Gohlimzdoh It 11 - Gij Baujcingq Moq Caeuq Geij Bonj Gij Baujcingq Daeuzdaeuz

¹ Faenhsou wnggai hag gou, caemh luj gou hag Gihduz yienghmwnq.

Gangj daengz goemq raeuj dih vaenqdiz

² Gou haenh faenhsou, aenvih faenhsou mboujguenj guh gijmaz saeh, cungj ngeix daengz gou, caemh ciuq gou son faenhsou hih yienghmwnq bae guh.

³ Hoeng, gou seizneix miz gienh saeh he naeuz faenhsou. Faenhsou wnggai rox, vunzsai dwg vunzbaz dih raeuj, Gihduz dwg vunzsai dih raeuj, Cangqdiq dwg Gihduz dih raeuj.

⁴ Sojhij, vunzsai youq gouzhaenh Cangqdiq cixnaeuz cenz gij vah Cangqdiq hih mwhde, hauhnaeuz goemq raeuj nex, couh dangq hawj Gihduz saetnaj lo.

⁵ Hoeng, hauhnaeuz vunzbaz gouzhaenh Cangqdiq cixnaeuz cenz gij vah Cangqdiq hih mwhde, hauhnaeuz mbouj goemq raeuj nex, couh dangq dwg hawj goengjgvan bonjfaenh saetnaj lo. Aenvih luj yienghneix hih, couh dangq luj vunzbaz ngaiz daeq raeuj ngaeuz yienghmwnq.

⁶ Sojhij, hauhnaeuz vunzbaz mbouj goemq raeuj, hozmboujyienz de ganhseiq daeq raeuj ngaeuz suenq lo. Giqyienz vunzbaz daeq raeuj cixnaeuz daet byoemraeuj dwg haeuj gij saetnaj saetnyaenq he vwz, yiengq de couh wnggai goemq ndaek raeuj de hwnjdaeuj.

⁷ Yiengq caiq gangj daengz vunzsai gouzhaenh cixnaeuz cenz gij vah Cangqdiq hih mwhde, mbouj wnggai goemq raeuj, aenvih vunzsai dwg Cangqdiq dih yienghceij, dwg yienh ok Cangqdiq dih veijdaq he. Hoeng, vunzbaz dwg yienh ok vunzsai dih veijdaq.

⁸ Daj gaihcij, vunzsai mbouj dwg dajlaeng vunzbaz cauh okdaeuj hih, hoeng, vunzbaz dauq dwg dajlaeng vunzsai cauh okdaeuj he.

⁹ Vanzlij miz, vunzsai mbouj dwg vih vunzbaz hwj cauh okdaeuj hih, hoeng, vunzbaz dauq dwg vih vunzsai hwj cauh okdaeuj hih.

¹⁰ Sojhij, vih ij hawj bouxcai Cangqdiq sim'angq, vunzbaz wnggai goemq raeuj guh geiqhauh, couh dangq naeuz vunzbaz fug vunzsai dwg vunzbaz dih raeuj.

¹¹ Hoeng, mboujguenj dwg guxmaz, ciuq bouxcawj raeuz dih nganhbaiz, cungj ij miz vunzsai vunzbaz cij ndaej.

¹² Gannaeuz gaihcij vunzbaz dwg dajlaeng vunzsai cauh okdaeuj he, hoeng, gajlaeng sojmiz hih vunzsai cungj dwg dajlaeng vunzbaz seng okdaeuj he. Hoeng, mboujguenj baenzlaw, sojmiz hih dungjdungj cungj dwg coengz Cangqdiq ndaej daeuj he.

¹³ Sojhij, faenhsou gag ngeixngeix yawj, vunzbaz youq dangqnaj vunzlai gouzhaenh Cangqdiq hih mwhde, mbouj goemq raeuj hab lwi?

¹⁴ Yiengq, ciuq vunz dih yawjfap, faenhsou caemh rox, vunzsai louz byoemraeuj raez mbouj dwg saetnaj bonjfaenh lo mah?

¹⁵ Hoeng, vunzbaz louz byoemraeuj raez, dauq dwg de dih najrongh lah, aenvih vunzbaz louz byoemraeuj raez cingq dwg ndaej goemq ndaek raeuj bonjfaenh de.

¹⁶ Yiengq, hauhnaeuz miz vunz doxeuq gij saeh goemq mbouj goemq raeuj neix nex, gou caenhgag ndaej naeuz gyoengqraeuz caeuq gizdah gyauqveiq cungj dwg yienghneix yawjfap hih.

Donq haeux gijnenq Yehsuh

¹⁷ Laj neix, gou seizneix ij naeuz faenhsou, mbouj dwg ij haenh faenhsou, couh dwg: faenhsou doxcomz mbouj danhcij naeuz mij'z ik, vanzlij miz haih.

¹⁸ Daixit, gou dingq naeuz faenhsou doxcomz hih mwhde faen banghbaij hwj. Gou sinq gij vah neix mbouj dwg vunz gag an hih, hoeng, gij neix caemh hojgangj.

¹⁹ Saekseiz faenhsou faen banghbaij le, cij ndaej yawj ok byawz deng byawz mbouj deng nej.

²⁰ Faenhsou seizneix doxcomz, gaenq bienqbaenz mbouj dwg vih ij gijnenq bouxcawj raeuz hwj doxcomz gw haeux lo,

²¹ aenvih faenhsou gw hih mwhde, cij rox guq gw bonjfaenh, mij ngeix daengz vunz, guh hwj daengz gajlaeng, miz hih vunz gw hwj imqimq aqaq fiz hih fiz, hoeng, miz hih vunz dauq iek hwj ij rai bae.

²² Faenhsou yienghmwnq gw hwj sanx bae. Nanzdauh faenhsou mij'z gya, mij ndaej gag youq ndaw ranz bonjfaenh gw haj? Vihmaz ij youq vih gijnenq bouxcawj raeuz hwj gw hih gw hwj sanx bae nej? Nanzdauh faenhsou guqiq yienghmwnq gw hwj sanx bae hwj sai Cangqdiq dih gyauqveiq mah? Hawj gij vunz mij ndaej gw he hwj saetnaj mah? Gou ij baenzlaw naeuz faenhsou nej? Faenhsou yienghneix guh wnggai hawj gou haenh faenhsou mah? Gaej muengh luh nwjx!

²³ Laj neix gou dawz bouxcawj raeuz son gou hih gvanhhih vih ij gijnenq de hwj gw hih donq haeux mwnq dih gveihgij naeuz sou ni: Bouxcawj raeuz Yehsuh Gihduz ngaiz vunz cuzmaiq hih haemh mwnq hih donq haeuxcaeuz gatsat mwnq, mwhde de dawz aen bingj he hwnjdaeuj

²⁴ docih Cangqdiq. Docih le, couh euj aen de couh naeuz: “Gij neix couh dwg daiqbiuj aen ndangdaej gou, dwg vih faenhsou hwj ngaiz vwt mingh dih ndangdaej. Vih ij geiqniemh gou, faenhsou ij yienghneix guh.”

²⁵ Gw haeuxcaeuz sat le, de caiq dawz cenj laeuj he hwnjdaeuj naeuz: “Cenj neix couh dwg daiqbiuj Cangqdiq yiengq vunz dinghlaeb dih saen dih baujcingq lienz diuzgyenq, dwg yungh gij lwed gou ma dingh he. Faenhsou moix it mbat doxcomz gw cenj laeuj neix cungj ij yienghneix guh hwj geiqniemh gou.”

²⁶ Sojhij gou naeuz faenhsou, faenhsou moix it mbat yienghneix gw bingj gw cenj laeuj neix hih, couh dwg ij hawj vunz rox bouxcawj raeuz vih raeuz hwj ngaiz rai hih; faenhsou ij itcig yienghneix guh daengz bouxcawj raeuz dauq daeuj hih ngoenz mwnq.

²⁷ Sojhij mboujguenj byawz, mbouj miz aen sim naeuz soenhgingq he daeuj gw bingj gw cenj neix hih, couh dwg daekcoih aen ndang bouxcawj raeuz caeuq gij lwed de lo.

²⁸ Couh vih yienghneix, gak vunz cungj ij sien gag ngeix ndei, cij ndaej gw aen bingj neix caeuq cenj neix.

²⁹ Yiengq, hauhnaeuz miz byawz faen mbouj ok gw aen bingj neix gw cenj neix caeuq aen ndang bouxcawj raeuz miz maz gvanhaeh hih nex, de couh ij ngaiz souh daengz fad, couh dangq naeuz gag caij daengqgyauz hau raeuj lo.

³⁰ Cingq vih yienghneix, faenhsou ndaw de miz haujlai vunz ndangdaej nyieg, miz bingh, caemh miz haujlai vunz ngaiz rai lo.

³¹ Sojhij naeuz, hauhnaeuz raeuz gak vunz sien ngeix ndei cingsuj, couh mbouj ngaiz souh daengz saemjbuenq lo.

³² Hoeng, hauhnaeuz gyoengqraeuz ngaiz souh daengz saemjbuenq nex, dwg bouxcawj raeuz guenjgyauq gyoengqraeuz lah, mienxndaej gyoengqraeuz ngaiz caeuq gij vunz lajmbwn souh daengz dingh coih.

³³ Sojhij gou naeuz gak boux beixnuengx hax, mwh faenhsou doxcomz gw bingj gw laeuj hih mwhde, ij rox doxdaengj doxnyiengh.

³⁴ Hauhnaeuz miz vunz iek lai, couh sien youq ndaw ranz bonjfaenh gw gaenq, mienxndaej daengz doxcomz hih mwhde, ngaiz souh daengz saemjbuenq. Couh yienghneix bax. Lij lw hih, daengj gou bae le, cij caiq gaijgyez.