Gohlimzdoh It 1 - Gij Baujcingq Moq Caeuq Geij Bonj Gij Baujcingq Daeuzdaeuz

¹ Gou dwg Baujloz, dwg Cangqdiq ciuq gij cawjeiq bonjfaenh de ma senj gou, hawj gou guh boux dwzbaijyienz Yehsuh Gihduz he. Gou caeuq Sojdizniz boux beixnuengx neix

² sij saenq hawj youq Gohlimzdoh Singz Cangqdiq dih gyauqveiq, couh dwg sij hawj doenghheij vunz Cangqdiq senj okdaeuj guh hab'eiq habhoz bonjfaenh de he. Faenhsou caeuq youq gak dieg nginh Yehsuh Gihduz dwg bouxcawj he doxdoengz dwg senj okdaeuj gvi haeuj gij vunz Cangqdiq he. Gihduz dwg bouxcawj gyoengqde, caemh dwg bouxcawj gyoengqraeuz.

³ Muengh daxboh raeuz Cangqdiq caeuq bouxcawj raeuz Yehsuh Gihduz doiq faenhsou haijliengh, hawj faenhsou bingzan!

Docih Cangqdiq

⁴ Gou, Baujloz, siengzseiz cungj docih Cangqdiq, aenvih Yehsuh Gihduz doiq faenhsou haijliengh raixcaix,

⁵ sawjhawj faenhsou gaiqgaiq cungj fungcuk; goujcaiz hah ciqsiz hah cungj miz raixcaix.

⁶ Yienghneix faenhsou couh ndaej gaengjdingq gyoengqraeuz yiengq faenhsou soj gangj hih gvanhhih Gihduz dih saeh cungj dwg saedsaeh hih lo.

⁷ Sojhij faenhsou youq daengj bouxcawj raeuz Yehsuh Gihduz dauq daeuj hih mwhde, mboujguenj guxmaz cungj mbouj noix Hoenzsaenz Cangqdiq soj nyok hawj hih.

⁸ De caemh gaengjdingq bang faenhsou hawj faenhsou gyenhgyangz roengzbae, hawj faenhsou ndaej youq mwh bouxcawj raeuz Yehsuh Gihduz dauq daeuj hih mwhde mij maz ndaej diudik he.

⁹ Cangqdiq dwg saedsaeh hih sinq ndaej goq hih; de senj faenhsou hawj faenhsou ndaej caeuq daeglwg de, bouxcawj raeuz Yehsuh Gihduz, guh beixnuengx.

Gienq gyauqveiq doxhuz

¹⁰ Gak boux beixnuengx hax, gou baengh bouxcawj raeuz Yehsuh Gihduz gienq faenhsou, gouz faenhsou wnggai doxhuz; mbouj ndaej doxceng, mbouj ndaej faen banghbaij, ij caezsim,

¹¹ aenvih ndaw ranz Gwzlaiz miz vunz naeuz gou ni naeuz youq ndaw gyoengq beixnuengx faenhsou ndaw de miz vunz doxceng.

¹² Dineix gou gangj hih iqswh dwg naeuz gou dingqri naeuz faenhsou ndaw de miz hih vunz naeuz: “Gou dwg gaen Baujloz he,” miz hih vunz naeuz: “Gou dwg gaen Yaqbohloz he,” caemh miz hih vunz naeuz: “Gou dwg gaen Bijdwz he,” caemhcaiq miz hih vunz naeuz: “Gou dwg gaen Gihduz he.”

¹³ Yiengq youq dineix, gou cam faenhsou, Gihduz dwg faen geij baij hih haj? Nanzdauh Baujloz dwg vih faenhsou hwj ngaiz ding hwnj gwnz gyaq cixcib bae rai hih mah? Faenhsou dwg vih ij bienqbaenz gij lwgsae Baujloz hwj sijlij hih mah?

¹⁴ Hoeng, gou docih Cangqdiq, gou cawzok sijlij hawj Gihliqswhbuq caeuq Gaihyouz song boux neix, youq faenhsou mwnq gou mij sijlij hawj saek boux lo hah,

¹⁵ sojhij faenhsou ciengeiz mbouj ndaej naeuz vih ij bienqbaenz gij lwgsae Baujloz hwj sijlij lah.

¹⁶ (Ox, deng lo, gou vanzlij bang ndaw ranz Swhdizfaznaq sijlij goq; cawzok mbat mwnq, gou vanzlij sijlij hawj byawz goq, gou mij ndaejgeiq lo.)

¹⁷ Gihduz senj gou baij gou mbouj dwg hawj gou bang vunz sijlij, dauq dwg hawj gou cenzgangj gij ndei siuhsiz Cangqdiq lah. Gou cenz gij ndei siuhsiz Cangqdiq mwhde caemh mbouj dwg gauq vunz dih coengjmingz hwj siengj okdaeuj hih nej, mijn'x Gihduz ngaiz ding hwnj gwnz gyaq cixcib bae couh bienqbaenz mij'z yungh lo.

Cangqdiq dih coengjmingz

¹⁸ Gihduz ngaiz ding hwnj gwnz gyaq cixcib bae rai hih gij saeh neix, doiq doenghheij vunz satsoq he ma gangj dwg ngawz hih, hoeng, doiq gyoengqraeuz doenghheij vunz ndaej gouq he ma gangj, dauq dwg ndaej yienh ok Cangqdiq dih rengz lah.

¹⁹ Couh luj ndaw Singqgingh ndaw de soj sij naeuz hih: Gou ij byaeu doenghgij vunz gag naemqnaeuz bonjfaenh rem raixcaix hih gij rem de, ij cawz doenghheij gag naemqnaeuz bonjfaenh coengjmingz hih gij coengjmingz de.

²⁰ Sojhij coengjmingz vunz ij baenzlaw yiengh nej? Fazliz cenhgyah caemh ij baenzlaw yiengh nej? Aen seiqgyaiq neix hih benqlwnq cenhgyah caemh ij baenzlaw yiengh nej? Cangqdiq mbouj dwg gaenq hawj aen seiqgyaiq neix hih coengjmingz bienqbaenz ngawzngad lo haj?

²¹ Caenhgag Cangqdiq cij dwg cingqcaen coengjmingz he; de itmienh hawj aen seiqgyaiq neix hih vunz mij banqfaz dunghgoq gij coengjmingz bonjfaenh ma rox de, itmienh dunghgoq gyoengqraeuz soj cenz hih, couh dwg ciuq aen seiqgyaiq neix hih vunz ma yawj suenq dwg mazmwnh hih gij siuhsiz neix, ma gouq doenghheij sinq Yehsuh hih vunz.

²² Youzdaiq vunz ij yawj geizmiuj hih saeh, Hihlaz vunz ij gouz coengjmingz,

²³ hoeng, gyoengqraeuz soj cenzgangj hih cingq dwg Gihduz ngaiz ding hwnj gwnz gyaq cixcib bae rai hih gij saeh neix lah. Gij saeh neix, aeu gij vunz Youzdaiq ma yawj, dwg daekcoih gyoengqde he; aeu gij vunz Hihlaz ma yawj, dwg haeuj gij mazmwnh he.

²⁴ Hoeng, doiq doenghheij vunz Cangqdiq senj okdaeuj he ma yawj, mboujguenj Youzdaiq vunz cix ndaej, Hihlaz vunz cix ndaej, Gihduz cungj dwg Cangqdiq dih rengz, Cangqdiq dih coengjmingz,

²⁵ aenvih gij coengjmingz vunz cungj ciet mbouj ndaej gij “ngawz” Cangqdiq, gij rengz vunz caemh ciet mbouj ndaej gij rengz lwgfawzgungz Cangqdiq.

²⁶ Gak boux beixnuengx hax, ngeixngeix Cangqdiq senj faenhsou okdaeuj hih mwhde, faenhsou dwg yienghlaw hih vunz? Hauhnaeuz aeu aen seiqgyaiq neix hih vunz dih biuhcwnj ma dag nex, faenhsou ndaw de suenq naeuz coengjmingz hih gig noix, miz gienz miz ciq hih caemh gig noix, miz seqveiq diqveiq hih caemh gig noix.

²⁷ Hoeng, Cangqdiq dauq senj doenghheij vunz ngawz he, hawj doenghheij naemqnaeuz bonjfaenh coengjmingz he saetnaj saetnyaenq. De caemh senj doenghheij vunz mij maz ndaej baengh he, hawj doenghheij miz gienz miz ciq he saetnaj saetnyaenq.

²⁸ De senj doenghheij vunz vunz yawj mbouj hwnj rwz he, vunz dwgcaengz he, vunz naemqnaeuz de mbouj suenq guxmaz vunz he, ma hawj doenghheij gag naemqnaeuz bonjfaenh cungj cungqyauq raixcaix he bienqbaenz mij'z yungh,

²⁹ yienghneix hawj vunz mbouj caiq ndaej youq dangqnaj Cangqdiq gag haenh bonjfaenh lo.

³⁰ Hoeng, gyoengqraeuz ndaej baengh Cangqdiq hwj ndaej caeuq Yehsuh Gihduz doxhuz. Gyoengqraeuz caemh rox Cangqdiq baij Gihduz daeuj gouq vunz dwg coengjmingz raixcaix, gyoengqraeuz dunghgoq de hwj hawj gyoengqraeuz ndaej youq ndaw lwgra Cangqdiq suenq dwg boux mij'z coih he, ndaej guh boux hab'eiq habhoz Cangqdiq he, caemh dunghgoq de hwj gyoengqraeuz ndaej cueg ma lo.

³¹ Cingq luj ndaw Singqgingh ndaw de sij naeuz: Ij haenh, couh wnggai haenh Cangqdiq.