Gihduz Hawj Vunz Rox 8 - Gij Baujcingq Moq Caeuq Geij Bonj Gij Baujcingq Daeuzdaeuz

Mbek daixcaet mwnq lab fung

¹ Duz yiengzlwg caiq mbek daengz daixcaet mwnq lab fung hih mwhde, gwnzmbwn mij saek dij sing, dingh cubcub, daihgaiq dingh miz buenq aen cunghdaeuz yienghneix.

² Gajlaeng, gou yawjraen ndwn youq dangqnaj Cangqdiq hih caet boux bouxcai mwnq ciep aeu caet aen gywnhhauh.

³ Gajlaeng, caiq miz daixlingh boux bouxcai Cangqdiq dawz aen luz gim diemj yieng he daeuj ndwn youq henz aen luz gim coemh doenghgij dajbwiz. De ciep aeu haujlai yieng, gajlaeng couh dawz yieng coengq hwnj gwnz gij vunz Cangqdiq soj gouzhaenh Cangqdiq hih, youq gwnz aen luz gim dangqnaj aen lungzeij mwnq bae, itheij coemh hwj dajbwiz.

⁴ Yiengq gij oenq yieng mwnq caeuq gij vunz Cangqdiq soj gouzhaenh hih cungj daj ndaw fawz bouxcai Cangqdiq swng hwnjbae daengz dangqnaj Cangqdiq.

⁵ Gajlaeng bouxcai Cangqdiq dawz aen luz diemj yieng coux rim gij feiz ndaw luz coemh hwj dajbwiz hwj couh raix roengz lajmbwn bae. De baex raix roengzbae he couh doq miz byajmyig byajraez, miz sing yiengj rumxrumx, caeuq deihdoengh.

Boq gywnhhauh

⁶ Gajlaeng, caet boux bouxcai dawz gywnhhauh mwnq couh gaihcij boq lo.

⁷ Boux daixit boq, couh doq miz byagcaej caeuq feiz gyaux lwed hwj doek roengz lajmbwn bae, yiengq couh doq miz sam faenh cih it hih dieg caeuq sam faenh cih it hih faex caeuq sojmiz hih nywj cungj ngaiz gyemz coemh liux.

⁸ Yiengq daengz daixngeih boux boq, couh miz luj ndaek aen bya hung he feiz dawz ngaiz gveng roengz haij bae. Gajlaeng sam faenh cih it dih raemx haij couh bienqbaenz lwed,

⁹ ndaw haij ndaw de dih doenghduz doenghgo cungj ngaiz rai bae sam faenh cih it, ruz caemh ngaiz vaih bae sam faenh cih it.

¹⁰ Yiengq daengz boux daixsam boq, couh miz aen ndaundeiq hung he luj duj feiz dawz he daj gwnzmbwn doek roengzbae, doek roengz sam faenh cih it dih dah bae, caeuq doek roengz mboq bae.

¹¹ Aen ndaundeiq hung mwnq gij coh de heuh ‘Haemz,’ sojhij sam faenh cih it dih raemx cungj bienq haemz liux, guh hwj miz haujlai vunz gw gij raemx haemz mwnq cungj ngaiz rai lo.

¹² Yiengq daengz daixseiq boux boq, aen gyangjngoenz dih sam faenh cih it, aen ndwen dih sam faenh cih it caeuq sam faenh cih it dih ndaundeiq cungj ngaiz ngig dawz, cungj ngaiz laep. Sam faenh cih it dih doengxngoenz, sam faenh cih it dih doengxhaemh cungj mbouj miz rongh.

¹³ Gajlaeng gou caiq yawjraen miz duz yiuh he mbin youq gwnzmbwn, caemh dingqri duz de hemq naeuz: “Satsoq lo! Satsoq lo! Lajmbwn hih vunz satsoq lo! Vanzlij miz sam boux bouxcai haem couh ij boq lo!”