Gihduz Hawj Vunz Rox 22 - Gij Baujcingq Moq Caeuq Geij Bonj Gij Baujcingq Daeuzdaeuz

^1-2 Gajlaeng, bouxcai mwnq caiq hawj gou raen [2a]doenghheij diuz gai ndaw singz mwnq hih [1b]diuz he dih cungqgyan de miz diuz dah miz mingh he. Diuz dah neix dwg daj aen lungzeij Cangqdiq caeuq duz yiengzlwg mwnq riuz okdaeuj he. Gij raemx de cingx luj ceijsingh nwih. [2b]Song hamq dah de cungj miz go faex hawj vunz ndaej miz mingh he. Go de binaengz cungj dawz cibngeih dangq mak, it ndwen it dangq. Gij mbaw de ndaej guh yw hwj, ndaej yw lajmbwn sojmiz minzcuz hih vunz.

³ Aen singz neix mij gijmaz ngaiz souh daengz mang, aenvih ndaw singz neix miz aen lungzeij Cangqdiq caeuq duz yiengzlwg youq ndaw de. Bouxhoiq Cangqdiq caemh ij swqhaeuh Cangqdiq,

⁴ caemh ndaej yawjraen de, gij coh de caemh gaengjdingq yaenq youq najbyak gyoengqde.

⁵ Aen singz neix mbouj caiq miz doengxhaemh; gyoengqde mboujyungh daeng caeuq gyangjngoenz, aenvih gij rongh Cangqdiq bouxcawj ndaej ciuq rongh hawj gyoengqde. Gyoengqde caemh ij yungjyenj guh vuengz.

Yehsuh dauq daeuj

⁶ Gajlaeng bouxcai doiq gou gangj vah mwnq caiq doiq gou naeuz: “Sojmiz mwngz luj fangxngwnzloq yienghmwnq soj yawjraen soj dingqri hih doenghgij saeh neix cungj dwg saedsaeh hih, sinq ndaej goq hih. Couh dwg boux soengq Hoenzsaenz hawj doenghheij boux cenz gij vah Cangqdiq he dih boux Cangqdiq neix hawj bouxcai de daeuj naeuz bouxhoiq de ni gij saeh ijvanh fatseng he.”

⁷ Gajlaeng gou couh dingqri Yehsuh naeuz: “Yawj hux, gou couh ij daeuj lo! Famz ciuq gij vah ndaw saw neix bae guh hih miz fuk lo!”

⁸ Gwnz neix sojmiz hih cungj dwg gou, Yozhanq, luj fangxngwnzloq yienghmwnq caenra raen, caenrwz dingqri he. Gou caenra raen caenrwz dingqri doenghgij neix le, couh bomz roengz dangqnaj bouxcai naeuz gou ni doenghgij saeh neix hih bae, ij baiq de.

⁹ Hoeng, de engq doiq gou naeuz: “Ciengeiz mbouj ndaej yienghneix! Mwngz caeuq gou caeuq doenghheij beixnuengx, couh dwg doenghheij boux cenz gij vah Cangqdiq he caeuq doenghheij ciuq gij vah mwngz soj sij hwnjdaeuj hih bae guh hih, cungj dwg doxdoengz dwg bouxhoiq Cangqdiq. Mwngz ij baiq ij sax, wnggai baiqsax Cangqdiq!”

¹⁰ Boux de vanzlij caiq doiq gou naeuz: “Mbouj ndaej dawz doenghgij mwngz sij hwnjdaeuj he, couh dwg mwngz soj yawjraen soj dingqri hih sij hwnjdaeuj hih, muenz hwnjdaeuj, aenvih mwhde couh ij daengz lo; doenghgij saeh neix couh ij fatseng lo.

¹¹ Sojhij ajcaih doenghheij guh doeg guh sieb he vanzlij guh doeg guh sieb roengzbae, simya hih vanzlij simya roengzbae. Guh ndei hih, baujciz guh ndei roengzbae; guh hab'eiq habhoz Cangqdiq hih, baujciz guh hab'eiq habhoz Cangqdiq roengzbae bax.”

¹² Youq ndaw loq gou, gou caiq dingqri Yehsuh naeuz: “Yawj bax, gou couh ij daeuj lo! Daengz mwhde, gou ij ciuq gak vunz soj guh hih ma bauqwngq gak vunz.

¹³ Gou dwg Ahlahfaz, gou dwg Ngozmeizgyaz; gou dwg daixdaeuz caemh dwg gatyet; gou dwg gaihcij, caemh dwg gatsat.

¹⁴ “Famz saeg gij buh bonjfaenh cengh hih vunz miz fuk lo! Gyoengqde miz gienz ndaej gw gij mak go faex hawj vunz miz mingh mwnq. Mbouj danhcij yienghneix, caemh vanzlij ndaej daj baksingz haeuj singz bae.

¹⁵ Hoeng, doenghheij vunz vaih, mageq he, mehsien, guhyoux he, gaj vunz he, baiq duz you he, haenj gangj gyajvah he, coemx vunz he, cungj mbouj ndaej haeuj singz bae.

¹⁶ “Gou, Yehsuh, baij bouxcai gou bae daengz gak gyauqveiq bae naeuz faenhsou ni doenghgij saeh neix, couh dwg gou, Yehsuh, dwg Daqveiq dih doengh daih gajlaeng de, dwg aen ndauhaet rongh sagsag mwnq.”

¹⁷ Hoenzsaenz caeuq bawxmoq naeuz: “Daeuj!” Dingqri hih vunz caemh wnggai naeuz: “Daeuj!” Hozhawq hih vunz caemh wnggai daeuj; haenj aeu gij raemx hawj vunz miz mingh hih vunz cungj ndaej daeuj begbeg aeu ma gw.

Gingjgauq

¹⁸ Gou, Yozhanq, gingjgauq sojmiz dingq daengz yawj daengz gou soj sij hih doenghgij vah neix hih vunz: hauhnaeuz miz vunz doeng gya sae gya gijmaz vah haeujbae nex, Cangqdiq gaengjdingq dawz gij nanh sij youq ndaw de gya hawj boux de.

¹⁹ Yiengq, caiq hauhnaeuz miz vunz gemj gij vah ndaw de bae nex, Cangqdiq caemh gaengjdingq gemj mbouj hawj boux de ndaej gij fuk gij mak go faex hawj vunz miz mingh he caeuq gij fuk aen singz ndei liuxliux mwnq.

²⁰ Boux cingqmingz doenghgij saeh neix hih boux mwnq caiq naeuz: “Deng lo, gou couh ij daeuj lo.” Ahmaenz! Yehsuh bouxcawj raeuz hax, gou muengh mwngz daeuj!

²¹ Muengh Yehsuh bouxcawj raeuz doiq gij vunz Cangqdiq haijliengh! Ahmaenz.