Gihduz Hawj Vunz Rox 21 - Gij Baujcingq Moq Caeuq Geij Bonj Gij Baujcingq Daeuzdaeuz

Mbwn moq deih moq

¹ Gajlaeng gou caiq luj fangxngwnzloq yienghmwnq yawjraen aen mbwn moq he caeuq deih moq. Yienzlaiz hih mbwn caeuq deih gaenq mij raen lo, haij caemh mij lo.

² Gajlaeng gou caiq raen aen singz Cangqdiq, couh dwg Yehluqsajlaengj Singz moq daj gwnzmbwn Cangqdiq mwnq roengz daeuj. Aen de cang hwj gyaeu gywtgywt, luj bawxmoq cang gyaeu hwj daengj gojyez moq yienghmwnq.

³ Gajlaeng, gou dingqri miz sing daj aen lungzeij hunghung mwnq cenz okdaeuj naeuz: “Neq, yawj veiq! Aen cangqbungz Cangqdiq hwnq youq mwnq vunz youq he; de ij caeuq vunz doxcaeuq youq. Vunz ij guh gij vunz de; de ij guh vunz dih Cangqdiq.

⁴ Cangqdiq ij bang gyoengqde swk raemxra hawq liux bae, hawj gyoengqde mbouj caiq miz rai, miz siengsim, miz daej, miz indot, hawj doenghbaez hih saeh goq couh goq lo, mbouj caiq miz haem lo.”

⁵ Couh youq mwhneix, boux naengh youq aen lungzeij mwnq naeuz: “Neq, yawj hux, gou dawz sojmiz hih cungj bienq moq lo!” De caiq naeuz: “Dawz gij vah gou sij hwnjdaeuj, aenvih doenghgij vah neix cungj dwg saedsaeh hih, sinq ndaej goq hih.”

⁶ Gajlaeng de vanzlij doiq gou naeuz: “Guh sat lo! Gou dwg Ahlahfaz, gou dwg Ngozmeizgyaz; gou dwg gaihcij, gou dwg gatsat. Gou ij dawz gij raemx mboq miz mingh he begbeg soengq hawj gij vunz hozhawq he gw.

⁷ Doenghheij ndaej hingz hih vunz gaengjdingq ndaej doenghgij fuk neix; gou ij guh gyoengqde dih Cangqdiq, gyoengqde caemh ij guh gij lwg gou.

⁸ Hoeng, doenghheij mbeiiq, mbouj sinq, yalw, gaj vunz, guh ndaeng guh ndwet, doeng loengh sae loengh coengqfap, baiq duz you caeuq gangj gyajvah hih vunz, cungj ij ngaiz gveng haeuj mwnq liuzvangz dawz feiz yiegyieg he bae. Gij neix couh dwg daixngeih mbat rai lo.”

Yehluqsajlaengj moq

⁹ Gajlaeng caet boux bouxcai dawz vanj gim coux rim caet gij nanh mwnq hih boux he doiq gou naeuz: “Daeuj, gou ij hawj mwngz yawj boux bawxmoq mwnq, couh dwg mehyah duz yiengzlwg.”

¹⁰ Couh youq mwhneix, Hoenzsaenz Cangqdiq doz youq gwnz ndang gou hwj, bouxcai mwnq couh daiq gou bae daengz gwnz bya hung sang he, hawj gou yawjraen daj gwnzmbwn Cangqdiq roengz daeuj hih aen singz Cangqdiq mwnq, couh dwg Yehluqsajlaengj Singz.

¹¹ Aen singz neix miz gij rongh Cangqdiq hwj rongh sagsag, myig myiengzmyiengz, myig luj dijbauj dih baujsig, caeuq luj bizhiq, hoeng gij bizhiq neix dwg cingx hih.

^12-13 Aen singz neix miz veizciengz hwj sang gvangxgvangx, caemh miz cibngeih bakdou, [13]doeng sae namz baek gak mbiengj cungj miz sam aen dou, [12b]caemh miz cibngeih boux bouxcai Cangqdiq souj hwj, it aen it boux. Gwnz dou gwnz de sij miz Hijswzlez dih cibngeih aen cuz hih coh.

¹⁴ Gij veizciengz mwnq caemh miz cibngeih ngauq rin hunghung guh giek; doengh ngauq rin hung gwnz de sij miz yiengzlwg hih cibngeih boux dwzbaijyienz dih coh.

¹⁵ Gajlaeng, bouxcai doiq gou gangj vah mwnq dawz diuz cik gim he daeuj ij rau aen singz mwnq caeuq doenghheij dou de caeuq gij veizciengz de.

¹⁶ Aen singz neix dwg seiq cingq seiq gok he, raez caeuq gvangq cungj dwg doxdoengz. Bouxcai mwnq sien rau aen singz neix; aen de miz fanhngeih swhdahdiz raez, gvangq, sang, cungj dwg doxdoengz.

¹⁷ Gajlaeng de caiq rau gij veizciengz hih gij na de, dwg ciuq vunz dih cikconq ma rau he, rau ndaej itgungh miz itbak seiqcib seiq caeuz.

¹⁸ Gij veizciengz neix dwg aeu bizhiq ma caep baenz he. Aen singz neix dwg aeu cwnz hih gim ma hwnq baenz he; gij gim de cingx luj bohliz nwih.

¹⁹ Doengh ngauq rin hung giek veizciengz dwg aeu gak cungj baujsig ma cang haeuj bae he. Ngauq daixdaeuz dwg bizhiq, ngauq daixngeih dwg lamzbaujsig, ngauq daixsam dwg luzmajnauj, ngauq daixseiq dwg luzbaujsig,

²⁰ ngauq daixhaj dwg hungzmajnauj, ngauq daixroek dwg hungzbaujsig, ngauq daixcaet dwg vangzbizcij, ngauq daixbet dwg ceijcanghhiq, ngauq daixgouj dwg hungzbizcij, ngauq daixcib dwg feijseiq, ngauq daixcib'it dwg aeujmajnauj, ngauq daixcibngeih dwg swjsingh.

²¹ Diuz veizciengz hih cibngeih bakdou de dwg aeu cibngeih ceh cinhcuh ma mbongq guh he; moix it bakdou dwg yungh ceh cinhcuh he ma guhbaenz hih. Doengh diuz gai ndaw aen singz neix dwg aeu cwnz hih gim ma guh he; gij gim neix cingx luj bohliz nwih.

²² Hoeng, gou mij yawjraen ndaw singz neix miz cangqbungz Cangqdiq, aenvih akak rengzrengz gaiqgaiq cungj ndaej guh daengz dih Cangqdiq bouxcawj caeuq duz yiengzlwg couh dangq dwg aen cangqbungz lo.

²³ Aen singz neix mboujyungh gyangjngoenz caeuq aen ndwen rongh nej, aenvih miz gij ronghndongq Cangqdiq caeuq miz duz yiengzlwg dangq dwg aen singz neix hih daeng he.

²⁴ Lajmbwn sojmiz hih minzcuz cungj dwg baengh gij rongh neix byaij roen he. Lajmbwn hih vuengz cungj ij daiq gij rongh bonjfaenh daeuj daengz aen singz neix.

²⁵ Aen singz neix gaengjdingq mbouj gven dou, aenvih ndaw singz mbouj miz doengxlaep.

²⁶ Lajmbwn sojmiz minzcuz hih fuqgveiq yungzdaeuz cungj daiq haeuj aen singz neix bae.

²⁷ Hoeng, famz mbouj hab'eiq habhoz Cangqdiq hih, guh doenghgij doegsieb, simya, yalw, gangj gyajvah hih cungj mbouj ndaej haeuj aen singz neix bae; caenhgag doenghheij vunz ndaej daengh haeuj ndaw bonjbouh duz yiengzlwg, bonjbouh miz mingh mwnq bae hih, cij ndaej haeuj aen singz neix bae.