Gihduz Hawj Vunz Rox 14 - Gij Baujcingq Moq Caeuq Geij Bonj Gij Baujcingq Daeuzdaeuz

Gij go moq gwnzmbwn

¹ Gajlaeng gou caiq luj fangxngwnzloq yienghmwnq yawjraen duz yiengzlwg mwnq ndwn youq gwnz bya Cizanh. Caeuq duz de ndwn youq mwnq hih miz cibseiqfanx seiq vunz, najbyak gyoengqde cungj sij miz gij coh duz yiengzlwg mwnq caeuq gij coh daxboh de.

² Gajlaeng, gou dingqri gwnzmbwn miz sing luj sing raemxfai yienghmwnq biu saxsax caenh luj byajraez, cixcaemh luj sing vunz danz gimz yienghmwnq.

³ Gyoengqde youq dangqnaj aen lungzeij Cangqdiq caeuq youq dangqnaj seiq duz doenghduz caeuq gyoengq vunz gangj vah couh baenz mwnq ciengq gij go moq. Diuz go moq neix, caenhgag doenghheij daj lajmbwn cueg ma hih, couh dwg cibseiqfanx seiq hih doenghheij vunz neix, hag ndaej rox ciengq sat hoh.

⁴ Doenghheij vunz neix cungj dwg mijyaengz yaek haeuj laeng vunzbaz bae goq he hih vunzsai. Gyoengq vunz neix cungj dwg daj ndaw gij vunz lajmbwn cueg ma gvi haeuj Cangqdiq caeuq gvi haeuj duz yiengzlwg hih daixit buek he. Gyoengqde mboujguenj duz yiengzlwg bae daengz mwnqlaw, gyoengqde cungj caemh gaen bae daengz mwnqlaw.

⁵ Gyoengqde coengzlaiz mbouj gangj gyajvah, cungj dwg mij maz ndaej diudik he hih.

Sam boux bouxcai Cangqdiq

⁶ Gajlaeng gou vanzlij caiq yawjraen miz boux bouxcai Cangqdiq he mbin youq gwnzmbwn. De miz seiqseiz mbouj rox bienq dih ndei siuhsiz ij cenz hawj lajmbwn sojmiz hih vunz, mboujguenj aen gueklaw, aen minzcuzlaw, aen cuzlaw, gangj gijmaz vah, de cungj cenz.

⁷ Boux de mbin youq gwnzmbwn hemq goggog naeuz: “Ij soenhgingq Cangqdiq, ij haenh de veijdaq! Aenvih de saemjbuenq vunz lajmbwn hih mwhde couh daengz lo. Wnggai baiq boux cauh mbwn cauh deih cauh haij caeuq cauh sojmiz doenj raemx hih boux neix.”

⁸ Gajlaeng, gou caiq dingqri daixlingh boux bouxcai ciep boux bouxcai daixdaeuz mwnq naeuz: “Doemq lo! Doemqdak liux lo! Doemqdak liux lo! Bahbijlwnz aen singz hung neix doemqdak liux lo! Aenvih de hawj sojmiz hih vunz caeuq de guh ndaeng guh ndwet, hawj gyoengqde luj gw laeuj get fiz yienghmwnq guh ndaeng guh ndwet!”

⁹ Gajlaeng caiq miz daixsam boux bouxcai caemh gaen song boux bouxcai gaxgonq mwnq hemq goggog naeuz: “Byawz baiq duz nyaen caeuq baiq duz you nyaen, caeuq youq najbyak cixnaeuz youq gwnz fawz yaenq miz yaenq hih,

¹⁰ caemh ij ngaiz gw gij laeuj get Cangqdiq lo; gij laeuj neix dwg caem youq aen cenj coux Cangqdiq aeuqheiq he. Mbouj danhcij yienghneix, vanzlij ij youq dangqnaj boux bouxcai Cangqdiq caeuq youq dangqnaj duz yiengzlwg ngaiz souh daengz feiz caeuq liuzvangz gyemz dawz.

¹¹ Gyemz dawz gyoengqde hih feiz yungjyenj mbouj rox maet. Doenghheij baiq duz nyaen caeuq baiq duz you nyaen hih caeuq doenghheij yaenq miz gij coh duz nyaen hih gyoengqde ngwnzngoenz cungj mbouj ndaej an'onj.”

¹² Hoeng gangj daengz doenghheij soenhsouj Cangqdiq dih mingqlingq, sinq Yehsuh hih doenghheij vunz Cangqdiq, gyoengqde ijaeu gyenhciz naenxsim.

¹³ Couh youq mwhneix, gou caiq dingqri miz sing daj gwnzmbwn naeuz: “Mwngz ij dawz doenghgij vah laj neix sij hwnjdaeuj, couh dwg: ‘Daj seizneix hwnj, doenghheij gvi haeuj bouxcawj raeuz hih vunzrai hih miz fuk lo!’” Gajlaeng gou dingqri Hoenzsaenz Cangqdiq han naeuz: “Deng lo! Mbouj loek! Seizneix gyoengqde ndaej souhong yietbaeg lo, aenvih gyoengqde soj guh hih caemh gaengjdingq ndaej yangjcouq.”

Lajmbwn miz sou lo

¹⁴ Gajlaeng gou vanzlij caiq yawjraen miz vangq fwj bieg he. Gwnz fwj gwnz de naengh miz boux he caenh luj vunz nwih; ndaek raeuj de gyok miz aen gyokraeuj gim he, ndaw fawz de dawz miz fag liemz raeh rwdrwd he.

¹⁵ Gajlaeng gou caiq yawjraen miz boux bouxcai Cangqdiq he daj ndaw cangqbungz Cangqdiq ok daeuj, yiengq boux naengh youq gwnz fwj mwnq hemq goggog naeuz: “Dawz fag liemz mwngz okdaeuj gvej sou lo bax, aenvih lajmbwn sojmiz hih ndaej daeng sou lo.”

¹⁶ Bouxcai mwnq yienghneix hemq naeuz le, boux naengh youq gwnz fwj mwnq couh dawz fag liemz de yiengq lajmbwn bae vanghvangh vadvad. Gajlaeng, lajmbwn sojmiz hih couh doq sou ndaej liux seuqset lo.

¹⁷ Gajlaeng, gou caiq yawjraen miz daixlingh boux bouxcai ndaw fawz de caemh dawz miz fag liemz raeh rwdrwd he hwj daj aen cangqbungz gwnzmbwn ok daeuj.

¹⁸ Gajlaeng, caemhcaiq miz boux bouxcai guenj feiz he daj aen luz dajbwiz ok daeuj. Ok daeuj le, couh yiengq boux bouxcai dawz fag liemz raeh rwdrwd mwnq hemq goggog naeuz: “Dawz fag liemz raeh rwdrwd mwngz hwnjdaeuj sougvej lajmbwn hih mak buzdauz bax! Aenvih doenghheij mak neix gaenq sug lo!”

¹⁹ Bouxcai mwnq yienghneix hemq le, bouxcai dawz liemz raeh mwnq couh dawz liemz yiengq lajmbwn bae vadvad vanghvangh; gajlaeng, couh dawz buzdauz sou liux lo, caemh dawz buzdauz gveng haeuj aen ciz Cangqdiq aeuqheiq hwj caij buzdauz bae.

²⁰ Aen ciz caij buzdauz neix youq rog singz. Gij mak buzdauz youq ndaw ciz ngaiz caij le, couh miz lwed daj ndaw ciz riuz okdaeuj, riuz okdaeuj lai hwj laeg daengz ndaej luj daengz conghbak duz max yienghneix baenxlai laeg bae, riuz bae baenx sambak gunghleix baenxlai gyae.