Gohlimzdoh It 12 - Gij Baujcingq Moq Caeuq Geij Bonj Gij Baujcingq Daeuzdaeuz

Hoenzsaenz Cangqdiq nyok bonjsaeh

¹ Gak boux beixnuengx hax, gangj daengz Hoenzsaenz Cangqdiq nyok hawj vunz dih bonjsaeh, gou muengh faenhsou rox cingsuj.

² Faenhsou caemh gag rox, youq faenhsou mijyaengz sinq Cangqdiq cihsenz, faenhsou baenxlai ngawz, siengzseiz ngaiz yaeuh hwj bae bwiz you.

³ Sojhij seizneix gou naeuz sou ni, famz miz Hoenzsaenz Cangqdiq doengh daengz sim hih cungj mbouj veiq naeuz: “Yehsuh wnggai ngaiz mang,” gawq neix. Fanjgoqma, caemh doxdoengz, famz mbouj miz Hoenzsaenz Cangqdiq doengh daengz sim hih caemh mbouj veiq naeuz: “Yehsuh dwg bouxcawj gou.”

⁴ Hoenzsaenz Cangqdiq nyok hawj vunz dih bonjsaeh miz haujlai cungj, hoeng, cungjcungj cungj dwg coengz gij Hoenzsaenz dog nyok hawj he.

⁵ Swqhaeuh hih caemh miz haujlai cungj, hoeng, cungjcungj cungj dwg swqhaeuh bouxcawj dog.

⁶ Hong caemh miz haujlai cungj, hoeng, cungjcungj cungj dwg boux Cangqdiq dog hawj rengz hawj gak vunz ndaej guh he.

⁷ Hoenzsaenz Cangqdiq vih ij hawj daixgya miz ndeicawq, couh nyok hawj gak vunz mbouj doengz hih bonjsaeh.

⁸ Miz hih ndaej rox naeuz vunz ni wnggai baenzlawz guh, miz hih ndaej rox gijmaz gijmaz.

⁹ Miz hih ndaej miz aen sim sinq Cangqdiq raixcaix he, miz hih ndaej rox yw bingh hawj vunz,

¹⁰ miz hih ndaej rox guh doenghgij geizmiuj hih saeh he, miz hih ndaej rox cenz gij vah Cangqdiq, miz hih ndaej rox faenbied ndei caeuq yak hih hoenzsaenz, miz hih ndaej rox gangj cungj vah Hoenzsaenz Cangqdiq nyok hawj vunz gangj he, miz hih ndaej rox fanhyiz cungj vah Hoenzsaenz Cangqdiq nyok hawj vunz gangj he.

¹¹ Sojmiz hih cungj dwg caemh gij Hoenzsaenz dog nyok hawj he; cungj dwg de ciuq bonjfaenh de dih cawjeiq nyok hawj gak vunz he.

Doxcaemh aen ndang he

¹² Cingq luj aen ndang he miz haujlai doxcaeuq hwnjdaeuj cij baenz aen ndang he, Gihduz couh dwg aen ndang he.

¹³ Mboujguenj gyoengqraeuz dwg Youzdaiq vunz haj cixnaeuz dwg Hihlaz vunz, dwg guh hoiq haj cixnaeuz dwg swqyouz vunz, cungj dwg dunghgoq gij Hoenzsaenz dog sijlij hwj ndaej gaep haeuj buek vunz he, bienqbaenz aen ndangdaej he, caemh dwg doxdoengz ndaej yangjcouq gij Hoenzsaenz dog he, couh dangq luj vunzlai doxdoengz caemh gw aen cingj raemx he.

¹⁴ Aen ndang vunz cungj dwg miz haujlai yiengh haujlai yiengh doxcaeuq hwnjdaeuj cij guhbaenz aen ndang he.

¹⁵ Beijgangj naeuz, hauhnaeuz gij ha naeuz: “Gou mbouj dwg fawz, sojhij gou mbouj suenq dwg haeuj aen ndang law,” yiengq nanzdauh couh vih yienghneix hwj mbouj suenq dwg haeuj aen ndang he lo mah?

¹⁶ Caiq beijgangj naeuz, hauhnaeuz duj rwz naeuz: “Gou mbouj dwg cehra, sojhij gou mbouj suenq dwg haeuj aen ndang,” yiengq nanzdauh yienghneix caemh mbouj suenq dwg haeuj aen ndang lo mah?

¹⁷ Yiengq, hauhnaeuz baenx ndang cungj dwg ra, ij baenz ndaej dingqri nej? Caiq hauhnaeuz baenx ndang cungj dwg rwz, yiengq ij baenz ndaej mup nej?

¹⁸ Hoeng, Cangqdiq ciuq bonjfaenh de dih cawjeiq dawz doenghgij mbouj doengz neix coengq youq mwnq hab coengq he, hawj de gaep guh aen ndang he.

¹⁹ Hauhnaeuz sojmiz hih cungj doxdoengz, yiengq ij baenz suenq dwg aen ndang he nej?

²⁰ Gizsaed gyoengqraeuz miz aen ndang he; aen ndang neix miz haujlai yiengh mbouj doengz he.

²¹ Sojhij cehra mbouj ndaej doiq gij fawz naeuz: “Gou mboujyungh mwngz,” ndaek raeuj caemh mbouj ndaej doiq gij ha naeuz: “Gou mboujyungh mwngz.”

²² Dauqfanj, gwnz ndang mwnq ceiq yungzheih sieng ceiq mbouj yungzheih ndei he hih engqgya noix mbouj ndaej.

²³ Youq gwnz ndang mwnq vunz mbouj dawz haeuj rwz hih, raeuz engqgya yawjdij; doenghheij mboujeiqseiq hawj vunz raen hih, raeuz engqgya ij baex ndei, goemq ndei.

²⁴ Gwnz ndang raeuz mwnq seizbienh loh okdaeuj hih couh mboujyungh caiq baexbaex goemqgoemq lo. Cangqdiq yienghneix cang aen ndang gyoengqraeuz, hawj doenghheij mwnq gyoengqraeuz mbouj dawz haeuj rwz he bienq dawz haeuj rwz.

²⁵ Cangqdiq yienghneix cang dwg ij hawj aen ndang gak gaiq gak yiengh ndaej doxhuz, doxhoh.

²⁶ Hauhnaeuz aen ndangdaej hih mwnqlaw roxnginh hojyouq, yiengq baenx cenz ndang cungj caemh roxnginh hojyouq lo. Caiq hauhnaeuz miz mwnq he soeng lo, yiengq baenx cenz ndang cungj caemh soeng lo.

²⁷ Faenhsou couh dangq dwg aen ndang Gihduz; moix it boux cungj dwg gwnz ndang de dih mwnq he.

²⁸ Cangqdiq youq gwnz ndang Gihduz, couh dwg youq ndaw gyauqveiq, de yienghneix laeb: daixit dwg dwzbaijyienz, daixngeih dwg boux cenz gij vah de, daixsam dwg gyauqveiq dih lauxsae, gajlaeng cij daengz guh doenghgij geizmiuj he, caiq gajlaeng daengz rox yw bingh he, vanzlij miz rox bang vunz he, guenj gizdah saeh he, rox gangj cungj vah Hoenzsaenz Cangqdiq nyok hawj vunz gangj he.

²⁹ Hoeng, mbouj dwg naeuz bouxboux cungj dwg dwzbaijyienz, boux cenz gij vah Cangqdiq, lauxsae, caemh mbouj dwg naeuz bouxboux cungj ndaej rox guh doenghgij geizmiuj hih saeh he,

³⁰ ndaej rox yw bingh he, ndaej rox gangj cungj vah Hoenzsaenz Cangqdiq nyok hawj vunz gangj he, ndaej rox guh fanhyiz he.

³¹ Mboujgoq faenhsou wnggai caenhrox gouz Hoenzsaenz Cangqdiq nyok hawj faenhsou ceiq miz ik dih bonjsaeh bax. Hoeng, gou ij naeuz sou ni gij engqgya cungqyauq he, couh dwg naeuz ‘aiq.’