Gohlimzdoh It 7 - Gij Baujcingq Moq Caeuq Geij Bonj Gij Baujcingq Daeuzdaeuz

Gangj daengz vwnhyenh

¹ Seizneix gou gangjgangj gvanhhih faenhsou sij saenq cam gou hih “vunzsai mbouj dep vunzbaz mbouj bungq vunzbaz dwg ceiq ndei hih” gij saeh neix.

² Cijmboujgoq, vih mbouj ngaiz famh gij mbouj hab famh hih hwj vanzlij dwg vunzsai wnggai gag miz mehyah bonjfaenh; vunzbaz caemh wnggai gag miz goengjgvan bonjfaenh.

³ Guh goengjgvan hih wnggai caenh goengjgvan dih swzyimq; guh mehyah hih caemh ij caenh mehyah dih swzyimq.

⁴ Guh mehyah hih, aen ndangdaej bonjfaenh mbouj caenhgag dwg aen ndangdaej bonjfaenh; goengjgvan caemh miz faenh. Caemh doxdoengz, guh goengjgvan hih, aen ndangdaej bonjfaenh, mehyah caemh miz faenh.

⁵ Sojhij guh gvanjbaz hih, cizfeih ij naebsim gouz Cangqdiq haenh Cangqdiq, song mbiengj cungj dungziq camqciz faen gag vunz gag ninz, mbouj nex, mbouj ndaej doi caeuq mehyah haj cixnaeuz caeuq goengjgvan ninz, mienxndaej Sajdanq fangzvuengz demq faenhsou dingx mbouj ndaej le, longx faenhsou.

⁶ Gou yienghneix naeuz, mbouj dwg naeuz mingqlingq faenhsou law; dwg dungziq faenhsou caemh ndaej camqciz yienghneix guh lah.

⁷ Gizsaed gou muengh faenhsou daixgya cungj luj gou seizneix mij'z yah. Hoeng, gak vunz dajlaeng Cangqdiq ndaej hih fuk mbouj doxdoengz; miz hih vunz dwg yienghneix, miz hih vunz dwg yienghmwnq.

⁸ Seizneix gou doiq doenghheij mij yah caeuq doenghheij mehmaiq he naeuz, hauhnaeuz gyoengqde ndaej luj gou yienghneix boux vunz dog goq saedceij nex, couh ndei lo.

⁹ Hoeng, hauhnaeuz gyoengqde dingx mbouj ndaej nex, yiengq couh aeu couh haq bax, mijn'x dingx mbouj ndaej siengjmuengh hwj ngaiz famh coih nex, hozmboujyienz aeu hah, haq hah suenq lox.

¹⁰ Yiengq doiq doenghheij gaenq gyezvwnh hih vunz nej, gou ij raengq gyoengqde, gizsaed mbouj dwg gou raengq gyoengqde law, dwg bouxcawj raeuz raengq gyoengqde lah, couh dwg guh yah hih mbouj ndaej caeuq goengjgvan bonjfaenh lizvwnh.

¹¹ Yiengq, hauhnaeuz liz nex, mbouj ndaej caiq haq haem lo; ij haq cij ndaej dauq haq laeng goeng gaxgonq de boiz. Guh goengjgvan hih caemh mbouj ndaej liz mehyah bonjfaenh.

¹² Yiengq gangj daengz gizdah vunz (gij neix dwg gou dih iqswh he, mbouj dwg bouxcawj raeuz dih iqswh law), hauhnaeuz miz boux beixnuengxlawz mehyah de mbouj dwg sinq Gihduz hih, meh de nyienh'eiq caeuq de saenghhoz roengzbae, yiengq boux de couh mbouj ndaej liz mehyah de.

¹³ Caiq hauhnaeuz miz bouxlawz goeng gojyez de mbouj dwg sinq Gihduz hih, goeng de caemh nyienh'eiq caeuq de saenghhoz roengzbae hih, de couh mbouj ndaej liz goeng de,

¹⁴ aenvih doenghheij goengjgvan mbouj sinq Gihduz hih, gyoengqde ndaej vih mehyah gyoengqde sinq Gihduz hwj Cangqdiq caemh haenj gyoengqde, hawj gyoengqde ndaej gaepfaenh haeuj gij vunz de. Caemh doxdoengz, doenghheij mehyah mbouj sinq Gihduz hih, gyoengqde caemh vih goengjgvan gyoengqde sinq Gihduz hwj Cangqdiq caemh haenj gyoengqde, hawj gyoengqde ndaej gaepfaenh haeuj gij vunz de. Hauhnaeuz mbouj dwg yienghneix, gij lwg faenhsou couh mbouj ndaej suenq dwg Cangqdiq haenj he lo. Hoeng, seizneix gyoengqde dwg Cangqdiq hih vunz lo.

¹⁵ Yiengq, caiq hauhnaeuz song boux ndaw de boux mbouj sinq mwnq cungj ij liz lo, yiengq couh ajcaih de liz bax. Mboujguenj vunzsai haj cixnaeuz vunzbaz, roeb daengz cungj saeh neix cungj mbouj ndaej cengqgengz dingx, aenvih Cangqdiq senj gyoengqraeuz dwg hawj gyoengqraeuz bingzan hih.

¹⁶ Hoeng, guh yah hih, mwngz saekseiz lij ndaej daiq goeng mwngz, hawj de sinq Gihduz hwj ndaej gouq. Guh gvan hih, mwngz saekseiz caemh lij ndaej daiq mehyah mwngz, hawj de sinq Gihduz hwj ndaej gouq. Mwngz seizneix gaenhbaenj mbouj rox baezneix ij fatseng gijmaz.

Baujciz mbouj bienq

¹⁷ Mboujguenj baenzlaw, faenhsou gak vunz cungj ij wnggai ciuq Cangqdiq senj faenhsou hih, bouxcawj raeuz hawj faenhsou hih yienghmwnq bae goq saedceij. Gou yienghneix naeuz dwg doiq gak aen gyauqveiq dih yauhgyiuz lah.

¹⁸ Hauhnaeuz byawz youq Cangqdiq senj de hih mwhde gaenq gozlij lo nex, couh gaejyungh guqiq muenz; yiengq, hauhnaeuz sinq Gihduz mwhde mijyaengz gozlij nex, caemh mboujyungh ij gozlij cij ndaej nej,

¹⁹ aenvih goz mbouj gozlij mbouj suenq guxmaz; cijaeu ciuq Cangqdiq dih mingqlingq bae guh couh ndaej lo.

²⁰ Gak vunz cungj ij wnggai baujciz Cangqdiq senj mwngz hih mwhde mwngz dwg guxmaz couh dwg guxmaz bax; mboujyungh bienq nej.

²¹ Beijgangj naeuz Cangqdiq senj mwngz hih mwhde, mwngz dwg guh hoiq hih, yiengq mwngz couh gaejyungh vih yienghneix hwj simnyap; hauhnaeuz miz gihveiq nex, mwngz couh ij ceng aeu swqyouz.

²² Mboujguenj Cangqdiq senj mwngz hawj mwngz daeuj guh gij vunz bouxcawj raeuz hih mwhde, mwngz dwg bouxhoiq he cungj ndaej, cungj mbouj youqgaenj, aenvih seizneix mwngz youq ndaw lwgra Gihduz gaenq suenq dwg boux swqyouz vunz he lo. Caemh doxdoengz, mboujguenj Cangqdiq senj mwngz hih mwhde, mwngz dwg boux swqyouz vunz he, hoeng, seizneix mwngz dauq dwg bouxhoiq Gihduz he lah.

²³ Gou naeuz sou hax, faenhsou dwg Cangqdiq yungh gauhgyaq cueg faenhsou ma hih, sojhij faenhsou gaejyungh bienqbaenz guh gij hoiq vunz.

²⁴ Gak boux beixnuengx hax, mwh Cangqdiq senj faenhsou hih mwhde, faenhsou dwg guxmaz, gaep haeuj gij vunz Cangqdiq le, faenhsou caemh ij baujciz luj gaxgonq yienghmwnq dwg guxmaz.

Caiq gangj daengz gyezvwnh

²⁵ Gangj daengz doenghheij mij gyezvwnh hih vunz, bouxcawj raeuz mij gijmaz mingqlingq gou law, hoeng, aenvih bouxcawj raeuz doiq gou haijliengh, hawj gou ndaej suenq dwg boux sinq ndaej goq he, ndaej dawz gij iqgyenq gou gangj naeuz faenhsou ni.

²⁶ Ngeix daengz seizneix dih gvwnqnanz, ciuq gou ma yawj, vunz ceiq ndei ndaej baujciz luj seizneix.

²⁷ Yiengq, hauhnaeuz gaenq miz yah lo nex, couh mbouj ndaej siengj banqfaz duet de; mijyaengz miz yah hih, caemh gaej siengj banqfaz aeu.

²⁸ Hoeng, hauhnaeuz mwngz lij siengj aeu yah hih, caemh mbouj suenq famh coih; lwgsau ok haq, caemh mij maz naeuz famh coih. Cijmboujgoq gyezvwnh hih vunz baenx seiqvunz cungj miz haujlai mazfanz; gou dauj muengh faenhsou ndaej duet ok gij mazfanz neix.

²⁹ Gak boux beixnuengx hax, gou naeuz sou ni, bouxcawj raeuz Yehsuh Gihduz couh ij dauq daeuj lo; daj seizneix hwnj, miz yah hih, mbouj ndaej caenhrox cij siengj daengz yah, ij luj mij'z yah yienghmwnq, ij naebsim bae swqhaeuh Cangqdiq.

³⁰ Sojhij gou naeuz sou hax, mboujguenj baenzlawz, cungjsuenq naeuz miz siengsim gikheiq daej, miz sim'angq, miz gyadangq, dungjdungj cungj ij luj mbouj miz hwj naebsim bae swqhaeuh Cangqdiq;

³¹ youq lajmbwn ndaej yangjcouq hih, ij miz cungj daiqduq naeuz mij yawjnaek aen seiqgyaiq neix cij deng, aenvih gyoengqraeuz caenra raen aen seiqgyaiq neix hih couh ij goq lo.

³² Gou yienghneix naeuz dwg muengh faenhsou mbouj yousim gijmaz. Mij'z yah hih vunz dwg ndaej naebsim bae guh gij hong bouxcawj raeuz hih, dwg siengj hawj bouxcawj raeuz sim'angq hih.

³³ Miz yah hih vunz cungj dwg siengj lajmbwn hih saeh, cij rox guq daengz ij baenzlaw hawj yah sim'angq lah,

³⁴ yienghneix de couh mbouj ndaej naebsim bae guh gij hong bouxcawj raeuz lo. Vunzbaz caemh doxdoengz. Mij haq mij gvan hih vunzbaz dwg ndaej naebsim bae guh gij hong bouxcawj raeuz hih; ndangdaej gyoengqde caeuq gij hoenzsaenz gyoengqde cungj dwg yiengq laeng bouxcawj raeuz hih. Hoeng, gaenq haq hih vunzbaz nej, cungj dwg gvansim lajmbwn hih saeh, cungj dwg ij baenzlaw siengj hawj goengjgvan bonjfaenh sim'angq hih.

³⁵ Gou yienghneix naeuz dwg doiq faenhsou ndei hih, dwg siengj hawj faenhsou guh gij hab guh hih saeh, hawj faenhsou ndaej naebsim bae guh gij hong bouxcawj raeuz hih lah, mbouj dwg ij haed faenhsou law.

³⁶ Gangj daengz hauhnaeuz miz vunz caeuq dah baengzyoux de cungj doxhab'eiq lo, dah de nienzgeij caemh miz lo, boux vunzsai de caemhcaiq lau mbouj ndaej gag haed bonjfaenh de hwj doiq dah de guh gij mbouj hab guh he, siengj vaiqdi gyezvwnh hih, yiengq couh gyezvwnh bax; yienghneix caemh mbouj suenq dwg famh coih hih.

³⁷ Hoeng, hauhnaeuz boux vunzsai de dingx ndaej, sim caemh gyenhdingq, mbouj caeuq dah de gyezvwnh, yiengq caemh baenz.

³⁸ Yiengq, ciuq luj yienghneix ma yawj, caeuq dah baengzyoux de gyezvwnh caemh dwg baenz hih, hoeng, hauhnaeuz mbouj gyezvwnh nex, engqgya lai baenz.

³⁹ Caiq gangj daengz doenghheij vunzbaz gaenq haq he, goengjgvan lij lix hih mwhde, guh yah hih mbouj ndaej guh gij saeh doiq mbouj hwnj goengjgvan de, caeuq daixlingh boux vunzsai. Yiengq, hauhnaeuz goeng de rai lo nex, meh de couh ndaej swqyouz lo, ndaej caeuq de haenj hih vunzsai gyezvwnh lo, cijmboujgoq dwg ndaej haq laeng boux vunzsai caemh dwg sinq bouxcawj raeuz Yehsuh Gihduz he.

⁴⁰ Hoeng, ciuq gou ma gangj, hauhnaeuz meh de mbouj caiq haq engqgya miz fuk. Gou yienghneix gangj, gou naemj dwg Hoenzsaenz Cangqdiq caemh hawj gou gangj hih.