Gihduz Hawj Vunz Rox 9 - Gij Baujcingq Moq Caeuq Geij Bonj Gij Baujcingq Daeuzdaeuz

¹ Yiengq daengz daixhaj bouxcai boq, gou couh yawjraen miz aen ndaundeiq daj gwnzmbwn doek roengz lajmbwn bae he. Doek roengzbae le, aen de couh ciep aeu gij seiz aen vaengz he.

² Gajlaeng aen de couh hoi aen vaengz mij daej mwnq hih mwnq he, yiengq couh miz oenq daj ndaw vaengz ok daeuj; gij oenq de caenh lujnaeuz daj ndaw aen luzfeiz oenq okdaeuj nwih, oenq hwj gyangjngoenz caeuq aen mbwn cungj amq fubfub liux bae.

³ Gajlaeng engq miz daek daj ndaw oenq mbin okdaeuj, mbin roengz doem bae. Gyoengqde caemh ciep aeu gij rengz luj duz ceh he.

⁴ Gajlaeng vanzlij dingqri miz sing raengq gyoengq daek, raengq mbouj hawj gyoengqde sienghaih nywj caeuq faex caeuq gak cungj doenghgo heu he, caenhgag ndaej sienghaih doenghheij vunz najbyak mbouj yaenq miz aen yaenq Cangqdiq he.

⁵ Hoeng, mbouj ndaej gaj gyoengqde, caenh hawj gyoengqde souh nanh haj ndwen ndaej lo; gij nanh neix caenh luj ngaiz duz ceh ndat dawz yienghmwnq.

⁶ Youq haj ndwen ndaw de, gij vunz cungj cingxnyienh rai hoh lo, hoeng, rai mbouj ndaej; siengj rai cungj hoj rai.

⁷ Gou vanzlij yawjraen gij yiengh duz daek caenh luj duz max ij bae hoenxciengq yienghmwnq, ndaek raeuj de daiq miz aen gyok gim hwj, baj naj luj baj naj vunz,

⁸ byoemraeuj luj byoemraeuj vunzbaz, faenz luj faenz caiceij.

⁹ Aen aek gyoengqde miz baj he luj baj dangj aek diet he nwih. Gyoengqde mbin miz sing hwj, caenh luj duz max doxhoenx riq yienghmwnq hih sing.

¹⁰ Gij rieng gyoengqde luj rieng duz ceh yienghmwnq ngaeu, miz doeg hwj, ndaej doeg vunz haj ndwen baenx lai.

¹¹ Gyoengqde miz boux daeuzdaeuz he guenj hwj; boux de couh dwg bouxcai guenj aen vaengz mwnq. Gij coh de ciuq Hihbwzlaiz vah ma heuh couh dwg Yaqbahdoenq, ciuq Hihlaz vah ma heuh couh dwg Yaqbohlwnz, iqswh dwg naeuz ‘boux boqvaiq.’

¹² Yiengq gij nanh daixit goq le, gajlaeng vanzlij ij miz song yiengh nanh haem.

¹³ Daengz daixroek boux boq, gou couh dingqri miz sing daj aen luz gim dajbwiz dangqnaj Cangqdiq hih seiq gij gok dod de ok daeuj,

¹⁴ raengq daixroek bouxcai boq gywnhhauh mwnq naeuz: “Dawz seiq boux bouxcai goenj youq diuz dah hung Youqfazlahdij mwnq coengq bae.”

¹⁵ Gajlaeng seiq boux bouxcai mwnq couh ndaej coengq lo. Seiq boux neix Cangqdiq gaenq senqsi cix cwnjbiq ndei ij hawj gyoengqde youq bi neix, ndwen neix, ngoenz neix, mwh neix, gaj lajmbwn sam faenh cih it hih vunz rai bae lo.

¹⁶ Gou caemh dingqri miz siuhsiz naeuz gyoengqde daiq miz bingmax song'iq.

¹⁷ Yiengq gou youq ndaw luj fangxngwnzloq gou yawjraen gyoengq bingmax hih baj dangj aek de hoengz luj feiz caeuq lamz luj lamzbaujsig caeuq henj luj liuzvangz. Ndaek raeuj gyoengq max luj raeuj caiceij, conghbak gyoengqde boq miz feiz miz oenq miz liuzvangz sam cungj neix ok daeuj hwj.

¹⁸ Sam cungj neix dwk rai lajmbwn gij vunz sam faenh cih it.

¹⁹ Doenghheij max mwnq hih rengz cungj dwg cizcungh youq conghbak caeuq gij rieng. Gij rieng gyoengqde luj duz ngwz, miz raeuj hwj; gyoengqde cungj dwg aeu gij raeuj neix ma haih vunz he.

²⁰ Gou vanzlij raen doenghheij vunz mij ngaiz doenghgij neix haih dawz rai hih cungj lij mbouj vih bonjfaenh soj guh hih hwj nginh loek gaijgoq, vanzlij dwg bae baiq fangzfangz gveijgveij, caeuq baiq doenghheij aeu gim, aeu ngaenz, aeu doengz, aeu rin, aeu faex ma dik baenz guhbaenz hih, mij ndaej yawjraen hih, mij ndaej dingqri hih, cixcaemh mij ndaej byaij hih doenghheij you mwnq.

²¹ Gyoengqde caemh mbouj vih bonjfaenh gaj vunz hah, coengqfap hah, ndaengndwet hah, guxcaeg hah hwj nginh loek gaijgoq.