Gohlimzdoh It 15 - Gij Baujcingq Moq Caeuq Geij Bonj Gij Baujcingq Daeuzdaeuz

Gangj daengz Gihduz dauqlix yienh hawj vunz raen

¹ Gak boux beixnuengx hax, faenhsou ij wnggai ndaejgeiq gaxgonq gou soj cenz hawj faenhsou hih gij ndei siuhsiz Cangqdiq; gij ndei siuhsiz neix faenhsou gaenq ciep aeu lo, caemh gaenq bienqbaenz faenhsou sinq Cangqdiq dih gihsuj lo.

² Cijaeu faenhsou gyenhciz soenhsouj gou soj cenz hawj faenhsou hih, couh gaengjdingq ndaej baengh gij de hwj ndaej gouq. Danghyienz, hauhnaeuz faenhsou coengzlaiz cungj mbouj sinq goq, yiengq couh mij'z vah gangj haem lo.

³ Gou dawz vunz cenz hawj gou ceiq cungqyauq hih siuhsiz cenz hawj faenhsou, couh dwg: Gihduz, ciuq Singqgingh ndaw de soj sij hih, vih gyoengqraeuz cueg coih hwj ngaiz rai lo,

⁴ caemh moek lo, caemh vanzlij ciuq ndaw Singqgingh soj sij hih youq daixsam ngoenz dauqlix lo,

⁵ caemh yienh hawj Bijdwz raen goq, gajlaeng, caemhcaiq vanzlij yienh hawj gyoengq cibngeih boux dwzbaijyienz de raen.

⁶ Gajlaeng vanzlij miz mbat he yienh hawj baenx hajbak lai vunz gaen de he raen. (Doenghheij vunz neix, ndaw de miz dingxfaen lai vunz daengz seizneix vanzlij miz, miz mbangj hih vunz gaenq rai lo.)

⁷ Gajlaeng de caemh yienh hawj Yajgoz raen, vanzlij youhcaiq yienh hawj gyoengq dwzbaijyienz de raen.

⁸ Daengz ceiq gajlaeng, de gingqyienz caemh yienh hawj gou raen. Gou suenq guxmaz nex? Gou gaep haeuj dwzbaijyienz ceiq gajlaeng he nex,

⁹ aenvih gou youq ndaw gyoengq dwzbaijyienz ndaw de dwg boux ceiq yawj mbouj hwnj rwz he, ceiq yaqyuij he, mbouj boiqndaej guh dwzbaijyienz he, aenvih gaxgonq gou bwkhaih Cangqdiq dih gyauqveiq goq.

¹⁰ Hoeng, aenvih Cangqdiq doiq gou haijliengh, gou cij ndaej miz ngoenz neix. Gangj lauxsaed vah, de mbouj vuengj doiq gou haijliengh; gou guh hong beij gizdah dwzbaijyienz lij roengzrengz. Mboujgoq, gou mbouj dwg baengh bonjfaenh gou hih, dauq dwg baengh Cangqdiq doiq gou dih aiq lah.

¹¹ Sojhij, mboujguenj dwg gou cixnaeuz gizdah dwzbaijyienz doih soj cenzgangj dih siuhsiz, cungj dwg doengz gij siuhsiz dog, gij siuhsiz neix, couh dwg faenhsou soj sinq hih gij saedsaeh mwnq lo.

Gangj daengz vunz ndaej dauqlix

¹² Giqyienz gyoengqraeuz itcig cungj dwg cenzgangj Gihduz gaenq daj rai ndaej dauqlix lo, vihmaz faenhsou miz hih vunz naeuz mbouj miz vunzrai ndaej dauqlix gij saeh neix nej?

¹³ Yiengq, hauhnaeuz mbouj miz vunzrai ndaej dauqlix gij saeh neix, yienghneix caemhdangq naeuz Gihduz mij dauqlix lo.

¹⁴ Yiengq, caiq hauhnaeuz Gihduz mij dauqlix, gyoengqraeuz soj cenzgangj hih mboujyaengz dwg gangj rumz gangj rengx lo maz? Faenhsou soj sinq hih caemh dwg mij'z yungh lo.

¹⁵ Hauhnaeuz cingqcaen dwg yienghneix, gyoengqraeuz mijyaengz dwg Cangqdiq dih gyaj cingqyinz lo maz, aenvih gyoengqraeuz naeuz de gaenq hawj Gihduz dauqlix lo.

¹⁶ Caiq hauhnaeuz vunz rai le mbouj ndaej dauqlix, yiengq Gihduz couh mij dauqlix lo.

¹⁷ Caiq hauhnaeuz Gihduz mij dauqlix nex, faenhsou soj sinq hih mijyaengz dwg sinq hoengq maz? Yiengq, ciuq luj yienghneix ma gangj, faenhsou ciuqyiengh vanzlij dwg youq ndaw coih,

¹⁸ doenghheij sinq Gihduz vunzrai hih caemh cungj suenq satsoq lo.

¹⁹ Yiengq gyoengqraeuz sinq Gihduz hih vunz, hauhnaeuz caenhgag youq seiq neix miz muengh lah nex, gyoengqraeuz couh dwg youq lajmbwn ceiq boihseiz hih vunz lo.

²⁰ Hoeng, gizsaed Gihduz gaenq daj rai ndaej dauqlix lo. De dwg sojmiz vunzrai ndaw de dih daixit boux ndaej dauqlix; de dwg dauqlix dih baengzgawq.

²¹ Rai dwg coengz boux he yinxhwnj hih, couh dwg Yaqdangh; dauqlix caemh dwg coengz boux he, couh dwg Gihduz.

²² Gangj daengz vunz rai, dwg aenvih gyoengqde dwg gaep haeuj Yaqdangh he; caemh doxdoengz, gyoengq vunz ndaej dauqlix dwg aenvih gyoengqde dwg gaep haeuj Gihduz hih.

²³ Cijmboujgoq ij daengj lwnz daengz le, cij ndaej dauqlix: Gihduz dwg daixit boux dauqlix, gajlaeng daengj daengz de dauq daeuj hih mwhde, gij vunz sinq de he cij ndaej dauqlix.

²⁴ Daengz ceiq ij gajlaeng, daengz ciqgyaiq dih ngoenz gatsat, Gihduz couh ij dawz sojmiz gvanhhih gienz hah, lingjdauj hah, guenjleix hah, doenghgij neix cawz bae; daengz mwhmwnq, de couh dawz aen guek de gyau hawj Cangqdiq Bohmbwn,

²⁵ aenvih Gihduz bietdingh ij dang vuengz, itcig dang daengz bonjfaenh de dawz sojmiz dih dizyinz cungj caij youq laj din de.

²⁶ De ceiqhaeuq ij cawz hih dizyinz couh dwg rai,

²⁷ aenvih ndaw Singqgingh ndaw de sij naeuz: Cangqdiq ij hawj sojmiz hih cungj fug hwj ngaiz caij youq laj din de. (Ox, ndaw Singqgingh ndaw de sij naeuz hih “Sojmiz hih cungj ij fug youq laj din de” hih gawq neix danghyienz mbouj bauhgvaz Cangqdiq bonjfaenh de lo.)

²⁸ Daengj daengz sojmiz hih cungj fug youq laj din Gihduz le, daengz mwhmwnq, Gihduz couh dawz gij gienz boiz hawj daxboh de Cangqdiq, hawj Cangqdiq ndaej guenj sojmiz hih, guh sojmiz hih vuengz.

²⁹ Yiengq, hauhnaeuz mbouj miz vunzrai ndaej dauqlix nex, doenghheij dingj vunzrai sijlij hih cix ij miz maz yungh haem? Hauhnaeuz rai gaenhbaenj mbouj ndaej dauqlix, yiengq vihmaz miz vunz dingj gyoengqde sijlij nej?

³⁰ Gyoengqraeuz caemh vihmaz ij seiqseiz vih Gihduz hwj mauqyiemj nej?

³¹ Gak boux beixnuengx hax, gizsaed gou ngoenzngoenz cungj ijyiemj vwt mingh. Gou yienghneix naeuz dwg saedsaeh hih, caemh luj gou vih bouxcawj raeuz Yehsuh Gihduz hwj haenh faenhsou hih dwg saedsaeh hih.

³² Yiengq, caiq hauhnaeuz vunzrai mbouj ndaej dauqlix, yiengq mwh gou youq Hijfuzsoj caeuq doenghheij dizyinz doegsieb luj duz nyaen he doxdub doxdaeuq cijmboujgoq dwg vunz dih guhfap hih lah, doiq gou miz maz ik nej? Hauhnaeuz vunzrai mbouj ndaej dauqlix, ganhseiq gyoengqraeuz gwgw angqangq suenq lox, fanjcingq ngoenzcog ngoenzlaeng cungj ij rai lo.

³³ Gak boux beixnuengx hax, gaejyungh ngaiz vunz yaeuh; gyau mbouj ndei hih baengzyoux, caemh ingjyangj faenhsou dih byimjdwz.

³⁴ Faenhsou wnggai singqsag goqdaeuj, mbouj caiq famh coih. Gou naeuz gawq vah neix dwg ij hawj faenhsou rox nyaenq, aenvih faenhsou ndaw de miz hih vunz mbouj rox Cangqdiq.

Dauqlix dih ndangdaej

³⁵ Yiengq aiq ij miz vunz naeuz: “Vunz rai le ij baenzlaw ndaej dauqlix nej? Dauqlix le, aen ndangdaej ij dwg baenzlaw yiengh nej?”

³⁶ Hoeng, gou naeuz hax, doenghheij vunz ngawz faenhsou hax, faenhsou ndaem roengzbae hih doengh ceh, hauhnaeuz mbouj sien moek, ceh de ij baenz ndaej hwnj hwnjdaeuj nej?

³⁷ Caemhdangq faenhsou ndaem roengzbae hih ceh caeuq ceh de did hwnjdaeuj le dih yienghceij mbouj doxdoengz, beijgangj dwg ceh mienh cixnaeuz doengh ceh maz.

³⁸ Hoeng, Cangqdiq ciuq gij cawjeiq bonjfaenh de hawj gak cungj ceh hwnj gak cungj mbouj doengz hih doenghgo.

³⁹ Miz lwed miz noh hih, miz gak cungj mbouj doengz: vunz miz vunz yiengh, nyaen miz nyaen yiengh, roeg miz roeg yiengh, bya miz bya yiengh.

⁴⁰ Vanzlij miz, gwnzmbwn miz gwnzmbwn hih yiengh, lajdeih miz lajdeih hih yiengh; gwnzmbwn lajdeih gag miz bonjfaenh de dih gyaeu.

⁴¹ Gyangjngoenz miz gyangjngoenz hih rongh ndei, aen ndwen miz aen ndwen hih rongh ndei, ndaundeiq miz ndaundeiq hih rongh ndei, mboujgoq, ndaundeiq caeuq ndaundeiq cungj miz aen caeuq aen rongh mbouj doxdoengz he.

⁴² Gangj daengz vunzrai dauqlix caemh dwg yienghneix. Seihaiz moek le rox naeuh; dauqlix le dwg mbouj rox naeuh hih.

⁴³ Ngaiz moek hih dwg najmomj hih; dauqlix hih dwg najrongh sagsag hih. Ngaiz moek hih dwg nyieg hih; dauqlix hih dwg hoenz hwedhwed hih.

⁴⁴ Ngaiz moek hih dwg ndangnoh he; ndaej dauqlix hih dwg haeuj hoenzsaenz he. Yiengq, giqyienz miz ndangnoh, caemh miz hab haeuj hoenzsaenz he,

⁴⁵ aenvih ndaw Singqgingh ndaw de sij naeuz: Boux vunz daixdaeuz, Yaqdangh, dwg cauh baenz boux vunz miz lwed miz noh he gawq neix, hoeng, daengz gajlaeng, Gihduz, daixngeih boux Yaqdangh, dwg hawj vunz miz mingh dih hoenzsaenz.

⁴⁶ Sien miz hih mbouj dwg haeuj hoenzsaenz hih, dauq dwg haeuj ndangnoh hih lah; gajlaeng, cij miz haeuj hoenzsaenz hih lah.

⁴⁷ Boux daixdaeuz, Yaqdangh, dwg haeuj lajmbwn hih, dwg haeuj doem he; boux daixngeih, Gihduz, dwg haeuj gwnzmbwn hih.

⁴⁸ Boux haeuj doem hih yienghceij dwg baenzlaw yiengh, lajmbwn sojmiz hih vunz caemh dwg baenzlaw yiengh lo; haeuj gwnzmbwn hih yienghceij dwg baenzlaw yiengh, gaep haeuj gwnzmbwn dih vunz caemh dwg baenzlaw yiengh lo.

⁴⁹ Yiengq, giqyienz gyoengqraeuz miz haeuj doem hih vunz dih yienghceij, baezneix caemh ij miz haeuj gwnzmbwn hih vunz dih yienghceij lo.

⁵⁰ Gak boux beixnuengx hax, gou saedsaeh naeuz sou ni, haeuj ndangnoh hih vunz mbouj ndaej gaep haeuj guek Cangqdiq hih; rox naeuh hih ndangnoh mbouj ndaej miz faenh caeuq doenghheij mbouj rox naeuh he.

⁵¹ Gou seizneix ij naeuz sou ni gij miqmiz he; faenhsou ijaeu cuqhiq. Gyoengqraeuz mbouj dwg naeuz bouxboux cungj ij ngaiz rai law; dwg sojmiz hih vunz cungj ij gaijbienq lah.

⁵² Couh dwg youq mwh boq gywnhhauh senhbuq ciqgyaiq dih ngoenz gatsat he, caenh luj baex yaep ra he hih mwhde, vunzrai couh doq ndaej dauqlix lo, rox naeuh hih ndangnoh bienqbaenz mbouj rox naeuh hih lo; gyoengqraeuz caemh doq gaijbienq lo.

⁵³ Daengz mwhmwnq, doenghheij rox naeuh hih gaengjdingq bienqbaenz mbouj rox naeuh hih, doenghheij rox rai hih caemh ij bienqbaenz mbouj rox rai hih.

⁵⁴ Daengz mwh doenghgij neix fatseng hih mwhde, ndaw Singqgingh ndaw de soj sij naeuz hih: Rai ngaiz cingqliq byaeu lo!

⁵⁵ Rai hax rai, mwngz dih cingqliq youq mwnqlaw? Rai hax rai, gij oen doeg mwngz youq mwnqlaw? gawq neix couh lingz okdaeuj lo.

⁵⁶ Rai dih oen doeg couh dwg coih; coih dih gienzliz couh dwg fazliz.

⁵⁷ Hoeng, docih Cangqdiq, de dunghgoq bouxcawj raeuz Yehsuh Gihduz hwj hawj raeuz hingz goq coih caeuq rai.

⁵⁸ Sojhij, cinhngaiq dih gak boux beixnuengx hax, faenhsou wnggai gyenhdingq mbouj doeknaiq, ij mbouj lau dwgrengz sinhoj hwj guh gij hong bouxcawj raeuz, aenvih faenhsou rox, guh gij hong bouxcawj raeuz mbouj dwg mij'z yungh law.