Gohlimzdoh It 6 - Gij Baujcingq Moq Caeuq Geij Bonj Gij Baujcingq Daeuzdaeuz

Gij vunz Cangqdiq mbouj wnggai doxgauq

¹ Gangj daengz faenhsou ndaw de miz vunz doxceng, vihmaz gauq bae daengz doenghgij vunz mbouj sinq Gihduz mwnq bae nej? Vihmaz mbouj cingj doenghgij vunz sinq Gihduz he daeuj buenq nej?

² Nanzdauh faenhsou mbouj rox gyoengqraeuz sinq Gihduz hih vunz baezneix ij caeuq de itheij saemjbuenq dienyah hih mah? Yiengq, giqyienz faenhsou ndaej saemjbuenq dienyah hih vwz, nanzdauh faenhsou mbouj miz bonjsaeh ndaej saemjbuenq cungj saeh saepsoiq neix haj?

³ Nanzdauh faenhsou mbouj rox, daengz mwhmwnq faenhsou caemh ndaej saemjbuenq bouxcai Cangqdiq hih mah? Yiengq, ciuq luj yienghneix ma gangj, faenhsou mbouj engqgya ndaej saemjbuenq aen seiqgyaiq neix hih saeh maz?

⁴ Sojhij, hauhnaeuz faenhsou miz cungj saeh neix, faenhsou vanzlij ij cingj doenghgij vunz mbouj sinq Gihduz he gyauqveiq yawj mbouj hwnj he daeuj buenq saeh haem lwi?

⁵ Gou yienghneix naeuz dwg siengj hawj faenhsou rox saetnaj saetnyaenq lah. Nanzdauh faenhsou ndaw de cungj mij saek boux coengjmingz miz bonjsaeh ndaej buenq gij saeh beixnuengx doxceng hih haj?

⁶ Geizheih, faenhsou cungj dwg sinq Gihduz hih vunz hah, hoeng, gingqyienz doxgauq; mbouj danhcij yienghneix, vanzlij engqgya gauq bae daengz doenghheij vunz mbouj sinq Gihduz he mwnq bae lah.

⁷ Gizsaed faenhsou doxgauq gaenq dwg daix loek hih lo. Vihmaz faenhsou mbouj sawqsawq guh daengz cingxnyienh ngaiz vunz daekcoih, ngaiz coem, cix mbouj bae daekcoih vunz hih nej?

⁸ Faenhsou guh mbouj daengz yienghneix cixbah lo, hoeng, dauq bae daekcoih vunz, sienghaih vunz, yaeuh vunz, daiqlienz doenghgij beixbeix nuengxnuengx faenhsou cungj ngaiz faenhsou yaeuh.

⁹ Nanzdauh faenhsou mbouj rox miz coih hih vunz mbouj ndaej gaep haeuj guek Cangqdiq hih haj? Gou naeuz faenhsou hax, gaejyungh gag yaeuh bonjfaenh lo; mboujguenj guh yalw ndaengndwet haj cixnaeuz baiq you, guhyoux haj cixnaeuz vunzsai caeuq vunzsai, vunzbaz caeuq vunzbaz guh gij yalw he,

¹⁰ guxcaeg cixnaeuz damsim, gw laeuj fiz cixnaeuz yug vunz, coemx vunz aeu doxgaiq, cungj mbouj ndaej gaep haeuj guek Cangqdiq.

¹¹ Faenhsou ndaw de miz hih vunz doenghbaez couh dwg yienghneix, hoeng, seizneix faenhsou gaenq dunghgoq bouxcawj raeuz Yehsuh Gihduz caeuq baengh Cangqdiq dih Hoenzsaenz hwj ndaej mienx coih, ndaej youq ndaw lwgra Cangqdiq suenq dwg boux mij'z coih he, ndaej guh gij vunz Cangqdiq he lo.

Aen ndang faenhsou dangq dwg gunghdenq Cangqdiq

¹² Yiengq aiq ij miz vunz naeuz: “Gijmaz saeh gou cungj hab ndaej guh,” yienghneix. Hoeng, gou naeuz hax, mbouj dwg naeuz yienghyiengh cungj doiq mwngz miz ik law; gannaeuz gijmaz saeh cungj ndaej guh lah, hoeng, ciuq gou ma yawj, gou mbouj hawj gij saehlaw gaemhanh gou law.

¹³ Yiengq caemh aiq ij miz vunz naeuz: “Gij gw dwg vih aen dungx; aen dungx caemh dwg vih gij gw,” yienghneix. (Yiengq, ciuq gou ma yawj hax, cungj dwg deng hih, hoeng cungj ij miz ngoenz he, Cangqdiq gaengjdingq ij hawj song yiengh neix bienqbaenz mij'z yungh.) Fanjgoqma, aen ndangdaej mbouj dwg vih guh ndaengndwet, dauq dwg ij vih bouxcawj raeuz hwj guh saeh hih; de dwg bouxcawj aen ndangdaej gyoengqraeuz hih.

¹⁴ Seizneix Cangqdiq mbouj danhcij hawj bouxcawj raeuz dauqlix, baezneix caemh vanzlij ij yungh gij akak rengzrengz de ma hawj gyoengqraeuz dauqlix.

¹⁵ Nanzdauh faenhsou mbouj rox aen ndang faenhsou dwg aen ndang Gihduz dih faenh he haj? Ndaej dawz aen ndang Gihduz bae caeuq doenghheij lauxgawj mwnq doxgaep haj? Baenzbaenz mbouj ndaej.

¹⁶ Faenhsou mbouj rox haj, byawz caeuq lauxgawj, byawz couh dwg caeuq lauxgawj gaep guh aen ndang he lo, aenvih ndaw Singqgingh ndaw de naeuz: Song boux ij gaep guh luj aen ndang he.

¹⁷ Hoeng, hauhnaeuz faenhsou caeuq bouxcawj raeuz doxgaep nex, couh dwg luj caeuq de caemh hoenzsaenz lo.

¹⁸ Sojhij faenhsou mbouj ndaej cimyex haeuj doenghheij ndaengndwet yalw he bae. Vunz mboujguenj famh gijmaz coih cungj mbouj caeuq aen ndangdaej miz gvanhaeh, caenhgag doenghheij guh ndaengndwet yalw he cij daekcoih daengz aen ndangdaej bonjfaenh.

¹⁹ Faenhsou wnggai rox, aen ndangdaej faenhsou dwg gunghdenq Hoenzsaenz Cangqdiq he. Aenvih Hoenzsaenz Cangqdiq dwg Cangqdiq nyok hawj faenhsou he, sojhij Hoenzsaenz Cangqdiq youq gwnz ndang faenhsou youq. Couh vih yienghneix hwj, aen ndang faenhsou mbouj caenhgag dwg aen ndang faenhsou, caemh dwg aen ndang Cangqdiq hah.

²⁰ Aenvih faenhsou dwg Cangqdiq yungh gauhgyaq cueg ma he, sojhij faenhsou wnggai youq gwnz ndang faenhsou yienh ok gij ndei he, mbouj hawj Cangqdiq saetnaj, wnggai hawj de najrongh.