Gihduz Hawj Vunz Rox 13 - Gij Baujcingq Moq Caeuq Geij Bonj Gij Baujcingq Daeuzdaeuz

Song duz geizheih hih doenghduz

¹ Gajlaeng, gou caiq yawjraen miz duz nyaen he daj ndaw haij hwnj daeuj. Duz de miz cib gij gok caeuq caet ndaek raeuj; cib gij gok de gokgok cungj gyok miz aen gyokraeuj he, caet ndaek raeuj ndaekndaek cungj sij miz gij goujhauq daekcoih Cangqdiq he.

² Duz de luj duz gukbeuq, hoeng, gij ha de dauq luj gij ha duz goujyungz, conghbak de luj conghbak duz caiceij. Duz de daj ndaw haij hwnj daeuj le, duz lungz mwnq couh dawz gij rengz bonjfaenh de caeuq aen lungzeij bonjfaenh de caeuq gij gienz bonjfaenh de cungj gyau hawj duz de.

³ Duz nyaen mwnq miz ndaek raeuj he lujnaeuz ngaiz sieng hwj ij rai hoh nwih, hoeng, gaenq ndei lo. Cenz lajmbwn hih vunz cungj geizheih hwj gaen youq gajlaeng hangx duz de.

⁴ Yiengq, aenvih duz lungz mwnq cungj dawz gij gienz bonjfaenh gyau hawj duz nyaen mwnq lo, sojhij gyoengq vunz baiq duz lungz mwnq caemh baiq duz nyaen mwnq, vanzlij naeuz: “Byawz ndaej caeuq duz nyaen neix beij nej? Byawz ndaej ak goq de nej?”

⁵ Gajlaeng duz nyaen mwnq caiq ndaej miz conghbak gangj daixbauq he caeuq gangj gij vah daekcoih Cangqdiq he. Duz de vanzlij ndaej gij gienz ndaej seizbienh haenj guh gijmaz couh guh gijmaz baenx seiqcib ngeih ndwen.

⁶ Duz nyaen mwnq ndaej miz doenghgij neix le, couh gaihcij gangj gij vah daekcoih Cangqdiq he, yawj mbouj hwnj Cangqdiq caeuq yawj mbouj hwnj aen cangqbungz Cangqdiq caeuq yawj mbouj hwnj sojmiz youq gwnzmbwn youq he,

⁷ caemh bae hoenx gij vunz Cangqdiq, caemh hoenx ndaej goq, caemh bae guenjciq lajmbwn sojmiz hih minzcuz, gak aen cuz hah, gak gangj mbouj doxdoengz hih vah hah, gak guek hih vunz hah.

⁸ Lajmbwn sojmiz hih vunz, famz dwg daj cauh mbwn cauh deih doxdaeuj hih gij coh mij daengh youq ndaw bonj yiengzlwg ngaiz gaj hih ndaw bonjbouh miz mingh hih vunz, cungj baiq duz de.

⁹ Miz rwz ndaej dingq hih couh wnggai dingq bax!

¹⁰ Ij ngaiz gaemh dawz hih vunz gaengjdingq ngaiz gaemh dawz; ij ngaiz giemq ndaemq rai hih gaengjdingq ij ngaiz rai youq bakgyiemq. Sojhij naeuz dwg gij vunz Cangqdiq hih ijaeu miz naenxsim caeuq miz sinqsim.

¹¹ Gajlaeng, gou vanzlij caiq yawjraen miz daixlingh duz nyaen daj laj doem hwnj daeuj. Duz de miz song gij gok luj gok yiengz; gij sing duz de luj sing duz lungz.

¹² Duz de hwnj daeuj le couh yungh gij gienz duz nyaen daixdaeuz soj miz hih, hawj youq lajmbwn sojmiz hih vunz cungj baiq duz ngaiz sieng hwj ij rai hoeng gaenq ndei hih duz nyaen daixdaeuz mwnq.

¹³ Duz de caemh ndaej guh gij geizmiuj hih saeh, simqciq vanzlij ndaej youq dangqnaj vunzlai hawj feiz daj gwnzmbwn doek roengz doem bae.

¹⁴ Duz de ndaej miz gienz bang duz daixdaeuz guh gij geizmiuj hih saeh, guh hwj ndaej coemx lajmbwn hih vunz, hawj gij vunz lajmbwn guh duz you nyaen, guh duz nyaen daixdaeuz ngaiz giemq ndaemq sieng hwj ij rai hoeng gaenq ndei hih duz nyaen mwnq.

¹⁵ Duz de vanzlij miz gienz ndaej hawj gij heiq miz mingh he ndaenj haeuj laeng duz you nyaen mwnq bae, ndaej hawj duz you nyaen mwnq gangj vah, caemh hawj doenghheij vunz mbouj baiq duz you nyaen mwnq ngaiz rai.

¹⁶ Duz de vanzlij ep sojmiz hih vunz, mboujguenj dang ak cixnaeuz mij dang saek yiengh yaqyuij he, mboujguenj fouq cixnaeuz gungz, mboujguenj swqyouz cixnaeuz guh hoiq hih, cungj ij youq fawz gvaz cixnaeuz youq najbyak yaenq aen yaenq he guh geiqhauh.

¹⁷ Aen yaenq geiqhauh neix couh dwg gij coh duz nyaen mwnq cixnaeuz dwg gij coh duz de dih hauqmaj. Famz mbouj yaenq miz aen yaenq neix hih vunz, mbouj ndaej hai mbouj ndaej cawx.

¹⁸ Gangj daengz gij hauqmaj duz nyaen dwg gijmaz, mwngz bietdingh ij dwg coengjmingz hih vunz cij ndaej rox. Yiengq, hauhnaeuz mwngz dwg coengjmingz hih vunz nex, couh ndaej suenq okdaeuj lo, aenvih gij hauqmaj mwnq dwg daiqbiuj it boux vunz dih coh, couh dwg roekbak roekcib roek.