Geiq Luqdwz 1 - Gij Baujcingq Moq Caeuq Geij Bonj Gij Baujcingq Daeuzdaeuz

Hijliqmijlwz cenz ranz deuznanh

^1-2 Doenghbaez youq aen guek Hijswzlez mijyaengz miz vuengz, caenhgag miz boux daeuzdaeuz dang ak he guenjleix hih mwhde, aen guek Hijswzlez roeb daengz ciengz iekvangh he. [2b]Miz boux Hijfazdah cuz vunz he, dwg youq dieg Youzdaq dih Bwzliqhaengz Singz he, de daiq lwg daiq yah bae deuznanh. Gij coh de heuh Hijliqmijlwz, mehyah de heuh Nazngozmij, song daeglwg de heuh Majlwnz caeuq Gihlenz. [2c]Gyoengqde deuznanh bae daengz aen guek Mohyaz.

³ Gajlaeng Hijliqmijlwz rai lo, lij mehyah de caeuq song daeglwg de.

⁴ Song daeglwg de gajlaeng cungj dwg aeu gij lwgsau Mohyaz ma guh yah, meh he heuh Ngozwjbah, meh he heuh Luqdwz. Gyoengqde youq mwnq aiq miz saek cib bi yienghneix,

⁵ hoeng song daeg de gajlaeng caemh rai lo, lij gag lw Nazngozmij meh vunz dog, mij lwg, mij gvan, gyax gyedgyed.

Nazngozmij caeuq Luqdwz maj Bwzliqhaengz Singz

⁶ Gajlaeng Nazngozmij dingqri naeuz Yehhozvaz soengq fuk hawj gij vunz Hijswzlez, sawjhawj gyoengqde ndaem gogo cungj ndaej sou, mbouj ngaiz iek lo. De couh siengj dauqyungz maj guek Hijswzlez dih dieg Youzdaq lo.

⁷ De yienghneix siengj le, couh cwnjbiq daj mwnq okdin dauq maj. Yiengq ok ma hih mwhde, song mehbawx de caemh soengq de okma.

⁸ Song meh de soengq de daengz dangjroen le, Nazngozmij doiq song mehbawx de naeuz: “Faenhsou gag vunz gag maj laeng mehdai faenhsou bax! Goeng gojyez faenhsou yaengz goq mwhde, faenhsou doiq gyoengqde caeuq doiq gou cungj baenxlai ndei; seizneix caemh muengh Yehhozvaz doiq faenhsou ndei luj mwngz doiq raeuz ndei yienghmwnq.

⁹ Muengh Yehhozvaz baujcuk baujyouh faenhsou doiqyungz cimh ndaej gojyez, ndaej laeb aen gya ndei he.” Nazngozmij yienghneix gangj sat le, ij doxbiek bae hih mwhde couh cup song mehbawx de.

¹⁰ Song mehbawx de raen yienghneix le, cungj coengq sing hwj daej hwnjdaeuj naeuz: “Mbouj, mbouj! Raeuz siengj gaen mwngz maj laeng aen cuz mwngz.”

¹¹ Yiengq Nazngozmij naeuz: “Mbouj hah, lwg hah, gag maj mbanj sou ndaej lo. Vihmaz ij gaen gou bae nej? Gou caiq mij lwg ndaej hawj faenhsou guh gvan laem lo. Ox, mij miz lux!

¹² Maj lo, lwg hah; gou daiq laux lai lo, caiq mbouj ndaej haq laem lo. Cungjsuenq naeuz gou caiq ndaej haq, cungjsuenq naeuz haemhneix majcangq mizndang seng lwgngez caemh mij'z yungh lo.

¹³ Nanzdauh faenhsou ij naenxhoz naenxheiq gag gvaq baenx seiqvunz maz? Mbouj, baenzbaenz cungj mbouj ndaej! Lwg hax, gou seizneix beij faenhsou lij haemzhoj, aenvih Yehhozvaz gaenq vwt gou lo.”

¹⁴ De gangj geij gawq vah neix le, gyoengqde engqgya got raeuj coengq sing daej hwj haemz wekwek bae. Gajlaeng mehbawx daeuz de cup Nazngozmij le, couh gag bae ma lo, hoeng Luqdwz engq got dawz meh de hwj mbouj coengq mbouj deuz.

¹⁵ Nazngozmij raen yienghneix le couh naeuz: “Nex, beixsauj mwngz gaenq gag maj aen gyahcuz bonjfaenh de caeuq de soj sinq dih cwnz lo; mwngz caemh gag maj lo bax!”

¹⁶ Hoeng Luqdwz engq han naeuz: “Gaejyungh caenhrox coi gou deuz, gaejyungh ep gou mbouj hawj gou gaen mwngz. Fanjcingq mwngz daengz mwnqlaw, gou caemh daengz mwnqlaw; mwngz youq mwnqlaw, gou caemh youq mwnqlaw. Aen cuz mwngz caemh dwg aen cuz gou; mwngz sinq dih cwnz, gou caemh sinq.

¹⁷ Mwngz rai youq mwnqlaw, gou caemh rai youq mwnqlaw; mwngz moek youq mwnqlaw, gou caemh moek youq mwnqlaw. Gou gamj baujcingq, caenhgag miz rai cij ndaej hawj raeuz song boux doxbiek. Gou gangj daengz guh daengz; hauhnaeuz gou guh mbouj daengz, nyienh Yehhozvaz fad gou.”

¹⁸ Nazngozmij raen mehbawx ngeih de cungj caenhrox ij gaenhangx bonjfaenh bae, couh mbouj caiq ep de baenx lai lo.

¹⁹ Couh yienghneix, Nazngozmij caeuq mehbawx ngeih de couh itheij maj daengz Bwzliqhaengz Singz. Gyoengqde ngamqngamq haeuj singz, cenz singz vunz cungj raen gig geizheih, gij vunzbaz mwnq dauqcawq cungj lwnh yebyeb, naeuz: “Yoq, de mbouj dwg Nazngozmij maz?”

²⁰ Nazngozmij dingqri le, couh doiq gyoengqde naeuz: “Faenhsou gaejyungh caiq heuh gou Nazngozmij laem lo; heuh gou Majlah bax, aenvih akak rengzrengz gaiqgaiq cungj ndaej guh daengz dih Cangqdiq gaenq cauh hawj gou baenz boux mingh rwix he lo.

²¹ Mwh gou dajlwh mwnqneix deuznanh bae hih mwhde, gou cenz ranz baenxlai hwngqseiq. Hoeng seizneix ma nej? Lij gag lw gou meh vunz dog haem lo, gyax gyedgyed. Akak rengzrengz gaiqgaiq cungj ndaej guh daengz dih Cangqdiq cauh hawj gou miz nanh, lujnaeuz Yehhozvaz gauq gou nwih. Faenhsou cungj lij heuh gou Nazngozmij, miz maz iqswh nex?”

²² Nazngozmij caeuq mehbawx ngeih de lwgsau vaihguek dajlwh Mohyaz ma daengz Bwzliqhaengz Singz hih mwhde, ngamqngamq luj letlet ndaej daeng gvej mienh.