Gihduz Hawj Vunz Rox 18 - Gij Baujcingq Moq Caeuq Geij Bonj Gij Baujcingq Daeuzdaeuz

Bahbijlwnz Singz satsoq

¹ Gij saeh neix goq le, gajlaeng, gou caiq luj fangxngwnzloq yienghmwnq yawjraen daixlingh boux bouxcai daj gwnzmbwn roengz daeuj. Boux de gij gienz de loet hwx; gij ronghndongq de myig baenx cenz lajmbwn.

² Boux de roengz daeuj le, couh hemq goggog naeuz: “Satsoq lox! Bahbijlwnz singz hung satsoq lox! Aen de satsoq hwj bienq dieg fangz yak youq hih dieg, bienqbaenz rongz fangzfangz gveijgveij roeg yalw youq he lux,

³ aenvih gak guek hih vunz cungj luj gw laeuj get yienghmwnq fiz hwj caeuq de guh ndaeng guh ndwet. Lajmbwn hih vuengz cungj caeuq de guhyoux; sojmiz lajmbwn guh seng'eiq hih vunz cungj vih de hih ak cajbaizcangz, haenj cang hwj ndaej fatcaiz.”

⁴ Gajlaeng, gou caiq dingqri daixlingh gij sing daj gwnzmbwn naeuz: “Gij vunz gou hax, vaiqdi daj aen singz mwnq ok ma bax, mienxndaej ngaiz souh coih souh nanh gajlaeng hangx de,

⁵ aenvih de doegdoeg siebsieb famh daengz mbwn, de sojmiz hih doegsieb Cangqdiq cungj ndaejgeiq.

⁶ De baenzlaw doiq vunz, faenhsou caemh ij baenzlaw doiq de; ciuq de soj guh hih, gya boix bauqwngq hawj de. Yungh aen cenj boiq laeuj de gya boix boiq hawj de gw.

⁷ De baenzlaw haenj cang baenzlaw cajbaizcangz, faenhsou caemh ij hawj de baenzlaw haemzhoj gikheiq, aenvih ndaw sim de siengzseiz gag naemj naeuz: ‘Gou dwg nijvangz, mbouj dwg mehmaiq; gou gaengjdingq mbouj miz maz gikheiq siengsim.’

⁸ Couh vih yienghneix, de youq ngoenz he couh ij ngaiz nanh dawz caezcup, couh dwg iekvangh hah, siengsim hah, rai hah. De caemh ngaiz feiz gyemz coemh liux, aenvih saemjbuenq de dih Cangqdiq bouxcawj dwg ak raixcaix hih.

⁹ “Doenghheij caeuq de guhyoux hih vuengz ij caenra raen gij oenq ngaiz feiz gyemz dawz de he, caemh daej de.

¹⁰ Gyoengqde doiq de soj souh daengz hih nanh cungj lau hwj ij rai, cungj ndwn youq gyae'gyae naeuz: ‘Camj hoh! Camj hoh! Aen singz hunghung loetloet dih Bahbijlwnz camj hoh! Aen de ngamq baex yaepyet he, mbouj daengz diemjcung cizgyenh he, couh ngaiz fad hwj byaeu liux lo!’

¹¹ “Lajmbwn guh seng'eiq hih vunz caemh ij vih de hwj siengsim gikheiq daej vauxvaux, aenvih caiq mij'z vunz daeuj cawx gij doxgaiq gyoengqde lo.

¹² Mij'z vunz cawx gij gim, gij ngaenz, gij baujsig, gij cinhcuh, gij boiq siqmaz, boiq aeuj boiq hoengz, couzcouz duenqduenq caeuq gak cungj faex rang, gak cungj faenz duzciengh guhbaenz hih doxgaiq caeuq gak cungj dijbauj hih faex hah, caeuq doengzdoengz dietdiet, daqlijsiz hih daqlijsiz hah,

¹³ gveiqbiz hah, yanghliuq hah, yieng hah, mozyoz hah, yeijyangh hah, laeuj hah, youz makmbi hah, mbamienh hah, ceh mienh hah, doenghgij neix haem lo. Caemh vanzlij mij'z vunz cawx gij cwzcwz yiengzyiengz, maxmax cici hah, caeuq vunzhoiq hah, vunz hah haem lo.

¹⁴ “Gyoengqde caemh gaengjdingq ij doiq Bahbijlwnz aen singz hung neix naeuz: ‘Mwngz haenj doenghgij doxgaiq gyaeundei he cungj mbouj raen lo; sojmiz hih gyaeugyaeu ndeindei dijbauj dijbauj cungj bienq raemz bienq reb liux lo, mbouj caiq miz haem lo.’

¹⁵ “Doenghheij gauq hai doenghgij neix hawj de ndaej fatcaiz hih vunz caemh vih de soj souh hih nanh hwj lau hwj ij rai, caemh ndwn youq gyae'gyae siengsim hwj daej

¹⁶ naeuz: ‘Camj hoh! Camj hoh! Aen singz hung neix camj hoh! Mwngz soqlaiz cungj dwg daenj hoengz daenj henj, daenj buh boiq siqmaz, cixcaemh daiq gim daiq baujsig daiq cinhcuh hwj cang guh gyaeu guh ndei.

¹⁷ Hoeng, mbouj daengz diemjcung he, baenx lai hih cienzcienz ngaenzngaenz gyadangq hih gyadangq cungj byoeng liux!’ “Sojmiz hih cawjruz, hek ruz, fouruz caeuq sojmiz gauq gwnz haij gw hih cungj ndwn youq gyae'gyae,

¹⁸ gyoengqde ndwn youq gyae'gyae yawj aen singz Bahbijlwnz ngaiz gyemz dawz oenq ngaujngauq, couh hemq naeuz: ‘Miz aen singzlaw ndaej beij aen singz hung neix nej?’

¹⁹ Gyoengqde yienghneix hemq le, vanzlij gag aeu boenqcingh ma vanq hwnj gwnz dingjraeuj bonjfaenh bae daej ngwdngwd hemq naeuz: ‘Camj lux! Camj lux! Aen singz hung neix hax! Camj lux! Famz miz ruz youq gwnz haij hih cungj dwg gauq de fatcaiz; de gingqyienz mbouj daengz diemjcung he couh ngaiz byaeu liux lux!’”

²⁰ Gou caemh vanzlij caiq dingqri gij sing mwnq daj gwnzmbwn hemq naeuz: “Mbwn hax, vih de yienghneix hwj angq bax! Gij vunz Cangqdiq caeuq gyoengq dwzbaijyienz caeuq gyoengq boux boux cenz gij vah Cangqdiq hax, faenhsou vih de hwj angq bax! Aenvih Cangqdiq gaenq bang faenhsou gauq de fad de lo.”

²¹ Gajlaeng gou caiq yawjraen boux bouxcai akak rengzrengz he yingx ndaek ngauq rin he, ngauq rin de hung luj famuh nwih, gveng roengz haij bae, naeuz: “Bahbijlwnz aen singz hung neix caemh ij luj yienghneix ngaiz gveng roengz haij bae, it di cungj mij raen lo.

²² Mwngz mbouj caiq ndaej dingqri sing gimz, sing go, sing boq dig, sing boq yangzhauh haem lo. Youq mwngz dimwnq mbouj caiq ndaej raen miz gij vunz miz dinfawz he haem lo, sing muh caemh mbouj caiq miz haem lo,

²³ caemh mbouj caiq miz daeng rongh haem caeuq mbouj caiq miz sing aeu bawx haq sau haem lo. Gaxgonq gij vunz mwngz guh seng'eiq dwg lajmbwn ceiq lek he; lajmbwn sojmiz hih vunz cungj ngaiz gij fap mwngz haeuj liux, moengx liux.

²⁴ Doengh boux cenz gij vah Cangqdiq caeuq gij vunz Cangqdiq caeuq lajmbwn sojmiz ngaiz gaj hih vunz hih lwed cungj youq aen singz mwngz dimwnq yienh okdaeuj lo.”