Gohlimzdoh It 4 - Gij Baujcingq Moq Caeuq Geij Bonj Gij Baujcingq Daeuzdaeuz

Gihduz dih dwzbaijyienz

¹ Sojhij, mboujguenj byawz, cungj wnggai dawz gyoengqraeuz ma dangq dwg bouxhoiq Gihduz, dwg baij daeuj guh boux guenjgya guenj gij giqvaq Cangqdiq yienzlaiz de yo hwnjdaeuj mbouj hawj vunz rox he.

² Guh guenjgya hih bietdingh ij guh boux lauxsaed hawj bouxcawj sinq ndaej goq he.

³ Yiengq gangj daengz faenhsou cixnaeuz heijvunz baenzlawz yawj gou, gou cungj mbouj dawz haeuj rwz, mbouj haeuj uk. Gizsaed gou gaenhbaenj mbouj gag bingz bonjfaenh gou,

⁴ aenvih gou mij gijmaz doiq mbouj hwnj liengzsim he. Hoeng, mboujguenj guxmaz, caenhgag bouxcawj raeuz cij ndaej gyezdingq gou dwg guxmaz.

⁵ Sojhij faenhsou cungj mbouj ndaej youq bouxcawj raeuz mijyaengz dauq daeuj cihsenz gag luenh bingz vunz. Daengj daengz de dauq daeuj mwhde, de swhmboujyienz byoq gij miqmiz vunz, loh ok vunz dih siengjfap. Daengz mwhmwnq, Cangqdiq gaengjdingq ciuq gak vunz boiqndaej haenh hih ma haenh.

⁶ Gak boux beixnuengx hax, vih faenhsou hwj gou dawz gou caeuq Yaqbohloz ma guh beijgangj goq, siengj hawj faenhsou ndaej dajlaeng raeuz rox gawq vah neix dih iqswh, couh dwg: “Mbouj ndaej cauhgoq ndaw Singqgingh soj sij hih,” mienxndaej faenhsou gag haenh bonjfaenh naeuz “gou gaen byawzbyawz, gou gaen byawzbyawz,” yienghneix yawjhwnj boux mbouj hwnj boux.

⁷ Hoeng, dwg byawz hawj faenhsou caeuq vunz mbouj doengz hih nej? Faenhsou sojmiz hih, yienghlawz mbouj dwg Cangqdiq nyok hawj hih nej? Yiengq, giqyienz dwg Cangqdiq nyok hawj vunz hih vwz, faenhsou vihmaz ij gag haenh bonjfaenh nej, caenh lujnaeuz mbouj dwg Cangqdiq hawj hih nej?

⁸ Faenhsou naemqnaeuz bonjfaenh gaenq miz raixcaix, fouq raixcaix, leixhaih raixcaix luj ndaej dang vuengz lo, mbouj leix gyoengqraeuz lo. Hoeng, gou dauq muengh faenhsou cingqcaen dwg ndaej dang vuengz hah; yienghmwnq gyoengqraeuz caemh ndaej caeuq faenhsou itheij dang vuengz lo.

⁹ Hoeng, Cangqdiq dauq dawz gyoengqraeuz dangq luj doenghheij vunz fuhluj ngaiz youzhingz he, ngaiz baizdeiq youq gajlaeng hwj ij gaj he, aenvih gyoengqraeuz couh dangq luj ciengz heiq he, hawj lajmbwn hih vunz caeuq gwnzmbwn hih bouxcai Cangqdiq yawj lah.

¹⁰ Gyoengqraeuz vih Gihduz hwj ngaiz vunz yawj dangq dwg vunz ngawz he, hoeng, faenhsou dauq ndaej hawj vunz yawj faenhsou dangq dwg Gihduz hih boux coengjmingz he. Gyoengqraeuz ngaiz vunz yawjngawz, mij bonjsaeh. Hoeng, faenhsou nej? Faenhsou dauq dwg hawj vunz yawjdij, dwg vunz rem he.

¹¹ Itcig daengz seizneix, gyoengqraeuz cungj dwg gw mbouj imq, daenj mbouj raeuj, youq hix youq mbouj miz, hix ngaiz vunz doh hih doh.

¹² Gyoengqraeuz cungj dwg gag baengh gyoengqraeuz bonjfaenh guh hong dwgrengz cij ndaej gw. Mbouj danhcij dwg yienghneix, caiq ngaiz vunz yug, hoeng, gyoengqraeuz dauq ij hoh fuk hawj gyoengqde; vunz bwkhaih raeuz, raeuz dauq ij naenxhoz naenxheiq,

¹³ simqciq ngaiz vunz bangjlaih mwhde, cungj ij doiq gyoengqde ndei. Itcig daengz seizneix, vunz vanzlij yawj gyoengqraeuz dangq lajmbwn hih nyapnyap nyejnyej.

¹⁴ Gou sij doenghgij vah neix, mbouj dwg naeuz ij hawj faenhsou saetnaj saetnyaenq law, dauq dwg dawz faenhsou yawj dangq dwg gij lwg gou hwj daezsingj faenhsou lah.

¹⁵ Gannaeuz miz ciencien fanhfanh lauxsae dawz Gihduz hih saeh son naeuz sou ni lah, hoeng, miz aen sim luj aen sim daxboh yienghmwnq hih mbouj lai; gou dunghgoq cenz naeuz sou ni Cangqdiq dih ndei siuhsiz hwj ndaej guh daxboh sou.

¹⁶ Sojhij gou gouz sou hag gou.

¹⁷ Gou couh vih yienghneix, gou baij Dizmohdaiq bae faenhsou mwnq. Dizmohdaiq guh gij hong bouxcawj raeuz dwg boux sinq ndaej goq he, de caemhdangq dwg gou aiq hih lwg. De ij daezsingj faenhsou hawj faenhsou rox gou vih Gihduz hwj baenzlaw guh saeh, baenzlawz doiq vunz, daezsingj faenhsou hag gou. Gou youq gak aen gyauqveiq caemh gouz vunz yienghneix hag gou.

¹⁸ Gou rox faenhsou ndaw de miz hih vunz naemqnaeuz gou mbouj bae faenhsou mwnq lo, couh rasang yawj vunz mbouj hwnj rwz.

¹⁹ Hoeng hauhnaeuz bouxcawj raeuz hawj nex, mbouj geijlwh caez gou couh ij bae faenhsou mwnq lo. Daengz mwhmwnq, gou dauq ij yawjyawj doenghheij vunz rasang yawj vunz mbouj hwnj rwz mwnq dauqdaej gag rox gangj rumz gangj rengx haj, cixnaeuz cingqcaen miz gij rengz Cangqdiq.

²⁰ Hoeng guek Cangqdiq gaenhbaenj mbouj yawjnaek gangj rumz gangj rengx, dauq yawjnaek Cangqdiq nyok hawj hih rengz lah.

²¹ Yiengq gou cam faenhsou, daengz mwhmwnq, faenhsou nyienh'eiq gou baenzlaw nej? Hawj gou dawz faexbien bae fad vunz hajx, cixnaeuz hawj gou sim'unq simsoh aiq vunz hwj bae nej? Faenhsou gag naeuz bax.