Gohlimzdoh It 14 - Gij Baujcingq Moq Caeuq Geij Bonj Gij Baujcingq Daeuzdaeuz

Caiq gangj daengz Hoenzsaenz Cangqdiq nyok hawj dih bonjsaeh

¹ Faenhsou wnggai caensim caen'eiq aiq vunz, hoeng, gangj daengz faenhsou muengh Hoenzsaenz Cangqdiq nyok bonjsaeh hawj hih, gou naeuz caemh dwg deng hih, cijmboujgoq faenhsou ij engqgya muengh ndaej gij bonjsaeh cenz gij vah Cangqdiq he cij deng.

² Doenghheij rox gangj cungj vah caenhgag Hoenzsaenz Cangqdiq cij rox he hih mbouj dwg doiq vunz gangj hih, dauq dwg doiq Cangqdiq gangj hih lah, aenvih mij'z vunz dingq rox de gangj gijmaz. De dwg dunghgoq Hoenzsaenz Cangqdiq ma gangj gij miqmiz he.

³ Hoeng, guh boux cenz gij vah Cangqdiq hih dwg doiq vunz gangj hih, dwg hawj vunz ndaej miz ik hih, dwg gujliq vunz nai vunz hih.

⁴ Boux rox gangj cungj vah caenhgag Hoenzsaenz Cangqdiq cij rox he hih caenhgag doiq bonjfaenh miz ik lah; boux rox cenz gij vah Cangqdiq hih dwg doiq gyauqveiq miz ik hih.

⁵ Gou muengh faenhsou rox gangj cungj vah Hoenzsaenz Cangqdiq nyok hawj vunz gangj he, hoeng, gou engqgya muengh faenhsou guh boux cenz gij vah Cangqdiq, aenvih gangj cungj vah neix hih, hauhnaeuz mbouj fanhyiz okdaeuj hawj gyauqveiq ndaej miz ik, yiengq couh mbouj ndaej luj boux cenz gij vah Cangqdiq yienghmwnq miz yungh lo.

⁶ Sojhij, gak boux beixnuengx hax, hauhnaeuz gou bae faenhsou mwnq, caenhgag yungh cungj vah caenhgag Hoenzsaenz Cangqdiq cij rox hih ma doiq faenhsou gangj, dauq mij gaijyiz naeuz sou ni Cangqdiq dih iqswh, cixnaeuz gijmaz ciqsiz, cixnaeuz gijmaz cawjeiq, caeuq mij son faenhsou nex, yiengq doiq faenhsou miz maz ik nej?

⁷ Couh dangq luj doenghheij miz sing, hoeng, mij'z heiq hih dig hah, gimz hah yienghmwnq, hauhnaeuz boq okdaeuj cixnaeuz danz okdaeuj mbouj miz sing sang sing daemq, yiengq byawz ndaej faenh ndaej ok boq gijmaz cixnaeuz danz gijmaz go nej?

⁸ Youhcaiq lujnaeuz boq gywnhhauh, hauhnaeuz mbouj boq cingsuj hawj vunz rox dwg cizcungh he nex, byawz couh ndaej cwnjbiq bae doxhoenx nej?

⁹ Caemh doxdoengz, hauhnaeuz faenhsou gangj gij vah vunz dingq mbouj rox he, vunz ij baenz rox faenhsou gangj gijmaz nej? Yiengq caemhdangq gangj hoengq huh.

¹⁰ Lajmbwn miz haujlai cungj vah, hoeng, mij saek cungj naeuz mij iqswh.

¹¹ Yiengq, hauhnaeuz miz vunz doiq gou gangj vah, gou dingq mbouj roxyiuj de gangj gijmaz vah, yiengq boux de yawj gou couh dangq dwg vunz vaihguek, gou caemh yawj de dangq dwg vunz vaihguek lo.

¹² Faenhsou caemh doxdoengz; giqyienz faenhsou cungj muengh ndaej Hoenzsaenz Cangqdiq nyok hawj dih bonjsaeh lo, yiengq couh ij wnggai lai gouz gij ndaej doiq gyauqveiq miz ik he.

¹³ Sojhij, boux rox gangj gij vah caenhgag Hoenzsaenz Cangqdiq cij rox he hih wnggai gouz Cangqdiq, gouz Cangqdiq nyok bonjsaeh hawj de, hawj de ndaej gag fanhyiz bonjfaenh de soj gangj hih vah.

¹⁴ Hoeng, hauhnaeuz gou yungh cungj vah caenhgag Hoenzsaenz Cangqdiq cij rox he ma gouzhaenh Cangqdiq nex, yiengq couh dangq dwg hoenzsaenz gou gouzhaenh lah; aen sim gou dauq mij doenghdanh nej.

¹⁵ Sojhij gou wnggai song yiengh cungj yungh ma gouzhaenh cij deng, mbangj baez dwg yungh hoenzsaenz gou ma gouzhaenh, mbangj baez dwg yungh aen sim gou ma gouzhaenh cij deng. Caemh doxdoengz, mbangj baez ciengq go caemh ij yungh hoenzsaenz gou ma ciengq go haenh Cangqdiq, mbangj baez caemh ij yungh aen sim gou ma ciengq go haenh Cangqdiq cij ndaej hah.

¹⁶ Couh dwg naeuz hauhnaeuz mwngz yungh cungj vah caenhgag Hoenzsaenz Cangqdiq cij rox he ma haenh Cangqdiq docih Cangqdiq mwhde, doenghheij vunz youq henz mwngz dingq he dingq mbouj rox mwngz gangj gijmaz; de ij baenzlawz ndaej caeuq mwngz naeuz “Ahmaenz,” gawq neix nej?

¹⁷ Mwngz yienghneix haenh Cangqdiq docih Cangqdiq dwg ndei hih, hoeng, aenvih vunz dingq mbouj rox hah, yiengq doiq vunz mij'z ik hah.

¹⁸ Docih Cangqdiq, gou rox gangj cungj vah Hoenzsaenz Cangqdiq nyok hawj vunz gangj he beij faenhsou lai.

¹⁹ Hoeng, youq gyauqveiq, gou cingxnyienh gangj haj gawq vah hawj vunz dingq rox he, ndaej son vunz rox he, mbouj cingxnyienh gangj fanh gawq hawj vunz dingq mbouj rox he.

²⁰ Gak boux beixnuengx hax, faenhsou swhsiengj mbouj ndaej luj lwgngez yienghmwnq; ij luj vunz hung. Hoeng, youq doenghheij saeh doegsieb he, dauq ij wnggai luj lwgnding yienghmwnq.

²¹ Ndaw Singqgingh ndaw de sij miz naeuz: Cangqdiq naeuz: “Gou dunghgoq vunz ma yungh gij vah linghvaih minzcuz he doiq doenghheij vunz neix gangj vah; hoeng, gyoengqde vanzlij mbouj dingq gou.”

²² Yiengq, ciuq luj yienghneix ma gangj, gangj cungj vah Hoenzsaenz Cangqdiq nyok hawj vunz gangj he mbouj dwg ij hawj doenghgij vunz sinq Cangqdiq he guh baengzgawq nej, dauq dwg ij hawj doenghgij vunz mbouj sinq Cangqdiq he guh baengzgawq lah; hoeng, guh boux cenz gij vah Cangqdiq he, cenz gij vah Cangqdiq mbouj dwg hawj gij vunz mbouj sinq he guh baengzgawq nej, dauq dwg hawj gij vunz sinq he guh baengzgawq lah.

²³ Sojhij, hauhnaeuz gyauqveiq doxcomz hih mwhde, daixgya cungj gangj cungj vah caenhgag Hoenzsaenz Cangqdiq cij rox he, yiengq, hauhnaeuz miz gij vunz dingq mbouj rox he, cixnaeuz gij vunz mbouj sinq Cangqdiq he haeuj daeuj raen, gyoengqde mbouj naeuz faenhsou fatvangh lo maz?

²⁴ Hoeng, hauhnaeuz gyauqveiq sojmiz hih vunz cungj cenz gij vah Cangqdiq nex, doenghgij vunz mbouj daiq rox gij saedsaeh Cangqdiq hih, cixnaeuz doenghgij vunz mbouj sinq Cangqdiq hih haeuj daeuj raen, couh vih ndaej dingq daengz gij saedsaeh Cangqdiq hwj ngeix daengz bonjfaenh dwg miz coih he, couh roxnginh lujnaeuz ngaiz saemjbuenq,

²⁵ gij miqmiz ndaw sim caemh loh okdaeuj, guh hwj boux de gvih bomz roengz doem bae sax Cangqdiq naeuz: “Cangqdiq saedsaeh caeuq faenhsou youq!” yienghneix naeuz.

Doxcomz dih gveihdingq

²⁶ Gak boux beixnuengx hax, gyoengqraeuz ij wnggai baenzlawz yungh Hoenzsaenz Cangqdiq nyok hawj dih bonjsaeh nej? Faenhsou moix it mbat doxcomz, mboujguenj miz vunz rox ciengq go cix ndaej, miz vunz gangj gij vah son vunz he cix ndaej, miz vunz rox gij miqmiz Cangqdiq hawj vunz rox he naeuz vunz ni cix ndaej, miz vunz gangj cungj vah Hoenzsaenz Cangqdiq nyok hawj vunz ndaej gangj he cix ndaej, miz vunz fanhyiz gij vah de cix ndaej, mboujguenj guh gijmaz saeh, cungj ij wnggai doiq gyauqveiq miz ik cij ndaej.

²⁷ Faenhsou doxcomz mwhde, hauhnaeuz miz vunz aeu gij vah vunz dingq mbouj rox he ma gangj nex, ceiq lai ndaej song daengz sam boux doxlwnz gangj, caemh ij miz vunz fanhyiz cij ndaej.

²⁸ Yiengq, hauhnaeuz mbouj miz vunz fanhyiz nex, boux gangj gij vah vunz dingq mbouj rox he ceiq ndei mbouj gangj. Hauhnaeuz ij gangj, caenhgag caeuq Cangqdiq gangj couh ndaej lo.

²⁹ Yiengq gangj daengz boux cenz gij vah Cangqdiq he, moix it mbat youq gyauqveiq doxcomz, ndaej song daengz sam boux gangj vah; lij lw hih vunz wngdang cuqhiq dingq, ngeixngeix gyoengqde soj gangj hih.

³⁰ Youq mwh boux de cingq gangj hih mwhde, hauhnaeuz youq mwnq hih vunz miz vunz Cangqdiq naeuz de ni gijmaz hawj de naeuz daixgya ni hih, yiengq boux cingq gangj vah mwnq couh ij dingz roengzma, nyiengh hawj boux de gangj.

³¹ Yienghneix daixgya couh ndaej doxlwnz gangj lo, daixgya cungj ndaej hag, cungj ndaej doxson doxbang.

³² Guh boux cenz gij vah Cangqdiq hih cungj rox gag haed bonjfaenh, lwnz daengz bonjfaenh gangj cij gangj,

³³ aenvih Cangqdiq mbouj dwg hawj vunz luenh, dwg hawj vunz dingh lah.

³⁴ Yiengq gangj daengz vunzbaz, vunzbaz camhgyah gyauqveiq doxcomz hih mwhde, ij caeuq sojmiz hih gyauqveiq doxdoengz, ij dingh cubcub, mbouj gangj vah. Couh luj Mohsih dih fazliz soj gveihdingq hih yienghmwnq, ij soenhsouj mbouj ndaej gangj vah.

³⁵ Hauhnaeuz gyoengqde ijsiengj rox gijmaz hih, ndaej youq ndaw ranz bonjfaenh cam goeng gojyez bonjfaenh, aenvih vunzbaz youq mwh doxcomz he gangj vah dwg sainaj hih.

³⁶ Gou gaenq naeuz faenhsou haujlai lo, hoeng, faenhsou vanzlij mbouj dingq. Nanzdauh Cangqdiq dih ndei siuhsiz dwg coengz faenhsou Gohlimzdoh mwnq daeuj hih mah? Caemh caenhgag cenz hawj faenhsou hih mah?

³⁷ Hauhnaeuz miz vunz gag naemqnaeuz bonjfaenh dwg boux boux cenz gij vah Cangqdiq he cixnaeuz gag naemqnaeuz bonjfaenh gaen Hoenzsaenz Cangqdiq nex, couh wnggai rox gou soj sij hawj faenhsou hih dwg bouxcawj raeuz dih mingqlingq lo.

³⁸ Yiengq, hauhnaeuz miz vunz mbouj dungziq gou soj sij hih, couh mbouj leix de.

³⁹ Sojhij gak boux beixnuengx hax, faenhsou wnggai haenj siengj bae cenz gij vah Cangqdiq; gaejyungh haed vunz gangj cungj vah Hoenzsaenz Cangqdiq nyok hawj vunz gangj he.

⁴⁰ Hoeng, mboujguenj guh gijmaz saeh, cungj mbouj ndaej luenh; ijaeu miz swnqsiq.