Gihduz Hawj Vunz Rox 20 - Gij Baujcingq Moq Caeuq Geij Bonj Gij Baujcingq Daeuzdaeuz

Cien bi

¹ Gajlaeng, gou caiq luj fangxngwnzloq yienghmwnq yawjraen miz boux bouxcai he dawz fag seiz aen vaengz mwnq caeuq dawz diuz lienh hung he daj gwnzmbwn roengz daeuj.

² De roengz daeuj le, couh gaemh dawz duz lungz mwnq, couh dwg duz ngwz doenghbaez yaeuh vunz mwnq, caemh heuh fangzvuengz Sajdanq hih mwnq, gaemh dawz duz de goenj hwnjdaeuj, goenj cien bi.

³ Caemh dawz duz de gveng roengz aen vaengz he bae gyaeng, suj hwj mbouj hawj de caiq ndaej coemx lajmbwn hih vunz, itcig suj daengz goq cien bi le, cij ndaej camqciz coengq duz de.

⁴ Gajlaeng, gou caiq yawjraen miz geij aen lungzeij miz vunz naengh hwj, gyoengq vunz neix caemh ndaej miz gij gienz saemjbuenq he hwj. Gajlaeng, gou caiq yawjraen doenghgij hoenzsaenz doenghheij vih Yehsuh hwj guh cingqyinz caeuq vih cenzgangj gij vah Cangqdiq hwj ngaiz vunz raemj ndaek raeuj gat hih doenghheij vunz mwnq, yawjraen gyoengqde cungj ndaej dauqlix lo, cungj ndaej caeuq Gihduz itheij guh vuengz itcien bi. Doenghheij vunz neix, gyoengqde dwg mij baiq goq duz nyaen caeuq duz you nyaen, caemh mij youq najbyak cixnaeuz youq gwnz fawz yaenq miz gij geiqhauh he he.

⁵ Mbat neix dwg daixit mbat dauqlix; lij lw hih vunzrai vanzlij mijyaengz ndaej dauqlix, ij daengj daengz cien bi mwnq sat le cij ndaej.

⁶ Doenghheij ndaej haeuj daixit mbat dauqlix hih vunz dwg miz fuk hih, dwg gij vunz Cangqdiq hih. Gyoengqde mbouj caiq ngaiz rai daixngeih mbat haem lo; gyoengqde ij ndaej guh goengjsae dajbwiz Cangqdiq caeuq Gihduz he, caemh ij caeuq Gihduz itheij guh vuengz cien bi.

Sajdanq satsoq

⁷ Yiengq cien bi mwnq goq le, Sajdanq ndaej daj ndaw vaengz coengq okdaeuj.

^8-9 De ndaej coengq okdaeuj le, gaengjdingq bae coemx lajmbwn sojmiz hih guek—Gohgwz caeuq Majgoz couh dwg daiqbiuj sojmiz hih guek—bae hawj gyoengqde bae [9a]mwnq dieg gvangq he doxcomz, [8b]hawj gyoengqde cwnjbiq bae doxhoenx. Gij vunz gyoengqde lai hux lai. [9b]Gyoengqde bae gvaeg gij vunz Cangqdiq soj youq hih yingz, couh dwg aen singz Cangqdiq haenj he. Hoeng, miz feiz daj gwnzmbwn roengz daeuj gyemz dawz gyoengqde, byaeu liux.

¹⁰ Coemx gyoengqde hih fangzvuengz ngaiz gveng haeuj mwnq liuzvangz dawz feiz bae, couh dwg mwnq duz nyaen caeuq boux gyaj hih boux cenz gij vah Cangqdiq youq he. Youq mwnq ngwnzngwnz ngoenzngoenz yungjyungj yenjyenj souh haemz souh hoj mbouj dingz.

Saemjbuenq

¹¹ Gajlaeng, gou caiq yawjraen miz boux he naengh youq aen lungzeij bieg hunghung he; mbwn caeuq dieg cungj daj dangqnaj de deuz hwj maetlaenq bae, mij raen ingj haem lo.

¹² Gajlaeng, gou caiq yawjraen miz vunzrai, mboujguenj boux dang ak, cixnaeuz boux mij dang saek yiengh yaqyuij he, cungj ndwn youq dangqnaj aen lungzeij mwnq, caemh raen miz geij gienj saw hoi hwj, caemhcaiq raen miz daixlingh gienj ndaw de sij miz gij coh doengh boux ndaej lix he, dwg bonjbouh miz mingh he; gienj de caemh hoi hwj. Yiengq gij vunz gaenq rai he hih gij vunz neix, Cangqdiq cungj ciuq gyoengqde soj guh hih sij youq ndaw gienj saw hih ma saemjbuenq gyoengqde.

¹³ Daiqlienz ndaw haij hah, ndaw moh hah, ndaw laep hah, cungj coengq doenghheij vunzrai he okdaeuj. Gyoengqde cungj caemh ngaiz ciuq gyoengqde soj guh hih ma souh daengz saemjbuenq.

¹⁴ Gajlaeng, rai caeuq ndawlaep cungj ngaiz gveng haeuj mwnq feiz dawz mwnq bae. Gij feiz neix couh dwg daixngeih mbat rai.

¹⁵ Famz gij coh byawz mij daengh youq ndaw bonjbouh miz mingh hih cungj ngaiz gveng haeuj mwnq feiz dawz mwnq bae.