Gohlimzdoh It 10 - Gij Baujcingq Moq Caeuq Geij Bonj Gij Baujcingq Daeuzdaeuz

Hawj Cangqdiq najrongh cij dwg cungqyauq

¹ Gak boux beixnuengx hax, faenhsou ijaeu ndaejgeiq, doenghbaez gij cojgoeng raeuz deuz ok Ngaihgiz ma hih mwhde, Cangqdiq yienh youq ndaw fwj hwj daiq gyoengqde sojmiz hih byaij goq rogndoi, caiq hawj raemx haij faen song mbiengj hwj, hawj gyoengqde sojmiz hih byaij goq mwnq hawq he, goq haij ma,

² hawj gyoengqde ndaej youq ndaw fwj caeuq ndaw haij sijlij, hawj gyoengqde gvi haeuj Mohsih, dingq Mohsih cijveih.

³ Gyoengqde cungj dwg doxdoengz ndaej gw cungj haeux he; gij haeux neix couh dwg Cangqdiq nyok hawj hih gij gw.

⁴ Gyoengqde caemh doxdoengz gw gij raemx he; gij raemx neix couh dwg Cangqdiq nyok hawj hih raemx. Gij raemx neix dwg daj ngauq rin hung Cangqdiq hawj gyoengqde he gaen gyoengqde he riuz okdaeuj he. Ngauq rin hung neix, couh dwg Gihduz.

⁵ Hoeng, gyoengqde ndaw de miz dingxfaen lai vunz dwg Cangqdiq mbouj haenj he; sojhij gyoengqde cungj ngaiz rai youq rogndoi hwj dauqcawq cungj miz seihaiz bae.

⁶ Cangqdiq hawj gij saeh neix fatseng dwg gingjgauq gyoengqraeuz, mienxndaej gyoengqraeuz caemh luj gij cojgoeng raeuz yienghmwnq damsim guh gij doegsieb he.

⁷ Sojhij, faenhsou mbouj ndaej luj gyoengqde miz mbangj hih vunz baiq you, cingq luj ndaw Singqgingh ndaw de sij naeuz: Gij vunz naengh roengzma gwgw angqangq, ndwn hwnjdaeuj saetsaet diuqdiuq.

⁸ Faenhsou caemh mbouj ndaej luj gyoengqde miz hih vunz guh gij ndaengndwet he, aenvih gyoengqde guh gij ya'mboujlw he famh coih, guh hwj ngoenz he miz songfanh samcien vunz ngaiz satsoq.

⁹ Faenhsou caemh mbouj ndaej luj gyoengqde miz mbangj hih vunz sawq Gihduz; gyoengqde yienghmwnq guh, guh hwj gajlaeng ngaiz ngwz haeb rai.

¹⁰ Faenhsou caemh mbouj ndaej luj gyoengqde miz mbangj hih vunz hemq ienq, yienghmwnq ngaiz bouxcai Cangqdiq cawz mingh mwnq cawz bae.

¹¹ Cangqdiq hawj gyoengqde fatseng doenghgij saeh neix, dwg vih gingjgauq gyoengqraeuz ciqgyaiq hih duenh gajlaeng de hih vunz, couh geiq sij youq ndaw Singqgingh lo.

¹² Sojhij, byawz naemqnaeuz bonjfaenh ndwn ndaej gaenj hih, byawz couh ij siujsim, mienxndaej ngaiz laemx.

¹³ Mboujgoq, faenhsou roeb daengz ngaiz yaeuh ngaiz longx hwj famh coih hih, cungj dwg caeuq sojmiz hih vunz ngaiz yaeuh ngaiz longx hih doxdoengz lah. Hoeng, Cangqdiq dwg sinq ndaej goq hih; de gaengjdingq mbouj hawj faenhsou ngaiz souh daengz yaeuh longx hwj dingx mbouj ndaej law. Dauq dwg youq mwh faenhsou ngaiz yaeuh ngaiz longx hih mwhde, hawj rengz hawj faenhsou, hawj faenhsou ndaej dingx ndaej goq, hawj faenhsou hoi diuz roen he lah.

¹⁴ Sojhij, gou cinhngaiq dih gak boux beixnuengx hax, faenhsou mbouj ndaej baiq you.

¹⁵ Faenhsou dwg vunz coengjmingz hih; gou soj gangj hih vah dwg mbouj dwg miz dauhleix, faenhsou gag ngeixngeix yawj.

¹⁶ Moix it mbat gyoengqraeuz gijnenq bouxcawj raeuz Yehsuh Gihduz vih gyoengqraeuz rai hwj gw cenj laeuj docih de mwnq, mbouj dwg doxdoengz ndaej yangjcouq gij lwed Yehsuh Gihduz hih maz? Gyoengqraeuz soj euj hih bingj, mbouj dwg doxdoengz ndaej yangjcouq aen ndangdaej Gihduz hih maz?

¹⁷ Gannaeuz gyoengqraeuz vunz lai lah, hoeng, dauq dwg caemh aen ndang dog, aenvih gyoengqraeuz cungj caemh yangjcouq aen bingj dog.

¹⁸ Faenhsou yawjyawj gij vunz Hijswzlez lux: gyoengqde gw doenghgij bwiz goq Cangqdiq he le, gajlaeng, gyoengqde mbouj dwg caemh ndaej bienqbaenz gaep guh buek vunz baiq Cangqdiq he lo mah?

¹⁹ Gou gangj hih gij vah neix dwg gijmaz iqswh nej? Dwg naeuz duz you caeuq gij dajbwiz de miz yungh hih mah?

²⁰ Ciuq gou ma naeuz hax, gaenhbaenj mbouj miz guxmaz yungh. Doenghheij bwiz you hih vunz, gyoengqde bwiz hih dwg bwiz fangz he, mbouj dwg bwiz Cangqdiq law. Gou mbouj haenj faenhsou caeuq fangz miz gvanhaeh hih.

²¹ Faenhsou mbouj ndaej cix gw cenj gijnenq bouxcawj raeuz mwnq, cix gw cenj bwiz duz fangz he; mbouj ndaej caeuq bouxcawj gw haeux caiq bae caeuq fangz gw haeux.

²² Nanzdauh gyoengqraeuz siengj yex bouxcawj raeuz fatheiq mah? Gyoengqraeuz ndaej giengz goq de mah?

²³ Miz vunz naeuz: “Raeuz haenj guh gijmaz saeh cungj ndaej, cijaeu raeuz haenj.” Gawq vah neix deng hih, mbouj loek, hoeng, mbouj dwg naeuz moix it gienh saeh cungj doiq vunz miz ik law. Gannaeuz gijmaz saeh raeuz haenj guh couh guh lah, hoeng, gou naeuz hax, mbouj dwg gijgij saeh cungj ndaej bang vunz law.

²⁴ Gou naeuz sou hax, faenhsou mboujguenj bouxlawz, cungj mbouj ndaej caenh rox daengz bonjfaenh, doiq bonjfaenh miz ik cij ndaej; caemh ijaeu ngeix daengz vunz cij ndaej.

²⁵ Sojhij gou naeuz sou hax, ndaw hangznoh hai hih noh, faenhsou cungj ndaej seizbienh cawx ma gw; mboujyungh lau naeuz bwiz goq duz you caeuq doiq mbouj hwnj liengzsim hwj cam gijmaz,

²⁶ aenvih ndaw Singqgingh ndaw de sij naeuz: Dienyah sojmiz hih cungj dwg gij Cangqdiq liux.

²⁷ Sojhij, hauhnaeuz miz gij vunz mbouj sinq Cangqdiq he cingj faenhsou gw haeux, gyoengqde cingj faenhsou gw gijmaz, faenhsou couh gw gijmaz. Mboujyungh rox doenghgij gw mwnq dwg mbouj dwg bwiz goq duz you, mienxndaej faenhsou rox le, couh roxnginh sim mbouj onj.

²⁸ Hoeng, hauhnaeuz miz vunz doiq faenhsou naeuz: “Gij noh neix bwiz goq duz you he!” Yiengq faenhsou couh ij vih boux naeuz sou ni mwnq hwj mbouj gw gij noh mwnq, caeuq vih sim'onj mbouj onj hwj mbouj gw gij noh mwnq.

²⁹ Mboujgoq, gou dineix naeuz hih “sim'onj mbouj onj” mbouj dwg ceij mwngz naeuz law, dauq dwg ceij boux naeuz sou ni mwnq lah. Yiengq faenhsou aiq ij miz vunz cam naeuz: “Gou miz gienz haenj mbouj haenj gw noh hah; vihmaz ij guenj daengz vunz sim'onj mbouj sim'onj baenzlaw yiengh bae nej?

³⁰ Hauhnaeuz gou miz aen sim docih Cangqdiq he, docih le, gou cij gw, yiengq vunz ij baenzlawz naeuz gou gw gij noh mwnq nej?”

³¹ Hoeng, daengj gou naeuz sou ni vih guxmaz bax. Mboujguenj faenhsou gw gijmaz cixnaeuz guh gijmaz, cungj ij wnggai ngeix daengz hawj Cangqdiq najrongh.

³² Sojhij faenhsou mboujguenj caeuq gij vunz Youzdaiq cixnaeuz caeuq gij vunz Hihlaz cixnaeuz caeuq doenghheij sinq Gihduz hih vunz youq itheij, cungj mbouj ndaej vih bonjfaenh soj guh hih hwj hawj vunz dwgcaengz.

³³ Faenhsou dauq ij luj gou; vih ij hawj vunz ndaej gouq, mboujguenj guxmaz, cungj mbouj wnggai ngeix daengz doiq bonjfaenh miz mbouj miz ik, dauq ij ngeix daengz vunz, hawj vunz haenjheiq.