Gohlimzdoh It 2 - Gij Baujcingq Moq Caeuq Geij Bonj Gij Baujcingq Daeuzdaeuz

¹ Gak boux beixnuengx hax, mwh gou bae daengz faenhsou mwnq cenzgangj gij siuhsiz Cangqdiq vunz mijyaengz dingq goq he hih mwhde, gaenhbaenj mbouj dwg gangj doenghgij vah gyaeu cixnaeuz iqswh laeg he,

² aenvih gou gyezdingq goq naeuz mwh gou caeuq faenhsou youq hih mwhde, cawzok cenzgangj gvanhhih Yehsuh Gihduz caeuq de ngaiz ding hwnj gwnz gyaq cixcib bae hih gij saeh neix sat lo, gijmaz cungj mbouj gangj.

³ Hoeng, mwh gou bae daengz faenhsou mwnq hih mwhde, gou cungj simvueng ij rai bae, gou lau gou cenz mbouj deng, gangj mbouj deng.

⁴ Gou soj gangj soj cenz hih mbouj dwg baengh coengjmingz cixnaeuz baengh ndeidingq hih vah, dauq dwg baengh Hoenzsaenz Cangqdiq yienh ok dih rengz hwj

⁵ hawj faenhsou mbouj dwg vih vunz dih coengjmingz hwj sinq, dauq dwg vih Cangqdiq dih rengz hwj sinq lah.

Cangqdiq dunghgoq Hoenzsaenz de hawj raeuz rox dauhleix

⁶ Hoeng, doiq doenghheij vunz senqsi cix rox gij saedsaeh Cangqdiq, cix rox ndaej laeg he hih, gyoengqraeuz caemh gangj doenghgij dauhleix laeg neix, cijmboujgoq doenghgij dauhleix laeg neix mbouj dwg haeuj aen seiqgyaiq neix law, caemh mbouj dwg doenghheij youq aen seiqgyaiq neix dang ak gaem gienz, baezneix gaengjdingq ngaiz satsoq hih vunz rox hih gij dauhleix mwnq law.

⁷ Gyoengqraeuz soj gangj hih dauq dwg Cangqdiq gaxgonq yo hwnjdaeuj mbouj hawj vunz rox hih, dwg de daj mijyaengz cauh mbwn cauh deih cix dingh ndei ij hawj raeuz ndaej najrongh hih gij giqvaq mwnq lah.

⁸ Gij giqvaq neix youq aen seiqgyaiq neix dang ak gaem gienz hih gaenhbaenj mbouj rox. Hauhnaeuz gyoengqde rox, couh mbouj dawz veijdaq najrongh hih bouxcawj raeuz ding hwnj gwnz gyaq cixcib bae rai lo.

⁹ Cingq luj ndaw Singqgingh ndaw de soj sij naeuz hih: Cangqdiq vih gij vunz aiq de hwj soj cwnjbiq hih dwg vunz daiq raen cungj mijyaengz raen goq he, dingq cungj mijyaengz dingq goq he, simqciq dwg ngeix cungj mijyaengz ngeix daengz goq he.

¹⁰ Hoeng, Cangqdiq dunghgoq Hoenzsaenz bonjfaenh de hwj yienh hawj raeuz rox lo, aenvih Hoenzsaenz Cangqdiq rox sojmiz hih saeh; de yawj gijmaz cungj cingx goq gingq bohliz bae, daiqlienz ndaw sim Cangqdiq dih gij iqswh laeglaeg de, de cungj caemh rox.

¹¹ Caemhdangq naeuz it boux vunz, de dih cawjeiq, cawzok bonjfaenh de dih hoenzsaenz, lij miz byawz ndaej rox daengz ndaw sim de dih iqswh haem nej? Caemh doxdoengz, cawzok Hoenzsaenz Cangqdiq, caemh mij'z vunz ndaej rox Cangqdiq bonjfaenh de dih iqswh lo.

¹² Gyoengqraeuz soj ndaej dih Hoenzsaenz mbouj dwg haeuj aen seiqgyaiq neix dih hoenzsaenz, dauq dwg Cangqdiq dih Hoenzsaenz lah. Cangqdiq dih Hoenzsaenz hawj raeuz ndaej rox Cangqdiq begbeg soengq hawj raeuz hih.

¹³ Gyoengqraeuz soj cenzgangj hih caemh mbouj dwg naeuz hag gij vunz coengjmingz he hwj cenzgangj law, dauq dwg Hoenzsaenz Cangqdiq son hawj raeuz hih lah, dwg hawj raeuz dawz gij saedsaeh Cangqdiq gangj naeuz doenghheij miz Hoenzsaenz de he ni.

¹⁴ Hoeng, doenghheij mbouj miz Hoenzsaenz Cangqdiq he, gyoengqde yiem Hoenzsaenz Cangqdiq soj hawj vunz rox hih gij saedsaeh mwnq, aenvih doenghheij vunz neix nginhnaeuz gij saedsaeh neix dwg mazmwnh he; gyoengqde gaenhbaenj mbouj rox, aenvih gij saedsaeh neix dwg Hoenzsaenz Cangqdiq cij ndaej hawj vunz rox faenbied he.

¹⁵ Miz Hoenzsaenz Cangqdiq hih vunz ndaej rox faenbied sojmiz hih saeh, sojhij couh mij'z vunz ndaej naeuz boux de mbouj rox faenbied.

¹⁶ Cingq luj ndaw Singqgingh ndaw de sij naeuz: Byawz ndaej rox daengz aen sim Cangqdiq nej? Byawz ndaej bang de ok cawjeiq nej? song gawq neix. Hoeng, gyoengqraeuz miz Hoenzsaenz Cangqdiq he ndaej rox aen sim Gihduz.