Gihduz Hawj Vunz Rox 3 - Gij Baujcingq Moq Caeuq Geij Bonj Gij Baujcingq Daeuzdaeuz

Sij saenq hawj Sajdiz gyauqveiq

¹ Boux de vanzlij caiq naeuz: “Mwngz ij sij saenq hawj bouxcai Sajdiz gyauqveiq; mwngz ij yienghneix sij naeuz: Boux miz caet gij Hoenzsaenz Cangqdiq caeuq miz caet aen ndaundeiq hih naeuz: Gou rox mwngz soj guh hih; gou caemh rox, gannaeuz miz vunz naeuz mwngz dwg lix hih, hoeng, gizsaed mwngz dauq dwg rai hih!

² Sojhij mwngz ij singqsag goqdaeuj, dawz mwngz lij lw hih ij rai senxsenx hih fuk hwnjdaeuj, hoenz hwnjdaeuj bax, aenvih gou raen mwngz soj guh hih mij saek yiengh ndaej youq ndaw lwgra Cangqdiq gou suenq dwg guh ndaej liux he.

³ Sojhij mwngz ijaeu ndaejgeiq mwngz soj dingq soj hag hih, cungj ij ciuq bae guh, caemh ij nginh loek gaijgoq. Hauhnaeuz mwngz mbouj singqsag goqdaeuj nex, gou couh luj bouxcaeg yienghmwnq sawqmwh bae daengz mwngz mwnq; gou seizlaw bae daengz mwngz mwnq, mwngz gaenhbaenj mbouj rox.

⁴ Cijmboujgoq youq Sajdiz mwngz mwnq vanzlij miz mbangj hih vunz mij ngaiz coih uq dawz; doenghgij vunz neix boiqndaej daenj buh bieg hwj caeuq gou gaen gou.

⁵ Doenghheij ndaej hingz hih vunz couh ij daenj buh bieg. Doenghheij vunz neix, gou gaengjdingq mbouj daj ndaw bonjbouh daengh miz doenghgij coh doengh boux miz mingh he duz bae; mbouj danhcij yienghneix, vanzlij youq dangqnaj daxboh gou caeuq dangqnaj gyoengq cai daxboh gou nginh de dwg gij vunz gou.

⁶ Hoenzsaenz Cangqdiq yiengq gak gyauqveiq soj gangj hih vah, faenhsou cungj ijaeu dawz haeuj rwz dingq!”

Sij saenq hawj Feihlahdezfeih gyauqveiq

⁷ Boux de vanzlij caiq naeuz: “Mwngz ij sij saenq hawj bouxcai Feihlahdezfeih gyauqveiq; mwngz ij yienghneix sij naeuz: Boux gvi haeuj Cangqdiq, sinq ndaej goq he, dawz gij seiz Daqveiq goengjvuengz neix he, caemh hoi dou le mij'z vunz ndaej haep he, haep le caemh mij'z vunz ndaej hoi he hih boux mwnq naeuz:

⁸ Gou rox mwngz soj guh hih; gannaeuz mwngz rengz noix lah, hoeng, mwngz dauq gyenhciz ciuq gou soj gangj hih yienghmwnq bae guh, caemh nginh dwg lwgsae gou, mbouj yiem gou. Sojhij gou youq dangqnaj mwngz hoi aen dou he hawj mwngz; aen dou neix dwg mij'z vunz ndaej haep hih.

⁹ Gou naeuz mwngz ni hax, doenghheij gaep haeuj Sajdanq baij hih doenghheij vunz mwnq gag naeuz bonjfaenh gyoengqde dwg Youzdaiq vunz, gizsaed cungj dwg gyaj hih. Doenghheij vunz neix gou ij hawj gyoengqde daeuj daengz dangqnaj mwngz gvih youq henz din mwngz baiq mwngz sax mwngz, hawj gyoengqde rox gou aiq mwngz hih.

¹⁰ Aenvih mwngz gyenhciz ciuq gou gangj hih yienghmwnq bae guh, sojhij daengz baezneix lajmbwn sojmiz hih vunz cungj souh daengz daixnanh, cungj ngaiz sawq hih mwhde, gou gaengjdingq ij baujhuq mwngz.

¹¹ Gou naeuz mwngz ni, gou couh ij daeuj daengz lo. Mwngz ij baux ndei mwngz soj miz hih, mienxndaej ngaiz vunz dued aeu gij cangjbyimj mwngz ijvanh ndaej daengz hih.

¹² Ndaej hingz hih vunz, gou ij hawj de bienqbaenz diuz saeu ndaw gunghdenq Cangqdiq gou, hawj de ndaej seiqseiz youq mwnq. Gou caemh ij youq gwnz ndang de sij gij coh Cangqdiq gou, caeuq gij coh moq gou, caeuq gij coh aen singz Cangqdiq gou, couh dwg daj gwnzmbwn Cangqdiq gou mwnq roengz daeuj hih aen singz moq Yehluqsajlaengj.

¹³ Hoenzsaenz Cangqdiq yiengq gak gyauqveiq soj gangj hih vah, faenhsou cungj ijaeu dawz haeuj rwz dingq!”

Sij saenq hawj Laujdijgyah gyauqveiq

¹⁴ Boux de vanzlij caiq naeuz: “Mwngz ij sij saenq hawj bouxcai Laujdijgyah gyauqveiq; mwngz ij yienghneix sij naeuz: Boux ahmaenz, couh dwg boux lauxsaed sinq ndaej goq dih cingqyinz, boux Cangqdiq cauh sojmiz hih doenj he, de yienghneix naeuz:

¹⁵ Gou rox mwngz soj guh hih, caemh rox mwngz mbouj caep mbouj ndat. Hoeng, gou dauq cingxnyienh mwngz ganhseiq caep, cixnaeuz ganhseiq ndat suenq lo.

¹⁶ Aenvih mwngz luj raemx raeuj remxremh yienghmwnq, mbouj caep mbouj ndat mij'z yungh, sojhij gou ij daj ndaw bak gou byiq mwngz okdaeuj.

¹⁷ Gou caemh rox mwngz gag naeuz: ‘Gou fouqmiz hwx, gaenq fatcaiz lo; gijmaz cungj miz.’ Hoeng, gou naeuz mwngz hax, mwngz gaenhbaenj mbouj rox bonjfaenh mwngz baenxlai camj, baenxlai siliengz, baenxlai gungz, ra cix fangz, cix mij'z buh daenj, loxgenz loxgangh.

¹⁸ Sojhij gou vanzlij dwg gienq mwngz laeng gou cawx gij gim gaenq dizlenq goq he suenq lox, yienghmwnq hawj mwngz ndaej bienqbaenz cingqcaen fouqmiz he, hawj mwngz ndaej cawx buh bieg, ndaej daenj hwj cw aen ndangnoh hawj vunz rox saetnaj saetnyaenq mwngz, caemh ndaej cawx yw ra ma cat cehra mwngz, hawj mwngz yawj ndaej raen.

¹⁹ Famz dwg gou aiq hih, gou cungj naeuz cungj guenj. Sojhij mwngz mbouj ndaej caiq mbouj caep mbouj ndat haem lo; ij ndat hwnjdaeuj cij ndaej, caemh ij nginh loek gaijgoq.

²⁰ Gou naeuz mwngz ni, gou youq baixrog dou ndaek dou; hauhnaeuz miz vunz dingqri le couh hoi dou hawj gou hih, gou couh haeuj bae caeuq de itheij gw haeux.

²¹ Doenghheij ndaej hingz hih vunz, gou couh ij nyok hawj de miz gienz ndaej caeuq gou itheij naengh youq aen lungzeij gou, caemh luj gou ndaej hingz le caeuq daxboh gou itheij naengh youq aen lungzeij de yienghmwnq.

²² Hoenzsaenz Cangqdiq yiengq gak gyauqveiq soj gangj hih vah, faenhsou cungj ijaeu dawz haeuj rwz dingq!”