Gohlimzdoh It 3 - Gij Baujcingq Moq Caeuq Geij Bonj Gij Baujcingq Daeuzdaeuz

Mbouj ndaej gag faen banghbaij

¹ Gak boux beixnuengx hax, gou lauxsaed naeuz sou ni, gou doenghbaez son faenhsou gij saedsaeh Cangqdiq, cungj mbouj dwg luj son doenghheij vunz miz Hoenzsaenz Cangqdiq yienghmwnq he, dauq dwg luj son doenghheij vunz haeuj aen seiqgyaiq neix he lah, aenvih faenhsou luj boux ngamqngamq sinq Gihduz mbouj geij caez he, luj lwgnding yienghmwnq mij rox saek yiengh he.

² Sojhij, gou son faenhsou, couh dangq luj aeu gij unq gij cuk he ma hawj faenhsou gw, mij dwg aeu gij gyeng he ma hawj faenhsou gw law, aenvih gij gyeng he faenhsou gw mbouj ndaej. Gou gangj lauxsaed vah, gizsaed seizneix faenhsou vanzlij ciuqyiengh dwg gw mbouj ndaej.

³ Gou vihmaz ij yienghneix naeuz nej, dwg aenvih faenhsou vanzlij ciuqyiengh dwg ciuq aen seiqgyaiq neix hih vunz ma guh saeh, vanzlij miz rahoengz hah, doxceng hah yienghneix. Yiengq, ciuq yienghneix ma yawj, mijyaengz ndaej cingqmingz faenhsou vanzlij dwg haeuj aen seiqgyaiq neix hih vunz maz, dwg ciuq aen seiqgyaiq neix hih vunz ma guh saeh hih maz?

⁴ Faenhsou ndaw de miz hih vunz vanzlij gag naeuz: “Gou dwg haeuj gij vunz Baujloz he,” caemh miz hih vunz naeuz: “Gou dwg haeuj gij vunz Yaqbohloz he.” Yiengq hawjm'z yawj hux, yienghneix mijyaengz ndaej gaeuq cingqmingz naeuz faenhsou dwg caeuq aen seiqgyaiq neix hih vunz doxdoengz maz?

⁵ Gizsaed Yaqbohloz suenq guxmaz nex? Baujloz caemh suenq guxmaz nex? Gyoengqraeuz cijmboujgoq dwg bouxhoiq Cangqdiq hwj mah, dwg ciuq bouxcawj raeuz soj raengq hih yienghmwnq ma son vunz, daiq vunz, hawj vunz sinq bouxcawj raeuz Yehsuh Gihduz hwj mah.

⁶ Gyoengqraeuz gak vunz cungj miz bouxcawj raeuz baij hawj raeuz hih hong: gou dwg guh ndaem he, Yaqbohloz dwg guh dwk raemx he, caenhgag Cangqdiq cij dwg ndaej hawj go de hwnj he.

⁷ Yiengq, ciuq yienghneix ma gangj, boux ndaem he caeuq boux dwk raemx he cungj mbouj suenq guxmaz; caenhgag Cangqdiq cij suenq guxmaz lah, aenvih dwg de hawj sojmiz hih ndaej hwnj.

⁸ Boux ndaem he caeuq boux dwk raemx he cungj dwg doxdoengz, caemh dwg ciuq gak vunz soj guh hih ma ndaej hih lah,

⁹ aenvih gyoengqraeuz dwg gij hoiq guh gij hong Cangqdiq he; faenhsou dangq dwg Cangqdiq dih reihnaz. Faenhsou caemhdangq dwg aen ranz Cangqdiq.

¹⁰ Gou dwg baengh Cangqdiq nyok hawj gou dih bonjsaeh hwj ndaej luj boux gyenqcuzswh yienghmwnq coengjmingz he, ndaej roengz ndei hauxranz, hawj vunz ndaej youq gwnz de dab hwnq hwnjbae. Hoeng gak vunz ijaeu siujsim cij ndaej baenzlaw youq gwnz de dab hwnq hwnjbae.

¹¹ Gij hauxranz neix gaenq roengz ndei lo; caiq mij'z vunz ndaej roengz daixlingh cungj hauxranz haem lo. Gij hauxranz gaenq roengz ndei neix couh dwg Yehsuh Gihduz lo.

¹² Yiengq, beijgangj naeuz miz vunz ij aeu gim haj cixnaeuz ngaenz, baujsig haj cixnaeuz faex cixnaeuz nyangjnyangj hazhaz ma dab guh hwnq hwnj gwnz de bae hih,

¹³ daengz mwhde swhmboujyienz loh okdaeuj, aenvih daengz ngoenz saemjbuenq vunz lajmbwn hih ngoenz mwnq dwg daiq miz feiz he; gij feiz neix dwg ndaej yienh ok gak vunz soj dab guh hwnq hwnjbae hih dauqdaej dwg baenzlaw yiengh.

¹⁴ Yiengq, hauhnaeuz byawz dab guh hwnq hwnjbae dingx ndaej feiz coemh nex, de couh ndaej cangjliq lo.

¹⁵ Yiengq, caiq hauhnaeuz byawz dab guh hwnq hwnjbae dingx mbouj ndaej ngaiz feiz coemh hih, de couh ngaiz coem lo; gannaeuz bonjfaenh de ndaej gouq lah, hoeng, de dangq dwg luj daj ndaw feiz deuz rai he lah.

¹⁶ Nanzdauh faenhsou mbouj rox faenhsou dangq dwg gunghdenq Cangqdiq, Hoenzsaenz Cangqdiq youq ndaw faenhsou youq mah?

¹⁷ Sojhij, hauhnaeuz miz vunz byaeu gunghdenq Cangqdiq nex, Cangqdiq gaengjdingq byaeu boux de, aenvih gunghdenq Cangqdiq dwg Cangqdiq youq he. Faenhsou dangq dwg gunghdenq Cangqdiq.

¹⁸ Gou naeuz sou ni hax, sou gaejyungh caiq gag yaeuh bonjfaenh, gag naemqnaeuz bonjfaenh dwg aen seiqgyaiq neix hih coengjmingz hih vunz haem lo. Ciuq gou ma gangj hax, faenhsou vanzlij dwg gag yawj bonjfaenh dangq dwg vunz ngawz suenq lo, yienghneix faenhsou cij ndaej cingqcaen suenq dwg coengjmingz vunz,

¹⁹ aenvih aen seiqgyaiq neix nginhnaeuz coengjmingz hih, youq ndaw lwgra Cangqdiq dauq suenq dwg ngawz hih, cingq luj ndaw Singqgingh ndaw de sij miz naeuz: Cangqdiq hawj boux coengjmingz he gag caij daengqgyauz hau raeuj.

²⁰ Ndaw de vanzlij caiq sij miz naeuz: Cangqdiq rox boux coengjmingz soj siengj hih cungj dwg luenh siengj he.

²¹ Sojhij mboujguenj byawz, cungj mbouj ndaej caiq gag haenh bonjfaenh dwg gaen byawz, haeuj byawz; gizsaed sojmiz hih cungj dwg faenhsou hih,

²² mboujguenj dwg Baujloz haj cixnaeuz dwg Yaqbohloz, cixnaeuz dwg Bijdwz cixnaeuz dwg seiqgyaiq cixnaeuz dwg lix, dwg rai, dwg seizneix, baezneix, sojmiz hih cungj dwg faenhsou liux.

²³ Hoeng, faenhsou dauq dwg haeuj Gihduz hih, Gihduz dwg haeuj Cangqdiq hih.