Gihduz Hawj Vunz Rox 2 - Gij Baujcingq Moq Caeuq Geij Bonj Gij Baujcingq Daeuzdaeuz

Sij saenq hawj Hijfuzsoj gyauqveiq

¹ Boux de yienghneix naeuz le, gajlaeng vanzlij caiq doiq gou naeuz: “Mwngz ij sij saenq hawj bouxcai Hijfuzsoj gyauqveiq; mwngz ij yienghneix sij naeuz: Boux fawz gvaz dawz caet aen ndaundeiq, youq cungqgyan caet aen gyaqdaeng gim mwnq byaij hih boux mwnq yienghneix naeuz:

² Gou rox mwngz soj guh hih dwgrengz caeuq gyenhciz roengzbae, caemh rox mwngz dwgcaengz vunz rwix vunz vaih. Mwngz caemh caz goq doenghheij gag naeuz bonjfaenh dwg dwzbaijyienz he, caz ndaej ok gyoengqde dwg gyaj hih, doenghheij vunz mwnq.

³ Gou caemh rox mwngz vih gou hwj dwgrengz sinhoj, mbouj doeknaiq.

⁴ Hoeng, miz gienh saeh he, gou ij naeuz mwngz, couh dwg naeuz mwngz mbouj luj gaxgonq yienghmwnq miz aiqsim laem lo.

⁵ Mwngz gag ngeixngeix yawj, mwngz bienq vaih daengz yienghlaw bae lo. Mwngz ij nginh loek gaijgoq, ij dauqyungz luj gaxgonq yienghmwnq miz aiqsim hwj bae guh saeh. Mbouj nex, gou couh bae mwngz mwnq, dawz aen gyaqdaeng mwngz daj mwnq yienzlaiz he dawz deuz.

⁶ Cijmboujgoq nex, mwngz vanzlij miz gij ndei he, couh dwg mwngz caeuq gou doxdoengz cungj dwg dwgcaengz gij vunz gaep haeuj Nizgohlah gyauqbaij soj guh hih.

⁷ Hoenzsaenz Cangqdiq yiengq gak aen gyauqveiq soj gangj hih vah, faenhsou cungj ijaeu dawz haeuj rwz dingq! Ndaej hingz hih vunz, gou couh nyok gienz hawj de, hawj de ndaej gw gij mak ndaw suen Cangqdiq hih gij mak go faex hawj vunz ndaej miz mingh mwnq.”

Sij saenq hawj Swqmeijnaz gyauqveiq

⁸ Boux de vanzlij caiq naeuz: “Mwngz caemh ij sij saenq hawj bouxcai Swqmeijnaz gyauqveiq; mwngz ij yienghneix sij naeuz: Boux gaihcij caeuq gatsat caemh dwg rai le dauqlix he yienghneix naeuz:

⁹ Gou rox mwngz souh nanh caemh gungz, hoeng gizsaed mwngz dwg fouqmiz hih. Gou caemh rox, doenghheij gag naeuz bonjfaenh dwg Youzdaiq vunz hih bangjlaih mwngz—gizsaed gyoengqde gaenhbaenj mbouj dwg Youzdaiq vunz, dauq dwg buek vunz Sajdanq fangzvuengz lah.

¹⁰ Gou naeuz mwngz ni, mwngz gaej lau mwngz ij ngaiz souh daengz hih nanh, couh dwg fangzvuengz ij dawz faenhsou ndaw de geij boux bae gyaeng, bae sawq, bwkhaih cib ngoenz. Mwngz cungj ij gyenhciz, rai cungj mbouj lau; yienghmwnq gou couh nyok cangjbyimj hawj mwngz ndaej seiqseiz lix.

¹¹ Hoenzsaenz Cangqdiq yiengq gak gyauqveiq soj gangj hih vah, faenhsou cungj ijaeu dawz haeuj rwz dingq! Ndaej hingz hih gaengjdingq mbouj ngaiz rai daixngeih mbat.”

Sij saenq hawj Bezgyahmoh gyauqveiq

¹² Boux de vanzlij caiq naeuz: “Mwngz ij sij saenq hawj bouxcai Bezgyahmoh gyauqveiq; mwngz ij yienghneix sij naeuz: Boux miz fag giemq bak giemq huz giemq cungj raeh he yienghneix naeuz:

¹³ Gou rox, gannaeuz mwngz youq mwnq Sajdanq fangzvuengz soj guenjciq hih deixfueng lah, hoeng mwngz vanzlij dwg gyenhciz mbouj yiem gou, mbouj vwt gou, simqciq mwh Anhdizbaq boux sinq ndaej goq neix dih boux cingqyinz gou youq faenhsou mwnq, couh dwg youq Sajdanq soj youq hih deixfueng, ngaiz gaj hih mwhde, mwngz vanzlij gyenhciz sinq gou, mbouj doeknaiq.

¹⁴ Hoeng gou miz geij gienh saeh ij naeuz mwngz, couh dwg youq mwngz mwnq miz vunz dingq Bahlanz soj son hih; boux Bahlanz neix aux Bahlwz goq, aux de hawj de bae yungx gij vunz Hijswzlez famh coih, yungx gyoengqde bae gw doenghgij bwiz goq duz you he, aux gyoengqde guh ndwet guh youx.

¹⁵ Mbouj danhcij yienghneix, vanzlij miz vunz gaep haeuj Nizgohlah gyauqbaij he.

¹⁶ Sojhij, gou naeuz hax, mwngz ij wnggai nginh loek gaijgoq; mbouj nex, gou couh ij bae laeng mwngz mwnq, yungh fag giemq ndaw bak gou ma hoenx gyoengqde.

¹⁷ Hoenzsaenz Cangqdiq yiengq gak gyauqveiq soj gangj hih vah, faenhsou cungj ijaeu dawz haeuj rwz dingq! Ndaej hingz hih, gou gaengjdingq ij nyok gij mahnaq yo hwnjdaeuj mwnq hawj de. Mbouj danhcij nyok gij neix, vanzlij ij nyok ngauq rin bieg he hawj de. Ngauq rin neix gwnz de sij miz gij coh moq he. Caenhgag doengh boux ndaej daengz ngauq rin neix hih vunz cij rox gij coh neix dwg gijmaz; doengh boux mbouj ndaej hih gaenhbaenj mbouj rox.”

Sij saenq hawj Deihyajdeihlah gyauqveiq

¹⁸ Boux de vanzlij caiq naeuz: “Mwngz ij sij saenq hawj bouxcai Deihyajdeihlah gyauqveiq; mwngz ij yienghneix sij naeuz: Daeglwg Cangqdiq, couh dwg boux cehra de ronghndongq luj duj feiz, gij ha de myig luj doengz he, de yienghneix naeuz:

¹⁹ Gou rox mwngz soj guh hih aiqsim hah, sinqsim hah, swqhaeuh hah, caeuq gyenhciz hah, caemh rox mwngz seizneix soj guh hih ndeisaeh beij gaxgonq guh ndaej lai.

²⁰ Hoeng, gou miz gienh saeh he ij naeuz mwngz, couh dwg mwngz mbouj naeuz Yehsijbez meh vunz gag naeuz bonjfaenh de dwg boux cenz gij vah Cangqdiq he hih meh neix; de yungx doenghheij hoiq gou bae guh ndwet guh youx, caemh yungx gyoengqde hawj gyoengqde gw gij bwiz goq duz you he.

²¹ Gou hawj de gihveiq nginh loek gaijgoq hwj, hoeng, de cungj mbouj haenj gaij gij ndaengndwet guhyoux de.

²² Sojhij, gou couh ij hawj de bingh hwj mbouj ndaej hwnq congz. Doenghheij caeuq de guhyoux hih vunz, hauhnaeuz gyoengqde mbouj nginh loek gaijgoq nex, gou caemh gaengjdingq hawj gyoengqde caeuq de doxdoengz ngaiz souh gij nanh neix.

²³ Mbouj danhcij naeuz yienghneix, gou vanzlij ij gaj doenghheij vunz gaen de he, yienghmwnq couh ndaej hawj gyauqveiq rox gou dwg boux yawj vunz cingx goq gingq bohliz bae he, caemh dwg ij ciuq faenhsou gak vunz soj guh hih ma bauqwngq hawj gak vunz he.

²⁴ Doiq doenghheij youq Deihyajdeihlah lij lw hih mbouj dingq mbouj gaen meh vunz mwnq hih, caemh mbouj hag Sajdanq dih ndaek cungj geizheih hawj vunz hoj rox hih cungj dauhleix mwnq hih vunz, gou naeuz sou ni, gou mbouj hawj faenhsou miz maz law.

²⁵ Hoeng, faenhsou ij gyenhciz sinq gij saedsaeh Cangqdiq, itcig gyenhciz daengz gou daeuj.

²⁶ Doenghheij ndaej hingz hih ndaej gyenhciz ciuq gou soj gangj hih yienghmwnq bae guh hih, gou ij nyok gienz hawj de, hawj de ndaej guenjciq lajmbwn sojmiz hih guek,

²⁷ caemh luj boh gou nyok hawj gou hih yienghmwnq; de ij aeu mbaenq diet ma guenj gyoengqde, guenj gyoengqde caemh luj dub doengh aen aeu vax ma guh he yienghmwnq dub soiq gyoengqde.

²⁸ Gou caemh ij nyok ndauhaet hawj de.

²⁹ Hoenzsaenz Cangqdiq yiengq gak gyauqveiq soj gangj hih vah, faenhsou cungj ijaeu dawz haeuj rwz dingq!”