Gihduz Hawj Vunz Rox 1 - Gij Baujcingq Moq Caeuq Geij Bonj Gij Baujcingq Daeuzdaeuz

Yozhanq gangj bonj saw neix dih laizyouz

¹ Laj neix dwg Cangqdiq hawj Yehsuh Gihduz dawz gij saeh ijvanh fatseng he gangj naeuz doengh bouxhoiq de ni. Couh vih yienghneix, Yehsuh Gihduz couh baij bouxcai de daeuj naeuz gou, Yozhanq bouxhoiq de ni.

² Gajlaeng gou, Yozhanq couh dawz gij vah Cangqdiq caeuq Yehsuh Gihduz soj cingqmingz hih, fanjcingq bonjfaenh gou soj yawjraen hih soj dingqri hih, cungj sij hwnjdaeuj guh baengzgawq.

³ Doeg bonj saw neix hih vunz caeuq dingq daengz ndaw saw neix soj sij hih gij vah Cangqdiq hih caemh ciuq ndaw de soj naeuz hih yienghmwnq bae guh hih vunz miz fuk lo, aenvih mwhde couh ij daengz lo.

Yozhanq sij saenq hawj caet aen gyauqveiq

⁴ Gou, Yozhanq, sij saenq hawj Yaqsiqyaq Saengj caet aen gyauqveiq. Muengh boux gaxgonq seizneix baezneix yungjyenj miz dih Cangqdiq caeuq youq dangqnaj aen lungzeij de hih caet gij hoenzsaenz

⁵ caeuq boux lauxsaed sinq ndaej goq dih cingqyinz, daixit boux daj rai ndaej dauqlix, guh lajmbwn sojmiz vuengz hih vuengz dih Yehsuh Gihduz doiq faenhsou haijliengh, hawj faenhsou bingzan. De aiq gyoengqraeuz, vih ij hawj gyoengqraeuz ndaej duet ok coih hwj ngaiz riuz lwed vwt mingh;

⁶ de hawj gyoengqraeuz ndaej laeb baenz aen guek he, hawj raeuz ndaej guh boux goengjsae dajbwiz daxboh de, Cangqdiq. Muengh najrongh caeuq gienzveih cungj yungjyungj yenjyenj gvi hawj de! Ahmaenz.

⁷ Gou naeuz sou ni, cenz lajmbwn sojmiz hih vunz cungj ij yawjraen de caeuq gij fwj daj gwnzmbwn roengz daeuj, daiqlienz ndaemq de hih vunz cungj ij yawjraen de. De daeuj hih mwhde, lajmbwn sojmiz hih minzcuz cungj siengsim gikheiq hwj daej. Doenghgij saeh neix gaengjdingq ij fatseng. Ahmaenz.

⁸ Bouxcawj raeuz Cangqdiq naeuz: “Gou dwg Ahlahfaz, gou dwg Ngozmeizgyaz; gou dwg boux gaxgonq seizneix baezneix yungjyenj miz dih akak rengzrengz gaiqgaiq cungj ndaej guh daengz dih Cangqdiq.”

Gihduz hawj Yozhanq luj fangxngwnzloq yienghmwnq dingqri de gangj vah

⁹ Gou dwg Yozhanq, dwg caeuq faenhsou doxdoengz vih Yehsuh Gihduz hwj souh nanh, doxdoengz ndaej youq ndaw guek Cangqdiq yangjfuk, doxdoengz naenxsim mbouj doeknaiq hih beixnuengx. Caemh dwg vih ij cenz gij vah Cangqdiq caeuq vih ij guh Yehsuh dih cingqyinz hwj ngaiz boenq bae daengz aen dauj heuh Bazmoh he youq he.

¹⁰ Miz ngoenzsinghgiz he, Hoenzsaenz Cangqdiq doz youq gwnz ndang gou, hawj gou ndaej dingqri baixlaeng gou caenh lujnaeuz boq gywnhhauh yienghmwnq gog saxsax doiq gou naeuz:

¹¹ “Mwngz ij dawz mwngz soj yawjraen hih sij hwnjdaeuj, fak bae hawj Hijfuzsoj Singz hih gyauqveiq hah, Swqmeijnaz Singz hih gyauqveiq hah, Bezgyahmoh Singz hih gyauqveiq hah, Deihyajdeihlah Singz hih gyauqveiq hah, Sajdiz Singz hih gyauqveiq hah, Feihlahdezfeih Singz hih gyauqveiq hah, Laujdijgyah Singz hih gyauqveiq hah, caet aen gyauqveiq neix.”

¹² Gou dingqri yienghneix le, couh siengj veq goqma yawjyawj dauqdaej dwg byawz doiq gou gangj vah. Gou yienghneix naemj le, couh veq goqma yawj. Baex yawj he, engq yawjraen miz caet aen gyaqdaeng gim.

¹³ Caet aen daeng neix hih cungqgyan de miz boux he luj vunz nwih. De daenj buh raez rangxrangh, raez daengz laj din de, aen aek de cug miz sai gim hwj,

¹⁴ gij byoem de bieg supsup luj mwi caemh luj fwn yiengz bieg, cehra de ronghndongq luj duj feiz,

¹⁵ song gij ha de ndongq ndwtndwt myig myiengzmyiengz caenh luj gij doengz youq ndaw luz dizlenq goq cat goq he yienghmwnq, gij sing de luj raemxfai biu yienghmwnq gog saxsax.

¹⁶ Gij fawz gvaz de dawz miz caet aen ndaundeiq, conghbak de hamz miz fag giemq raeh satsat he, gij byai giemq de dwg yiengq doxok he. Baj naj de rongh sagsag luj gyangjngoenz yienghmwnq.

¹⁷ Gou baex yawjraen he, couh lau hwj laemxdengx youq dangqnaj de, iet sohsangh luj vunzrai nwih. De raen yienghneix le, couh aeu fawz gvaz de ma oemj gwnz ndang gou doiq gou naeuz: “Gaej lau, gaej lau! Gou dwg gaihcij, gou dwg gatsat lah.

¹⁸ Gou dwg seiqseiz lix hih. Gou rai goq, hoeng gou seizneix dwg lix hih; mbouj danhcij naeuz dwg lix, vanzlij dwg yungjyungj yenjyenj lix, caemh dwg cangjguenj rai caeuq ndawlaep hih seiz dou.

¹⁹ Sojhij, gou naeuz mwngz, mwngz ij dawz mwngz soj yawjraen hih, couh dwg seizneix caeuq baezneix ij fatseng hih, cungj ij sij geiq hwnjdaeuj.

²⁰ Gangj daengz mwngz soj yawjraen hih, couh dwg fawz gvaz gou dawz caet aen ndaundeiq caeuq caet aen gyaqdaeng gim, gij iqswh de dwg naeuz: caet aen ndaundeiq dwg daiqbiuj caet aen gyauqveiq dih caet bouxcai; caet aen gyaqdaeng gim couh dwg daiqbiuj caet aen gyauqveiq.”