Geiq Luqdwz 4 - Gij Baujcingq Moq Caeuq Geij Bonj Gij Baujcingq Daeuzdaeuz

Boh'ahswh aeu Luqdwz

¹ Couh yienghneix, Boh'ahswh couh bae baksingz naengh. Gajlaeng ngamqngamq luj letlet raen boux yienzlaiz de doiq Luqdwz naeuz goq naeuz miz daixlingh boux beij bonjfaenh de haemq caen he boux mwnq byaij goqdaeuj. De raen le, couh heuh naeuz: “Beix, gou cingq daengj mwngz nex! Cingj mwngz dineix daeuj naengh yaep he bax.” Boux de dingq le, couh byaij goqdaeuj naengh lo.

² Mwhde Boh'ahswh caemh dajlwh ndaw singz cingj daeuj cib boux vunz gangj vah couh baenz he naengh youq mwnq dingq.

³ Boh'ahswh couh doiq boux beixnuengx mwnq naeuz: “Nazngozmij dajlwh Mohyaz ma lo. De ij hai ndaw cuz raeuz Hijliqmijlwz dih gaiq dieg mwnq.

⁴ Gou naeuz mwngz ni, dwg siengj hawj mwngz gyezdingq cawx mbouj cawx. Hauhnaeuz mwngz cawx ma nex, couh youq dangqnaj gyoengq vunz neix cingqmingz naeuz mwngz cawx lo. Hauhnaeuz mwngz mbouj cawx, caemh cingj mwngz naeuz gou ni, aenvih mwngz youq ndaw cuz raeuz dwg boux beij gou miz swhgwz he.” Boux de dingq le, han naeuz: “Gou haenj cawx gij dieg mwnq hwj.”

⁵ Boh'ahswh caiq naeuz: “Yiengq mwngz laeng Nazngozmij cawx gij dieg mwnq nex, ij doq aeu Luqdwz mehmaiq mwnq, lwgsau Mohyaz, ma guh yah. Yienghneix gij gyahcanj boux rai mwnq couh yungjyenj lij dwg youq ndaw aen cuz boux rai mwnq.”

⁶ Boh'ahswh gangj daengz dineix le, boux beixnuengx mwnq couh naeuz: “Hauhnaeuz yienghneix nex, gou couh mbouj cawx lo. Gou mbouj siengj vihliux cawx gij dieg neix hwj dauq doiq bonjfaenh gou mbouj ndei. Gou vanzlij dwg nyiengh hawj mwngz cawx sat lo; mwngz cawx bax.”

⁷ (Yienzlaiz mwhmwnq, gij vunz Hijswzlez guh gijmaz doxvuenh haj, cixnaeuz dajcueg dajcawx dieg, cungj dwg yungh duet haiz ma gyau hawj daixlingh mbiengj, cingqmingz naeuz song mbiengj cungj gangj ndei gaengjdingq hai cawx lo.)

⁸ Yiengq, mwh boux de doq doiq Boh'ahswh naeuz “Mwngz cawx bax,” hih mwhde, de couh doq duet haiz hawj Boh'ahswh lo.

⁹ Gajlaeng Boh'ahswh couh doiq gyoengq vunz gangj vah couh baenz mwnq caeuq gij vunz gvaengz youq henz he naeuz: “Ngoenzneix faenhsou cungj caemh raen cingsuj lo bax. Hauhnaeuz baezneix miz vunz cam, faenhsou ndaej bang gou cingqmingz lo, sojmiz haeuj Hijliqmijlwz caeuq song daeglwg de Gihlenz caeuq Majlwnz hih, gou gaenq dajlwh ndaw fawz Nazngozmij cawx ma lo.

¹⁰ Cawzok gij neix, vanzlij miz, gou caemhcaiq aeu mehyah Majlwnz lwgsau Mohyaz Luqdwz ma guh yah. Yienghneix gij gyahcanj boux rai mwnq couh yungjyenj lij dwg youq ndaw aen cuz boux rai mwnq, caiq ndaej mbouj hawj gij singq de youq ndaw cuz ngaiz cied, caemh ndaej hawj gij singq de laemxdaemh youq ndaw mbanj de daihdaih cenz roengzbae. Ngoenzneix faenhsou cungj dwg gij saeh neix dih cingqmingz vunz.”

¹¹ Boh'ahswh yienghneix gangj le, doengh boux gangj vah couh baenz he caeuq mwhde soj gvaengz youq baksingz dih vunz cungj naeuz: “Raeuz nyienh'eiq cingqmingz. Muengh Yehhozvaz sawjhawj ngoenzneix haeuj aen gya mwngz bae hih dah neix, caemh luj laeb hwnj aen gya Hijswzlez dih Lahgyez caeuq Liqyaq ityiengh, miz lwg miz lan, hwngqhwngq seiqseiq. Muengh Yehhozvaz sawjhawj mwngz youq Hijfazdah cuz miz mingz, riengzmingz baenx Bwzliqhaengz.

¹² Muengh Yehhozvaz domh dah neix cungj lij oiq ndaej hawj mwngz miz vunz swnjcoj, hawj aen gya mwngz hwngqseiq luj Youzdaq caeuq Dahmaj seng dih lwg Fazlwzswh ityiengh hwngqseiq.”

Boh'ahswh caeuq de dih doengh daih gajlaeng

¹³ Couh yienghneix, Boh'ahswh couh aeu Luqdwz ma guh yah lo. De caeuq Luqdwz guh gvanjbaz le, Yehhozvaz hawj Luqdwz mizndang; gajlaeng de seng miz daeglwg he.

¹⁴ Gajlaeng gij vunzbaz ndaw singz mwnq youq dangqnaj Nazngozmij naeuz: “Yehhozvaz gaeuq ndei hoh, wnggai haenh de! Aenvih de mboujdanh mbouj vwt mwngz, vanzlij soengq fuk hawj mwngz, hawj mwngz miz laeq lwg neix. Baezneix ndaw ranz mwngz ciuqyiengh miz boux ndaej goqhoh mwngz he, daengz mwngz laux le caemh ndaej baengh de. Muengh laeq lwg neix youq ndaw Hijswzlez ndaej riengzmingz!

¹⁵ Laeq lwg neix gaengjdingq ndaej hawj mwngz sim'angq, de gaengjdingq ndaej ciengxlaux mwngz. Laeq lwg neix dwg mehbawx roxsoq mwngz seng he; mehbawx mwngz gaeuq ndei lo, gaeuq aiq mwngz lo, beij miz caet daeglwg vanzlij giengz.”

¹⁶ Gajlaeng Nazngozmij couh umj laeq lwgngez neix youq ndaw rumq hwj, suenqbaenz aeu ma ciengx lo.

¹⁷ Gajlaeng gij vunzbaz ndaw singz mwnq an coh hawj laeq lwgngez neix heuh Ngozbiqdwz. Gyoengqde naeuz: “Nazngozmij caiq miz lwgsai lox!” Boux Ngozbiqdwz neix couh dwg daxboh Yehsih lo; Yehsih couh dwg daxboh Daqveiq goengjvuengz neix.

¹⁸ Fazlwzswh dih lwg lan laenj dwg yienghneix: Fazlwzswh miz Hihswhlwnz,

¹⁹ Hihswhlwnz miz Lanz, Lanz miz Yaqmijnazdaz,

²⁰ Yaqmijnazdaz miz Nazswnq, Nazswnq miz Sajmaenz,

²¹ Sajmaenz miz Boh'ahswh, Boh'ahswh miz Ngozbiqdwz,

²² Ngozbiqdwz miz Yehsih, Yehsih miz Daqveiq.