. Hoeng, mboujguenj baenzlawz, cungj dwg Cangqdiq gyau hawj gou, dwg gou dih yimqmuq.

¹⁸ Yiengq, ciuq luj yienghneix ma yawj, gangj daengz gou ndaej cangjliq, dwg cangj ndaej gijmaz nej? Gou naeuz sou ni hax, couh dwg gou dawz gij ndei siuhsiz Cangqdiq cenz hawj vunz rox, hawj vunz begbeg ndaej gij ndei siuhsiz neix hih gij cangjliq neix lah. Couh vih yienghneix, gou mij yungh gij gienz gou guh cenzgangj wnggai ndaej hih gienzliz.

¹⁹ Gou gannaeuz dwg boux swqyouz mij'z vunz guenj he lah, hoeng, gou vih ij cenzgangj Cangqdiq dih ndei siuhsiz hwj hawj haujlai vunz ndaej gouq, gou nyienh'eiq guh sojmiz vunz dih hoiq.

²⁰ Gou caeuq Youzdaiq vunz youq itheij nex, gou couh guh Youzdaiq vunz, muzdiz dwg siengj hawj gyoengqde sinq. Couh dwg naeuz caeuq doenghheij ciuq Mohsih fazliz bae guh hih vunz youq itheij hih, gou couh luj doenghheij vunz ciuq Mohsih fazliz bae guh hih vunz. Baenjlaiz gou mbouj souh fazliz dih guenjciq hih, hoeng, gou dauq luj souh fazliz guenjciq, vih dwg ij hawj gyoengqde sinq.

²¹ Gou caeuq doenghheij mbouj dwg souh daengz Mohsih fazliz dih guenjciq hih vunz youq itheij, gou couh luj mbouj dwg souh Mohsih fazliz guenjciq hih vunz, muzdiz dwg siengj hawj gyoengqde sinq. (Gou yienghneix guh gaenhbaenj mbouj dwg naeuz gou couh mbouj hengz Cangqdiq dih fazliz, dauq dwg soenhsouj Gihduz soj son hih lah.)

²² Gou caeuq doenghheij daiq siujsim lau guh loek hih vunz youq itheij, gou couh luj gyoengqde yienghmwnq, muzdiz dwg siengj hawj gyoengqde sinq. Gou mboujguenj caeuq guxmaz vunz youq itheij, cungj ij gaen guxmaz vunz; mboujguenj baenzlawz, gou ceiq noix cungj ij gouq di vunz he.

²³ Gou soj guh hih cungj dwg vih ij cenzgangj Cangqdiq dih ndei siuhsiz hwj guh hih, vih ij ndaej caeuq vunz doxdoengz ndaej yangjcouq gij ndei siuhsiz Cangqdiq dih ndeicawq lah.

²⁴ Nanzdauh faenhsou mbouj rox, bijcaiq riq hih vunz, gannaeuz bouxboux cungj riq lah, hoeng, ndaej cangjliq hih cijngamq ndaej boux dog. Caemh doxdoengz, faenhsou caemh wnggai ciengj riq; yienghmwnq faenhsou cij ndaej cangjliq hah.

²⁵ Yiengq, famz camhgyah bijcaiq hih vunz cungj ij dunghgoq yiemzgwz ywnqlenq. Gyoengqde yienghneix guh cijmboujgoq dwg siengj hingz ndaej gij cangjbyimj rox naeuh rox lanh hih lah; hoeng, gyoengqraeuz siengj hingz hih gij cangjbyimj mwnq dauq dwg yungjyenj mbouj rox naeuh hih.

²⁶ Sojhij gou riq, mbouj dwg luenh riq, dauq dwg miz muzbiuh hih. Gou caemh luj hoenxgyienz yienghmwnq, mbouj dwg luenh hoenx, dauq dwg gaengjdingq ij hoenx deng mwnq he.

²⁷ Gou caemh luj ywnqdungqyienz yienghmwnq yiemzgwz, hawj aen ndang gou ndaej dingq gou cijveih. Hauhnaeuz mbouj dwg yienghneix, gou roengzrengz bae cenzgangj Cangqdiq dih ndei siuhsiz naeuz vunz ni, bonjfaenh gou dauq ngaiz Cangqdiq mbouj hawj gou miz gihveiq ndaej cangjliq.