Gihduz Hawj Vunz Rox 7 - Gij Baujcingq Moq Caeuq Geij Bonj Gij Baujcingq Daeuzdaeuz

Cibseiqfanh seiq Hijswzlez vunz

¹ Doenghgij saeh neix goq le, gajlaeng gou caiq luj fangxngwnzloq yienghmwnq yawjraen miz seiq boux bouxcai Cangqdiq ndwn youq lajmbwn, ndwn youq seiq mienh, it boux it mienh dangx seiq mienh hih rumz, dangx mbouj hawj rumz ci lajdoem, ci haij, caeuq ci faex.

² Gajlaeng, gou caiq yawjraen miz daixlingh boux bouxcai Cangqdiq dawz aen yaenq yungjyenj mbouj rox rai dih Cangqdiq daj baixdoeng daeuj, daeuj doiq seiq boux bouxcai ndaej miz gienz ndaej sienghaih dieg caeuq haij caeuq faex mwnq hemq naeuz:

³ “Faenhsou mbouj ndaej sienghaih dieg, haij caeuq faex; daengj raeuz sien yaenq aen cangh haeuj najbyak doenghheij hoiq Cangqdiq bae gaenq.”

⁴ Gajlaeng, gou dingq naeuz youq najbyak yaenq miz yaenq hih, miz cibseiqfanh seiq Hijswzlez vunz, ndaw de gak aen cuz hih vunz cungj miz, couh dwg:

⁵ Youzdaq cuz miz fanhngeih vunz, Lijbenq cuz miz fanhngeih vunz, Gyahdwz cuz miz fanhngeih vunz,

⁶ Yaqsez cuz miz fanhngeih vunz, Nazfuzdahliq cuz miz fanhngeih vunz, Majnazsih cuz miz fanhngeih vunz,

⁷ Sihmenj cuz miz fanhngeih vunz, Liqveiq cuz miz fanhngeih vunz, Hijcazgyah cuz miz fanhngeih vunz,

⁸ Sihbuqlwnz cuz miz fanhngeih vunz, Yozswz cuz miz fanhngeih vunz, Benqyajminj cuz miz fanhngeih vunz.

Daj gak dieg daeuj hih vunz

⁹ Gajlaeng gou caiq yawjraen miz baenxbienh vunz, geq cungj hoj geq ndaej liux he, daj ciqgyaiq gak guek, gak cuz, gak minzcuz, gak mwnq vunz gangj mbouj doengz hih vah daeuj. Gyoengqde daenj buh bieg, fawz caemh dawz mbaw faex luj mbaw bingqbeiz he hwj ndwn youq dangqnaj aen lungzeij caeuq duz yiengzlwg

¹⁰ hemq goggog naeuz: “Ndaej gouq cungj dwg coengz naengh youq aen lungzeij dih Cangqdiq caeuq duz yiengzlwg!”

¹¹ Gyoengq cai Cangqdiq caemh ndwn youq seiqhenz aen lungzeij caeuq gyoengq boux gangj vah couh baenz he caeuq seiq duz doenghduz mwnq, naj yiengq aen lungzeij bae baiqsax Cangqdiq,

¹² naeuz: “Ahmaenz! Haenh, najrongh, coengjmingz, docih, ing'yungz, miz gienz, miz rengz, cungj dwg gvi hawj raeuz dih Cangqdiq, itcig yungjyenj roengzbae. Ahmaenz!”

¹³ Gajlaeng, doengh boux gangj vah couh baenz mwnq miz boux he cam gou naeuz: “Gyoengq daenj buh bieg neix dwg byawz lah? Dwg daj nwjh daeuj lah?”

¹⁴ Gajlaeng gou han boux de naeuz: “Goengjau, mwngz rox hih.” Gajlaeng boux de couh naeuz: “Doenghheij vunz neix dwg dunghgoq daixnanh, dwg daj ndaw nanh gouq okdaeuj hih, dwg yungh gij lwed duz yiengzlwg ma swiq gij buh gyoengqde hwj bieg hih.

¹⁵ Sojhij, gyoengqde ndwn youq dangqnaj aen lungzeij Cangqdiq, caemh youq aen cangqbungz Cangqdiq fungh baixndaw ngwnzngoenz swqhaeuh Cangqdiq. Boux naengh youq aen lungzeij mwnq caemh baujhuq gyoengqde,

¹⁶ baujhuq gyoengqde mbouj hawj gyoengqde caiq ngaiz iek, ngaiz hozhawq, mbouj hawj gyoengqde ngaiz gyangjngoenz nditndat yag dawz gyoengqde, sieng dawz gyoengqde,

¹⁷ aenvih youq cungqgyan dangqnaj henz aen lungzeij mwnq hih duz yiengzlwg ij ciengx gyoengqde, daiq gyoengqde bae daengz mwnq doenj raemx miz mingh he bae. Gyoengqde sojmiz hih raemxra, Cangqdiq caemh swk hawq hawj gyoengqde.”